parramu oggi di Gènova. Nun ni parra mai nuddu, ’n Italia, e è nu piccatu, pirchì ci sarrìanu supra chistu assai assai cosi di sublimi cattività di diri. Gènova è ’na gran città, cchiù di Venezia, Firenze e Bologna. Pàtisci però di ’na crònica emarginazioni dû prascieniu dâ attinzioni naziunali, emarginazioni di cui su’ rei li ginuvisi stissi. Li ginuvisi su’ defatti veri e propri prìncipi di l’emarginazioni, ma nun dâ sòlita e tìpica emarginazioni dî cchiù pòviri e dirilitti, accussì diffusa ’n tutta Italia e ’n tuttu lu munnu. Gènova è maestra a emarginari li propri cittadini cchiù vivi. Ma nun pi cattività. Defatti, cchiù ca ’n chiddu ca s’è appena dittu, Gènova è perfetta ntô assurdu gestu di emarginari addirittura sé dû munnu. Fina dî sò origgini spartuta dû restu dâ sociità dû mari e dî munti, Gènova si nn’è spartuta puru a livellu mintali (e comu avrìa pututu essiri sinnò?). Adagiata comu pochissimi àutri metròpuli supra li culini affacciati supra lu mari, uffrennu accussì di sé nu spettaculu únicu ca nun veni mai a noia, situata ’mmenzu a una dî cchiù beddi riviere dû munnu, Gènova è miraculusamenti arrinisciuta a evitari lu 100% dî miliuni di turisti di tuttu lu munnu ca senza firmata si mòvinu lassannu darreri di sé ’na scia di dinaru e di binissiri. La lucazioni geugràfica di Gènova è nu donu ca pochi àutri città ntô munnu putissiru vantari. Lu clima d’invernu è tra li cchiù miti d’Italia e d’estati lu cchiù vintilatu. Senza ’n passatu fari nenti di clamurusamenti sbagghiatu o appena quarchiccosa di giustu, Gènova putissi ora essiri la Miami d’Europa. Immaginati, immaginati ’na spiaggia ca vaja di Vesima a Nervi, ’nterrotta sulu dû cchiù granni portu turìsticu dû munnu, cu cintinara e cintinara di alberghi pi tutti li sacchi strachini tuttu l’annu di ricchissimi pussissuri di panfili e di turisti di l’Europa sana! Immaginati lu centru stòricu ginuvisi, lu cchiù granni d’Europa, gonfiu di turisti biati, ’ntasatu di genti disidirusa di spinniri! Immaginati la città d’austu, vrulicanti di umani gaudenti e spinnazzuna nun menu ca a Rimini! Nenti fàbbrichi di Cornigliano ’n passivu di sordi e pruduttrici sulu di cancru! Ô postu loru: nu luna park permanenti affacciatu supra lu mari, a nu passu dâ spiaggia!
A austu a Gènova nun si trova nu putia aperta ca sia una.
A Ferragostu la città è morta, o ’n animazioni suspisa. Accussì silinziusa di suggeriri ca ’na bomba ô neutroni l’àbbia sterilizzata dâ sò pupulazioni. Tutti li ginuvisi su’ a spinniri ’n àutri pizzi, quannu sarrìa statu accussì facili fari sì ca fussiru li àutri, li non-ginuvisi, a passari l’Austu a Gènova a spinniri li propri risparmi.
Di cu’ è la curpa?
Succedi puru spissu ca n’individuu nun sia lu curpevuli dû sò distinu. Nun succedi la stissa cosa ê populi. Li populi su’ rispunsabbili dû sò distinu. Li ginuvisi su’ curpevuli di s’aviri sputtanatu l’irdità ambientali ca avìvanu a dispusizioni, lassannu ca addivintassi covu di marciumi lu centru stòricu ca avrìa appassiunatu turisti di tuttu lu munnu, lassannu li propri spiaggi â mercé dû ’nsediamentu di fàbbrichi impruduttivi di sordi e pruduttrici di cancru, emarginannu sistematicamenti cu’ sia facissi qualsiasi cosa di cuscinziusu, e ’nfini, pirsivirannu ancora ntâ propria cecata e autulisiunista follìa.
