 |
|
Questa l'è stêda l'istê ad Robert Sheckley. E' grând scritôr l'è vnu in Italia, grazie a l'iniziativa e a l'impegn ad Roberto Quaglia ch'u l'à invidê, curê e scarozê par un mês intir in Italia e in Europa. Chi ch'l'à avù l'ucasion ad vëdal l'è armast entusiasta - guardè int ste nòmar i cument ad Vittorio Curtoni in Memories of green
e ad Roberto Genovesi in Interazioni - e a javem decis ad prupôrv sta crònaca dl'esperienza, un pô particulêra (u n' puteva ësar ad'êtar, scrèta cumè ch'l'è da Quaglia) e una masa afascinânta (cumè d'sóra).
Arìv in Italia
Milano Linate, mercoldè 21 lój 1999, al 14 e mëza.
I va e i ven una masa d'aeroplan, mo un sôl l'è cvël impurtânt. A l'aeropôrt a sem andé in tri: Max Morando,
Daniele Vecchi e e' sotoscrèt. A l'ôra 15 e quèl l'unic aeroplan impurtânt ad cl dè e' duvreb mètars int al mân l'unic Robert Sheckley
dl'univêrs ch'a cnusem. L'è difizil cràdal, ènca se una longa fila d'event impruòbabil la à fat diventê sta pusibilitê benedetament pruòbabil. An e an ad curispundenza par email, tentativ d'prima aburtì da e' Chês, e finalment una geometrì maravigiösa ad cuincidenz favurèvli. E ècuv aquè l'impruòbabil ch'e' dventa inevitabil e nó a Linate ch'a fibrilem dla nöstra emozion piò bëla. L'aeroplan ch'a aspitem l'atèra. A s'preparem a l'incöntar e pôch dop a vdem i passegér ch'i pasa dnenz a nó. Chi d'lôr ch'e' sarà Sheckley? A n' savem bén che faza ch'l'epa. Int la memoria, sôl l'arcôrd ad cvalca foto vëcia ad decèni. Basterà par cnòsal? A guardem bén tot al fazi ch'agli pasa dnenz a nó. E acsè a dventem pianin vètima d'cla stesa Deformazione Metaforica che Sheckley l'à invintê int un su lìbar. A cmenzem a vëdar Sheckley int ogni cristian sôl d'una zerta etê. A finem parfin par andêr dri a cvalcadun, zarchènd ad fês nutê, sperènd ch'i s'trasforma int e' Sheckley ch'i n' è, s'capès. E' temp e' pasa e ormai quasi tot i passegér i è pasé par nient int e' nöst sdaz. La Deformazione Metaforica l'incalza, e ènca un vëc giaponês par un mumintin u s'pê ch'e' pösa ësar e' Nöst. Pu i passegér i finès, e ènca e' temp ad Daniele, ch'e' dev turnê int l'ufèzi. A arstem Max e me, e l'unica roba ch'a pusem fê l'è aspitê l'aeroplan dop.
L'aeroplan impurtânt e' risulta ësar cvël dal 18 e mëza. E finalment, tot int un culp, Sheckley l'è cun nó. L'à indös i bermuda e al zavati e e' porta cun sè sôl una bórsa grösa, un zainèt, e una giaca elegânta ch'e' ten in mân. Par tot e' viaz, int e' mês dop, u n' la mitrà indös gnânca una vôlta.
Dö ôr dop a sem a Genova, duv che Sheckley l'è ospit ad Maurizio Frizziero (Popi par j amig), int la su bëla ca dnenz a la spiagèta ad Boccadasse, fôrsi e' cantòn piò sugestiv ad tota Genova. Lè, dnenz a una tèvla pareciêda ad parsòt e mlòn, a pasem una seràda splendida a discôrar, sóratot ad cvânt l'è impruòbabil quel ch'u s'sta suzedènd. A s'n'adem sóbit, Popi e me, che Sheckley aquè u n' gn'è, e u n' i purèb mai ësar. Cun nó aquè u j è sôl Robert, e Robert l'è vër e l'esest in chêrna e òs e l'è aquè cun nó, intânt che Sheckley l'esest int i nöst zarvël cumè rapresentazion. Rapresentazion dla rapresentazion, e' pignulegiarà pu Mario. Insòma un mit, un archetip, un quèl astrat che i nöst sens i n' purà cnòsar mai, tânt a s'e' sem imaginê int e' pasê. Par cumuditê a l'ciamarò tutavì Sheckley, int e' rest d'ste mi racont. Mo savì che invezi me a starò pinsènd a Robert, parchè l'è lò ch'a jò cnunsù.
