scusa si dóngo 'o tìtulo â lettera comme ha fatto umbertoeco cu 'o libbro suo, ma tanto chillu tìtulo nun ce trasèva niente cu 'o libbro suo accussì comme 'o stesso nun ce trase niente cu 'a lettera mia. Isso dint'â sapienza soja e io dint'â ignuranza mia avimmo fatto 'a stessa cosa.
Ogne tanto ca me casca ll'uocchio ncopp'a tante 'e chelle lettere meje tutte chiene 'e parole ca nun capisco e frase ca capisco pure meno d''e parole, penzo ca ce vo' proprio ca quacche vota te scrive pure quaccheduno comme a me, cchiù semplice e pure sincero, almeno credo. Io 'o ssaccio ca me dìcono ca songo proprio 'a stessa perzona ca scrive pure tutte chelle lettere accussì 'mbrugliate, e me dispiace pure si songo cuntento. E se vede benissimo ca 'o ssaccio pecché già a ll'accumiénzo dico ca me casca ll'uocchio ncopp'a 'e meje lettere, accussì se capisce ca io saccio ca sò meje, o comunque 'o capisco io e chesto m'abbasta.
Aggio liggiuto 'na vota ncopp'â carta 'e 'nu cioccolatino ca nuje tutte quante ('e perzone) simmo pure parìcchie identità tutte 'n 'na vota o cchiù priesto a turno. Tène quaccosa a che fa cu 'a pissicanàlisi, chella scienza 'mmentata 'a Froid. Pe mèrito 'e Froid io allora saccio ca quacche vota scrivo 'e ccose tutte 'mbrugliate, cu pure 'e parole difficile e 'e frase ancora 'e cchiù, e ll'ate vote comme oje nun arrivo a capì 'na acca 'e chello ca me ricordo ca pure aggio scritto io. È buffo, overo, caro Maurizio Costanzo Show?
Aggio visto dint'â televisione 'nu bello film ca se chiammava "I due mondi di Charlie", ca parlava 'e 'nu scemo ca lle fanno 'na cura pe addiventà 'a perzona cchiù 'ntelliggente d''o munno e isso 'a addiventa overamente, ma â fine torna scemo, e quanno torna scemo se ricorda però ca era stato 'ntelliggente, e pure si nun capisce niente 'e chelle parole e frase ca ha scritto 'a 'ntelliggente 'o fatto 'e essere stato 'ntelliggente ce piace 'o stesso pure mò 'a scemo. Io aggio visto 'o film, ma me ricordo ca 'a perzona ca songo 'a 'ntelliggente (tutto chesto è strano, overo?) aveva pure liggiuto 'o libbro, ca se chiammava e fórzo se chiamma ancora "Fiori per Algernon". Si pe caso ce sta quaccheduno 'ntelliggente ca legge ce cunziglio 'e léggere 'o libbro, pe tutte ll'ate comme a me è meglio guardà 'o film ca tanto 'a storia è 'a stessa e va pure a fernì d''o stesso muodo. 'O autore d''o libbro se chiamma Daniel Keyes, 'o dico pecché ô show tuo s'ausa a dìcere 'e nomme 'e chille ca scrìvono 'e bbelle libbre, e pure si io nun ll'aggio liggiute 'e libbre ca tu dice sempe ca sò bbelle io ce credo overamente ca sò tutte assaje bbelle pecché m''o ha ditto 'o purtiere mio ca se ne 'ntenne.
'A vita mia è bella, caro Maurizio Costanzo Show. Songo cuntento 'e essere 'a perzona ca songo, e songo cuntento 'e essere pure chella ca nun songo. Spero ca nun sto facenno cunfusione. Voglio dìcere ca me piace pure ca quacche vota songo 'ntelliggente (credo ca ll'intelliggiente sò chille ca pàrlano cu 'e parole tutte difficile e 'e frase ancora 'e cchiù), pecché songo cunvinto ca essere 'ntelliggente ha 'a essere 'na cosa bona. Ce sta però 'na cosa ca me dà 'nu poco 'e fastidio, 'n stu fatto 'e essere 'ntelliggente a turno. Io me sento me stesso, naturalmente, e saccio ca chesto è giusto pecché si uno nun se sente isso stesso 'n pràteca è malato, credo ca pure ccà ce sta 'a manélla 'e Froid. Visto ca songo 'ntelliggente a turno, e mò nun 'o songo, io me dimanno ch'è ca succede cu me quanno nun songo me? 'A carta d''o cioccolatino dice ca simmo tutte quante assaje perzone, chesto ll'aggio capito. E allora, quanno io nun songo me stesso pecché songo quaccun ato (pe esempio ll'intelliggiente), addó vaco a fernì io? (ovèro chello ca songo mò?) Sta cosa aggi'a dìcere ca me dà 'nu poco 'e fastidio. Spero ca nun penzate ca songo 'ntelliggente contra 'a vuluntà mia.
