
 |
GJENUE
Cjâr Maurizio Costanzo Show,
fevelìn vuê di Gjenue. No 'nt fevele mai nissun, in Italie, e al è un pecjât, parcè che a saressin une vore di robis di cativerie sublime di dî. Gjenue e je une grande citât, plui di Vignesie, Florence e Bologne. E patìs però di une emarginazion croniche de sene de atenzion nazionâl, emarginazion che i colpevui a son i gjenovês stes. I gjenovês a son difat vêrs princips de emarginazion, ma no de solite e tipiche emarginazion dai plui puars e bandonâts, cussì slargjade in dute la Italie e in dut il mont. Gjenue e je mestre tal emarginâ i siei citadins plui vîfs. Ma no par cativerie. Difat, plui che in ce che si à apene dit, Gjenue e je perfete tal gjest assurt di emarginâ adiriture se stesse dal mont. Fin des sôs origjins separade dal rest de societât dal mâr e des monts, Gjenue si è separade ancje a nivel mentâl (e cemût podevial jessi altrimentri?). Poiade come pocjis altris metropolis su lis culinis che a cjalin sul mâr, e ufrint cussì di se un spetacul unic che nol stufe mai, metude tal mieç di une des rivieris plui bielis dal mont, Gjenue e je rivade par miracul a evitâ il 100% dai milions di turiscj di dut il mont che cence padin si movin lassant daûr di se une scie di bêçs e di benstâ. La posizion gjeografiche di Gjenue e je un regâl che pocjis altris citâts tal mont a podaressin vantâ. Il clime d'Invier al è tra i plui mîts de Italie e d'Istât il plui ventilât. Cence fâ tal passât nuie di clamorosementri sbaliât o dome alc di just, Gjenue e podarès cumò jessi la Miami de Europe. Imagjinait, imagjinait une spiaze che e ledi di Vesima a Nervi, interote dome dal plui grant puart turistic dal mont, cun centenârs e centenârs di albiercs par dutis lis sachetis plens dut l'an di siorissims paronis di panfii e di turiscj de Europe interie! Imagjinait il centri storic gjenovês, il plui grant de Europe, plen di turiscj beâts, intasât di int che e à voie di spindi! Imagjinait la citât di Avost, che e formie di umans che si gjoldin la vite e che a spindin no mancul che a Rimini! Nissune fabriche di Cornigliano in passîf di bêçs e che e produs dome cancar! Al lôr puest: un lunapark permanent che al cjale sul mâr, a un pas de spiaze!
Di Avost a Gjenue no si cjate une buteghe vierte che e sedi une.
A Feragost la citât e je muarte, o in animazion sospindude. Cussì cidine di fâ pensâ che une bombe al neutron le vedi sterilizade de sô popolazion. Ducj i gjenovês a son a spindi in altris bandis, cuant che al sarès stât cussì facil fâ che a fossin chei altris, i no-gjenovês, a passâ l'Avost a Gjenue a spindi i lôr sparagns.
Di cui ise la colpe?
Al sucêt ancje dispès che un individui nol sedi il colpevul dal so destin. No sucêt la stesse robe ai popui. I popui a son a son responsabii dal lôr destin. I gjenovês a son colpevui di vêsi strassade la ereditât ambientâl che a vevin a disposizion, lassant che e deventàs tane di marçum il centri storic che al varès apassionât turiscj di dut il mont, lassant lis lôr spiazis in bale dal insediament di fabrichis che no produsin bêçs e che a produsin cancar, emarginant in maniere sistematiche cualsisei che al fasès cualsisei robe cun cussience, e ae fin, continuant ancjemò te lôr matetât vuarbe e autolesioniste.
Si vîf mâl a Gjenue, vuê plui di îr e mancul di doman, ogni cjanton scûr al è il lûc preferît des miârs se no dicinis di miârs di zovins gjenovês tossicomans.
Là che ancjemò int sedi, la inteligjence e patìs, a Gjenue, ae viste di cheste vuarbetât strategjiche coletive, te comprension des oribilis taris mentâls che a àn puartât Gjenue a une rovine cussì invezit de prosperitât sflandorose che lis sôs risorsis ecezionâls i varessin rindût facile di realizâ.