Zobia 22 lój l'è una zurnêda d'acclimatazion. E' fa un chêld ch'u s'mór, u j è un jet lag da superê, a decidem ad n' stracês. E quest u n' c'impedes ad gòdas una seràda splendida int e' lucêl ad Enrico Reboscio, ristoratôr e amiradôr ad Sheckley, ch'u c'ofr una bëla sfilêda ad specialitê da magnê tipich dla Liguria.
 |
 |
 |
| A la librarì Fahrenheit 451 |
 |
Vènar 23 lój a sem a Piacenza. U c'à invidê a magnê Vittorio Curtoni, una parsôna deliziösa, ad là di su merit int e' mond dla fantascienza italiana. E e' magnê, cuciné da la su moj Lucia, l'è pröpi a l'altëza dla situazion. Dop magnê, Sheckley e' s'cunzéd un ripusin s'e' sofà. Piò têrd, Vittorio e' dirà ch'l'avreb fat atachê una tèrga d'sóra e' sofà cun scrèt:
Aquè l'à durmì Robert Sheckley. E quest u s'purtarà pu a l'idea, par un viaz ch'e' vèn, ad preparê una tèrga cun scrèt
Aquè adës u j è Robert Sheckley, da mètar fura in temp real dapartot duv ch'a s'fermem. Int e' dopmezdè la realtê la s'fa piò fisa. I ariva a ca ad Curtoni in pelegrinaz da mëza Italia di amiradur ad Sheckley. Pu a andem a la librarì Fahrenheit 451 duv che e' Nöst l'è intervistê par una televisiôn de' pöst. Pu a finem tot a magnê int un'ustarì ad prima. I Testimoni di Sheckley i è cresù incôra e adës u j è quaranta parsôn a magnê cun lò. Dop zena a turnem int la librarì par una presentazion pòblica dl'autôr. A l'öndg ad sêra a s'arcmetem par la strê ad ca, vers Genova. L'è stêda una zurnêda bëlissima, cuntêda piò par bén e da un êtar pont ad vësta da Vittorio Curtoni int ste stes nòmar ad Delos. Sheckley l'è tânt cuntent. Ènca me. Ènca Vittorio. S'u j è cvalcadun ch'u n' è cuntent, s'capès che e' s'è mess da pêrta cun discreziôn.
Sabat 24 lój e dmenga 25 lój agli è zurnêdi abastânza tranquèli. Mo nö par quest manch impurtânti. Al Grandi Cös agli n' è par forza cös grandi. A zirandulem un pô par Genova e d'intorna cun Alessandro Testa e d'j êtar amig, mo a sem tot tip piò interesé a al cös ch'a s'dsem che a al cös ch'a fasem. La dmenga, a ca ad Popi, cun e' mêr azur che da la fnèstra u s'arcorda cun discreziôn ch'u j è ènca e' mond, a s'guardem ènca, sènza badêj tânt, e' Gran Premio ad automobilismo in televisiôn, savènd che un fònd e' vel cl'êtar par i nöst discurs.
Lunedè 26 lój a fasem un zirèt int la riviera, a Camogli, e cun e' batël u j scapa ènca una scapadina a San Fruttuoso di Camogli. E' temp l'è sèmpar bël. E ènca al nöstri ciacarêdi. A v'purò fê vdé dal fotografì ch'al v'cunvenza che e' temp l'è bël. Mo par quel ch'u riguêrda i discurs, a m'avì da cràdar s'la parôla. A sem sèmpar cuntent.
Martedè 27 lój a s'tòca al Cinque Terre. Sheckley u n'aveva sintù dì bén, e acsè a decidem d'andêli a vdé. A andem in machina fena a Manarola. A pì, fasènd la famigerata Via dell'Amore sota un sól ch'e' brusa, a arivem a Riomaggiore. Da aquè un batël u s'porta a Vernazza e da lè un treno u s'riporta a la nöstra machina a Manarola. A dìl e' basta un pugn ad parôl, a fêl u j vô un ban temp e una bëla fadiga. Amig dl'esagerazion, int la strê de' ritöran a truvem temp e fôrza ènca par una visita a Portofino. Quând che la zurnêda la finès, Sheckley l'è sfinì. Mo al Cinque Terre u l'à lasê sènza parôl, e nö sôl par via dla stracadëza.