Quacche vota fórzo songo pure cchiù semplice 'e oje, ma nun 'o ssaccio. Chi sape si quanno songo 'ntelliggente me ricordo ca io songo pure accussì comme mò, ovèro assaje meglio (a parlà umanamente), ma cchiù semplice.
Quanno songo comme songo mò me dimanno pure ch'è ca vo' dìcere essere 'ntelliggente, esattamente. E si uno se studia a mente tutte 'e parole difficile e pure 'e frase ca s'hann'a sapé pe essere 'ntelliggente, doppo vo' dìcere ca accussì se è addiventato 'ntelliggente? Me dimanno si me dimanno sti dimande pure quanno songo 'ntelliggente, e si naturalmente m'arriva 'a risposta visto ca allora songo 'ntelliggente. E me dimanno si quanno songo 'ntelliggente me dimanno si quanno songo comme mò me dimanno 'a stessa dimanna ca me songo dimannato. Songo assaje scemulìllo, overo?
Io ce penzo accussì assaje ca ormaje ne songo sicuro ca avarrìano 'a dà 'nu certificato pe essere 'ntelliggente. Ovèro 'n pràteca ca se va a ll'anàgrafe e comme se dimanna pe sapé 'a data 'e nàscita propia e 'a residenza e si uno è spusato e chelli cose llà, se dimanna pure si ce sta 'a 'ntelliggenza propia o no. M'hanno ditto ca 'n America 'o fanno, ma llà stanno annanze ncopp'a tutte 'e ccose. Sarrìa còmmodo pe tutte sapé si uno è 'ntelliggente o no o fórzo (è overo: po' essere ca uno po' essere "fórzo" 'ntelliggente, comme pure 'e perzone senza casa fissa nun se sape addó abìtano, eppure 'a quacche parte abìtano pure lloro). 'Na perzona ca va a ll'anàgrafe lle dimanna 'nu certificato 'e 'ntelliggenza e accussì po' sape esattamente si è 'ntelliggente 'e sicuro, si 'o è fórzo o si nun 'o è. Sarrìa 'nu bello prugresso civile. Putarrìano 'o scrìvere pure ncopp'â carta 'e identità. Tutte pòzzono vedé sùbbeto ca tengo ll'uocchie e 'e capille marrune, pure senza léggere ncopp'â carta 'e identità "uocchie: marrune", "capille: marrune". Sarrìa cchiù còmmodo si 'mméce 'e sti fessarìe ce avarrìa 'a stà scritto "'ntelliggente: sì/no/fórzo" (naturalmente nun tutt'e tre 'nzieme si nun simmo ô punto 'a capo).
Ma allora a me ch'è ca avarrìano 'a scrìvere ncopp'â carta 'e identità? Io saccio ca nun songo 'ntelliggente, pecché nun songo scemo, songo sulo semplice. Ma saccio pure ca 'n ate juorne 'mméce 'o songo, sempe pe corpa 'e Froid e 'e teorìe soje. Allora ch'è ca ce hann'a scrìvere ncopp'a sta carta? "'Ntelliggente: 'nu poco sì e 'nu poco no"? Ma nun sarrìa overo. Io nun songo 'nu poco 'ntelliggente e 'nu poco no. È ca songo assaje perzone, o almeno cchiù 'e una, comme Froid 'mpara. 'Na perzona ca songo saccio ca è 'ntelliggente, 'n'ata perzona ca songo (tra ll'ato proprio 'n stu mumento) saccio ca nun 'o songo ('ntelliggente). Allora chesto vo' dìcere ca fórzo tengo abbisuogno 'e cchiù 'e 'na carta 'e identità? Ma nun è pruibbito avé cchiù 'e 'na carta 'e identità? Nun è obbligatorio a essere sulo 'na perzona? Credo proprio 'e sì e allora songo fora d''a legge, ma nun 'o faccio apposta. E si me àcchiappano mèntre faccio stu reato, ch'è ca me fanno? E si àcchiappano 'a perzona ca io songo quanno songo 'ntelliggente? Io penzo ca è tutta corpa d''a perzona ca io songo quanno songo 'ntelliggente. Aveva penzàrce isso a sciògliere stu guaio, visto ca è proprio 'ntelliggente. Che corpa ne tengo io, suprattutto a paragone 'e isso? Fórzo, però, è proprio pecché è 'ntelliggente ca ha 'a sempe penzà a quaccos'ato. Si isso penza chello ca penzo io, vo' dìcere ca nun è tanto 'ntelliggente. E allora chi ce salva? Nun ce capisco cchiù niente. Quaccheduno me po' aiutà?

Roberto Quaglia