Si vivi mali a Gènova, oggi cchiù di aieri e menu di dumani, ogni angulu scuru è pizzu pridilettu dî migghiara si non dicini di migghiara di giuvani ginuvisi tossicòmani.
Unni ancora ci ni sia, l’’ntilligenza suffri, a Gènova, â vista di sta cullittiva cecità stratègica, ntâ comprinsioni di li orrenni tari mintali ca hannu cunnuttu Gènova a ’na tali ruvina ’n locu dâ radiusa prusperità ca li sò eccizziunali risorsi ci avrìanu risu facilmenti realizzabbili.
È pi chistu ca di Gènova fui e havi a fuiri cu’ sia ntô archetipu dû ginuvisi nun si ricanusci e nun si voli rassignari a si ricanusciri.
Su’ fuiuti ’n tanti. Li artisti, tutti. Oppuru hannu finutu di fari li artisti. A Gènova nun supravvivi a longu nu cantauturi, nu còmicu (pi citari li categurii di artisti ca "vànnu pâ magghiuri"). Ma mancu nu scritturi, nu pitturi, nu regista tiatrali, n’atturi. Si a Parigi o a Venezia nu giuvani sona pâ strata pi si guadagnari quarchi sordu è n’artista ’n erba. Si lu fa a Gènova è nu pizzenti. Pi quali mutivu cantauturi e còmici ginuvisi su’ ’n media li megghiu d’Italia? Pirchì fina a quannu nun hannu abbannunatu Gènova hannu macinatu ntâ ’ndiffirenza generali, custritti dû propriu duluri di nun essiri assulutamenti cunsidirati a si migghiurari e a si migghiurari e a si migghiurari, eternamenti ’n vanu, fina a quannu, abbannunata finalmenti sta cecata chiazza, hannu pututu si misurari cu cu’, ntô restu d’Italia, avia parallelamenti fattu cosi analughi ê loru, ma cu menu dilusioni, menu frustrazioni e accussì, minuri crescita artìstica.
Quantu aju appena dittu è ovviamenti upinabbili, ma cu’ lu voli upinari m’avrà a spiegari, allura, a chi sia pi esempiu duvuta la accussì ditta "scuola genovese" dî cantauturi. Pozzu garantiri ca nun esisti nudda scuola di stu gèniri. L’única scuola di Gènova, ca custrigni l’artista o lu pinsaturi â rinuncia o ô migghiuramentu, è l’Indiffirenza. L’Indiffirenza dittata nun dû snobismu, ma dâ Uttusità. Idda destrui ’na menti uriginali oppuru la tempra.
Girannu pû munnu e ’ncuntrannu, comu spissu succedi, n’italianu, t’adduni sùbbitu si è nu ginuvisi. Lu emana dî occhi. Oppuru, lu capisci di chiddu ca dî occhi nun emana. Li ginuvisi ca ancora su’ dintra vivi, quannu si ggìranu fora dî cunfini dâ sigrigazioni genovese mànnanu inequivocabbili lampi dî occhi, bagghiuri di irrefrenabbili intusiasmu a scupriri ca nun tuttu ô munnu è ancora mortu. O ’mmeci, si a deambulari a l’esteru su’ li ginuvisi cchiù tìpici, n’opacu velu di neggia satura lu sò sguardu stutatu pi sempri, ca si nun stai attentu ’mpressa ti reinfetta cu l’umuri ca a Gènova a ogni modu nun po’ evitari di aviri.
Lu ginuvisi è ’nchiusu, comu ’nchiusa è sempri stata, geugràficamenti, la sò città. Sta chiusura, sta avarizia mintali, ’n passatu, si resi certamenti útili â supravvivenza. Oggi, ca li cunfini geugràfici nun su’ cchiù ostàculu di cumunicazioni, ’nchiýirisi ô munnu nun è cchiù strateggia di supravvivenza, ma di autuemarginazioni e di estinzioni. Gènova sta agunizzannu, o fòrsi è già morta, nun sacciu, ma nun mi ni vuliti mali. (a metàfura sprissa nun si talia ’n vucca)

Roberto Quaglia