A decidem che Mercoldè 28 lój la deva ësar una zurnêda ad ripös cumplet. E' piôv, e cun la piôva la temperatura la cala, la s'dà un pô ad tregua e la s'fa ripusê d'mej. La zurnêda però la s'invivës cun una visita ad Natalino Bruzzone, che a ca ad Popi u j fa un'intervèsta splendida par la pàgina culturêla de' Secolo XIX.
 |
 |
 |
| In Mondadori: da sinestra Lippi, Laura Serra, Sheckley, Festino, Alessandri, Quaglia |
 |
Zobia 29 lój a andem a Milano. Prèma fermêda: Segrate, Mondadori. U s'arcév un cordialissim Giuseppe Lippi, curatôr ad Urania, e cun sorpresa a scuprem ch'u n' è da par lò: a artruvem Vittorio Curtoni, Laura Serra, Giuseppe Festino, Piergiorgio Nicolazzini, Ferruccio Alessandri, tot zà a Piacenza, piò Claudio Asciuti, Domenico Gallo e tânt d'j êtar. A magnem int la mensa dla Mondadori, e dop Sheckley u s'vèn sequestrê par un zir d'intervèst e ad discurs d'afêr. A aspitem cun pazienza par un ban pëz int una camarèta sènza gnint. Un a la vôlta i s'n'va tot e me a m'artrov a aspitê piò o manch da par me. Finalment chi ch'l'era sparì u s'fa ved d'nôv e a pusem andê in zitê. Destinazion: la Libreria del Giallo, in via Peschiera 1. Un pöst ad prima, tânt ch'a mett ènca l'indirèz. D'j êtar fans i ariva lè e sóbit l'è una bëla ciacarêda, bagnêda da e' spumant ch'i ofr i padrun. U s'fa vdé ènca Claudio del Maso. E sóbit l'è sêra, ciuè l'ôra ad zena, anzi: ad pizza. Par l'ucasion u s'fa vdé ènca Luca Masali. Una gran pizêda tot insèn cundida da quatar ciacar d'piò. A sem tot cuntent, e chi ch'u n' gn'è u l'pê. Un pêr d'ôr ad machina par turnê a Boccadasse e ènca sta zurnêda longa la s'chiud.
Vènar 30 lój a lasem Genova e Boccadasse. Sheckley u m'dmanda: A n' turnarem piò aquè? A arspònd me: Nö int ste viaz. A m'arcurdarò a lòngh la tristëza ch'la j è vnuda sóbit int la faza. Int e' mument ad salutêl, Popi u l'guêrda, e' rid e u j dis: U n' è necesêri ch'a s'dsèma quèl adës. Sheckley e' fa sè cun la tësta apena e e' ven via cun me. Popi e Robert i s'era zà dét una masa int al longhi nòt pasêdi a discôrar quând che d'j êtar i avreb durmì. A muntem in machina e a partem par Lucca, duv ch'a arivem cvalch ôra dop. U s'acôj Alessandro Fambrini, ch'u s'ven a tô in biciclèta e u s'fa strê vers la su ca, duv ch'a sarem ospit. L'è un dopmezdè tranquèl, cvël ch'u s'aspèta. A n' murem da la voja ad fê quel ch'i fa i turèsta quând ch'i ariva da cvalca pêrta. A s'ripusem un pô, a fasem un zirèt cômod in machina d'intorna a al mura dla zitê, a andem a la staziôn a tô Stefano Carducci ch'l'ariva da Treviso. E la sêra a andem tot a magnê int un'ustarì ad prima in cuìna.