Al è par chest che di Gjenue al scjampe e al à di scjampâ cualsisei che tal archetip dal gjenovês nol si ricognòs e nol si vûl rassegnâ a ricognossisi.
A son scjampâts in tancj. I artiscj, ducj. O ben a àn smetût di fâ i artiscj. A Gjenue nol sorevîf a lunc un cjantautôr, un comic (par citâ lis categoriis di artiscj che "a van di plui"). Ma nancje un scritôr, un pitôr, un regjist teatrâl, un atôr. Se a Parîs o a Vignesie un zovin al sune pe strade par vuadagnâ cualchi bêç al è un artist in jerbe. Se lu fâs a Gjenue al è un pitoc. Par cuâl motîf i cjantautôrs e i comics gjenovês sono in medie i miôr de Italie? Parcè che fin cuant che no àn bandonât Gjenue a son stâts a maçerâ te indiference gjenerâl, sfuarçâts dal dolôr di no jessi par nuie considerâts a miorâsi e a miorâsi e a miorâsi, par simpri dibant, fin cuant che, bandonade finalmentri cheste place vuarbe, a àn podût misurâsi cun cui che, tal rest de Italie, al veve fat in paralêl robis compagnis aes lôr, ma cun mancul delusions, mancul frustrazions e duncje, mancul cressite artistiche.
Ce che o ai apene dit al è naturalmentri discutibil, ma cui che al vûl discutilu mi varà di spiegâ, alore, a ce che e sedi par esempli dovude la cussì clamade "scuele gjenovese" dai cjantautôrs. O pues garantî che no esist nissune scuele di chest gjenar. La uniche scuele di Gjenue, che e sfuarce l'artist o il pensadôr ae rinunzie o al miorament, e je la Indiference. La Indiference dictade no dal snobisim, ma de Otusitât. E distrûç une ment origjinâl o le tempre.
Zirant pal mont e incuintrant, come che al sucêt dispès, un talian, tu ti inacuarzis subit se al è un gjenovês. Lu mande fûr dai voi. O ben, tu lu capissis di ce che dai voi nol mande fûr. I gjenovês che a son ancjemò vîfs dentri, cuant che a zirin fûr dai confins de segregazion gjenovese a mandin fûr dai voi lamps che no si pues sbaliâ, sflandôrs di entusiasim che no si pues tignî tal scuvierzi che no dut al mont al è ancjemò muart. O invezit, se a cjaminâ a l'ester a son i gjenovês plui tipics, un vêl opac di fumate al jemple il lôr cjalâ distudât par simpri, che se no tu stâs atent in curt ti torne a infetâ cul umôr che a Gjenue in ogni câs no tu puedis evitâ di vê.
Il gjenovês al è sierât, come che sierade e je simpri stade, a nivel gjeografic, la sô citât. Cheste sierade, cheste avarizie mentâl, tal passât, e je stade di sigûr utile ae sorevivence. Vuê, che i confins gjeografics no son plui ostacul di comunicazion, sierâsi al mont nol è plui strategjie di sorevivence, ma di autoemarginazion e di estinzion. Gjenue e je in agonie, o forsit e je za muarte, no sai, ma no ste vêle cun me. (a metafore esprimude no si cjale in bocje)
Roberto Quaglia
La opare "Cjâr Maurizio Costanzo Show...", dute o in part, e pues jessi leiude, discjamade sul computer, stampade e copiade cence limits, dome par ûs personâl. Ducj i tescj e lis ilustrazions a son proprietât di Roberto Quaglia e no puedin jessi doprâts dal dut o in part cence autorizazion. Il progjet grafic e lis componentis grafichis di chestis pagjinis a son proprietât riservade di Roberto Quaglia. La opare "Cjâr Maurizio Costanzo Show...", dute o in part, no pues jessi metude in vendite a nissun titul cence autorizazion prime.
© 1994-2000 Roberto Quaglia.
|