Sabat 31 lój e' cmenza cun un zirèt s'al cuìn d'intorna, duv ch'a s'imbatem int un impruòbabil quagliodromo, un pöst insòma sinistar ch'a m'vèn d'istint ad stêj a la larga. A decidem ad cambiê aria e a s'spustem a Pisa, duv ch'a s'ciapa in cunsegna Francesco Ghetti ch'u s'fa da guida turistica. La sêra a sem ospit a zena da lò, e la quantitê e la qualitê dal purtêdi l'è tèla da mètas pröpi in crisi (sóratot e' sotoscrèt). In parôl povri: magnê e bvù tròp. Mo cum s'feva a resèstar? In una manira o in cl'êtra a artruvem la strê ad ca e a afruntem una longa nöt ad sön e ad digestion.
Dmenga 1 agòst l'è un dè pôch cunsiliê par mètas int l'autostrê. Mo la lògica dal partenze intelligenti la s'aiuta. Da quând ch'agli è dventêdi d'moda al partenze intelligenti, i dè che da sèmpar i era i pez par mètas in strê i è dventé i mej, parchè niseun l'è acsè stöpid da mètas in viaz pröpi in chi dè lè. E acsè a n' truvem trafich s'agli autostrê e a arivem a Treviso sènza pinsir int e' prém dopmezdè. A stasem a ca ad Stefano Carducci. A s'ripusem cvalch ôra, e la sêra a zirandulem par la zitê e a s'fermem a zena int un'êtra ustarì ad prima, duv che i nöst nòbil prupòsit ad dzun dietetic i naufraga par l'ennesima vôlta.
Lunedè 2 agòst a andem a Venezia. E' fa un chêld ch'u s'mór, u j è un sól ch'e' brusa e incôra piò turèsta. Sheckley u n' vdeva Venezia da una ventèna d'an. E' pöst u l'ispira e alóra e' s'mett a scrìvar. Dapartot, int tot e' nöst pelegrinê, Sheckley u n' lasarà gnânca un mumint e' su taquin e la su cara pèna Montblanc. Tot i dè, tânt vôlt a e' dè, a l'avem vest e a l'vdrem tirê fura taquin e pèna e cmenzê o andê avânti a scrìvar. Mo a Venezia l'è un mument speciêl. A l'vdem scrìvar cun una dedizion piò fisa che d'solit. Dop una pizza ch'la n' valeva gnint a visitem la librarì ad Giampaolo Cossato. A mëz dopmezdè l'è ôra ad turnê a Treviso par un pô ad siesta. A javem scuvért che a Sheckley i particulêr ad Venezia, cumè de' rest ad tot i pöst, i n' gl'interesa piò ad tânt. Quel ch'e' zirca int i pöst duv ch'e' va l'è l'atmosfera ch'i dà. L'atmosfera l'è la pêrta ch'la n' s'pô dì di pöst, la roba piò interesânta ad quel ch'u t'stà d'intorna. La sêra u s'arziunz Daniele Vecchi cun la su moj Debora, e tot insèn a magnem benissum a ca Carducci. Stefano e' tira fura una fila ad dèsch ad vinil cun dla musica che Sheckley u n' sinteva da decèni. E sóbit l'è nustalgì, o quèl ad cla famèja d'emozion. La seràda la s'svilóppa e la finès in bëla manira.
Praga
Martedè 3 Agòst ad prèma matèna i ariva da Genova Mario Quaglia, Ada Cortese e Max Morando. L'è cun lôr ch'a s'metem in strê e a lasem l'Italia, cun e' mus dla machina vultê vers nòrd. A sem in zinch int la mi machina, a stasem strèt (sóratot chi ch'i è a sêder dri, parchè Max da par lò e' cunten zirca 120 chil ad sè stes), mo e' bagagliaio l'è grând e e' mutor e' fa e' su dover. A sciapem fura da e' Tarvisio e a andem vers Salisburgo, pu a vultem a dèstra vers Linz, e dop a ciapem la statêla vers nòrd e a s'tufem int la Repubblica Ceca. A arivem a Praga vers al nôv ad sêra dop una zurnêda ad viaz, ad sól e ad paesag ch'i piês una masa. U s'aspèta Yaroslav Olsa Jr., un zôvan diplomatic cec e ènca ón di piò grând espert ad fantascienza int e' su paés. L'è lò ch'u c'à invidê a Praga, e l'è lò ch'u s'mett a dispusizion un apartament cômod duv ch'a andem a stê. U j è incôra temp e fôrza par una zenèta int l'ustarì piò davsen. A n' so i êtar mo me a so distrut. A jò guidê tot e' dè e una nöt ad sön fònd l'è pröpi la benvnuda.
 |
 |
 |
| Sheckley e Quaglia int un cafè ad Praga |
 |
Mercoldè 4 agòst Cus ch'u s'fa e' prém dè ch'u s'è a Praga? U s'dà un'ucêda in zir. U s'va int e' budël de' zentar stòric a vdé i souvenir ch'i vend in tot i pöst turistich de' mond, u s'zirca ad vdé un pô ad Praga atravérs la spësa cvérta ad turèsta, e quest l'è difati quel ch'a fasem. Par cvalch ôra. D'aquè e d'ad là a s'mitem a sêder a bé un cafè o a sbucunê quèl. A sem piò a nòrd e finalment la temperatura la s'pô supurtê. E e' temp l'è bël listès. E nonostânt i turèsta Praga l'à un'atmosfera unica. Int e' dopmezdè a spindem 20 mela lir ad taxi par fê otzent mètar par andê a e' Ministero degli Esteri duv che Yaroslav Olsa u s'aspèta. Tot vistì bën int e' su vistì elegânt da diplomatic Yaroslav u s'acôj in cumpagnì d'una su cuntrêda afascinânta d'una inteligenza rèra, Jana Pechova, ch'la starà cun nó par e' rest dla zurnêda. E' Ministero degli Esteri l'è in cuìna, e una spasegêda pianina vers la valê la mett d'acôrd ben i bsogn d'i turèsta cun la nöstra legìtima pigrizia. Ènca parchè in fònd a la cuìna a s'artruvem int la ca esotica ad Yaroslav, pina ad òpar d'êrt africani e sóratot ad lìbar ad fantascienza ad tot e' mond. Mo a n' degh de' mond ch'a cnusì vó. A degh ad lìbar ad fantascienza birmân, etiop, congolês, e chi ch'u n'à d'piò u n' mètta. Una chica dop cl'êtra. E nó a i bvem d'sóra. L'è l'ôra dl'aperitiv. Fra pôch, e' gotha dla fantascienza cèca u s'aspitarà int ón di ristorantin piò esclusiv de' zentar. E ècas pôch dop difati lè, int cl'ambient raffinê che, purtrop, a m'so smèngh duv ch'l'è, a sêder a una tèvla grânda iluminêda sôl da i candel, aspitènd una zena ad cusèna boema. Oltar a Nó, Yaroslav e Jana u j è Ondrej Neff, scritôr cec cnunsù, Ivo Zelezny, editor ad SF, Ivan Adamovic, curatôr dla rivesta Ikarie e tânt d'j êtar. E' magnê l'è bon, mo cun e' temp a m'e' sarìa smengh, parchè quel ch'u j è d'intorna l'è piò interesânt. A bvem ènca una masa ad vèn bon. A la fin dla zena a andem tot int una famösa birarì duv ch'u pê che ogni tânt u s'fes vdé e' presidènt Havel in parsôna. A pasem a do pass da e' ghetto ebreo duv che pröpi in cl mument i sta girènd una scena d'un film ambientê un pô ad temp fa. A vdem una masa ad nazèsta, ch'i fa e' rastrelament d'j ebrei. Pôch dop a sem int la birarì, duv che me a m'propon ad n' bé gnint. U sarìa tròp. E' mi prupòsit però u n' dura gnânca un pugn ad sgònd. E zo bira, ch'l'è pröpi bôna! A sem tot cuntent. Una masa cuntent. L'è un viaz pin ad cuntintëz. U n' è roba ad tot i dè. L'è un pchê che ogni vôlta ch'u s'è cuntent pu a la fin u s'epa d'andê a durmì listès. E e' dè dop bsògna cmenzê da cô.
Zobia 5 agòst A cmenzem da cô e sóbit i s'freg una telecamera. U n' è e' mas-cim par rimètar in pi la cuntintëza de' dè prèma. A s'zirandulem par e' zentar ad Praga int l'atesa de' prossim apuntament. Int e' dopmezdè i fans i s'aspèta int ón di piò impurtânt club ad fantascienza. Lè l'acuglienza l'è una masa chêlda, mo sôl par Sheckley. Par cvalch ôra niseun u s'n'acôrz che insèn a Sheckley u j è êtri tri parsôn, e niseun u s'degna gnânca d'un salut. Par me, a preferiva i VIP dla sêra prèma. Dop un pô, nó italian a cmenzem difati a sintis d'tròp. Cus ch'a stasem a fê lè? Dop un pô e' salta fura cvalcadun ch'a cnòs e la situazion la migliora un pô. Yaroslav u m'aveva avisê, mitèndum in guêrdia che i cec i n' è tânt de' cumpagnia. Da cl'êtra pêrta, bsògna pruvê par cràdar. L'unica emozion l'è guardê la trance mistica d'un simpatic fan rös dnenz a Sheckley. A jò vest d'rêd tânta emozion int j ôc d'un ch'a n' cnunséva. E un pô d'osmosi emozionêla l'è la cunseguenza lògica. D'ste dopmezdè a m'arcurdarò acsè int e' futur sôl j ôc d'ste burdèl. Ènca parchè, zà ch'a j era, a jò filmê tota la scena. La sêra a magnem cun un grop ad fans.
Ungherì
Vènar 6 agòst On the road again. A partem par Budapest, sènza présa, a mëza matèna. E' viaz u s'fa piò lòngh de' dover par colpa d'una deviazion inùtil atravérs l'Austria. A arivem a Budapest vers sêra, e a truvem sóbit da durmì. Siccome a so sèmpar stê me a guidê, a so stràc mort. Quest u n' c'impedes d'andê a zena s'un batël s'e' Danubio, duv che - purtrop - a esagerem. Colpa de' magnê tròp bon.
Sabat 7 agòst Dop clazion, un bël zir par Budapest, tânt par fês un'idea. Int e' dopmezdè a s'arcmetem in strê, direzion sudest. A s'gudem j ultum utânta chilòmetar d'autostrê. Dop u i sarà sôl strê statêli. E' fa un chêld ch'u s'mór, mo l'aria cundiziunêda la s'salva. A pasem l'ultma zitê ungherêsa, Szeged, e finalment a arivem a la frontiera cun la Romania. L'è tot intasê, e u j vô piò d'un'ôra par pasê. Un'êtra ôra a la perdem par fênta par via de' cambi ad fus urêri. L'è têrd int e' dopmezdè quând che finalment a filem atravérs al pianur sbandunêdi dla campagna rumena int e' nordovest de' paés. U n' j vô tânt par arivê a Timisoara, la nöstra destinazion d'incù. A l'hotel Continental a truvem, e a gradem, al stânzi ch'i à prenotê par nó. Sheckley l'è stràc e perplès. E' dis che l'Italia l'era un'êtra roba. Mo u n' s'lamènta, e u n' s'pent d'ësar lè. L'è zà sêra, e u j è sôl e' temp ad magnê quèl s'la teraza-ristorant dl'albêrgh, intânt che dacânt a nó dal balarèini nö tròp vistidi al fa spetàcul par la ripresa in diretta d'una tivù de' pöst. Dnenz a un bon magnê e una bôna bira, e ènca a un bël pô ad balarèini scatenêdi un pô piò in là, ènca l'umor ad Sheckley u s'arpia in prèsa. Int al ôr e ôr pasêdi in machina in st'ultum dè l'à scrèt un ban pëz, e quest e' basta par fêl cuntent. Stê a sêder a scrìvar e guardê l'è quel ch'u j capita ad fê da sèmpar, e in machina cun nó e' pô ènca ciacarê e guardê e' paesag ch'e' cambia.
Romania
Dmenga 8 agòst E' fa un chêld ch'u s'mór a Timisoara. Int la hall dl'albêrgh a incuntrem chi ch'u c'à invidê in Romania. Jonathan Cowie, scienzié scuzês e ènca un òman raffinê e un amig ch'u t'pis una masa, u s'dà e' su chêld benvnù. L'è lò, piò d'j êtar, l'organizadôr dl'event ch'a sem vnu a fê pêrta. Mo i è in tânt ch'i è vnu a e' Continental a saludês. U j è
Jim Walker, vnu cumè Jonathan da l'Inghiltèra. U j è i rumen Silviu Genescu, Antuza Genescu
e Dorin Davideanu. Dop i cumpliment ad prammatica, u s'decid par una visita a e' museo de' pöst dal ca ad campagna, un parch duv ch'i à rifat al ca ad campagna rumeni tradiziunêli. U n' è la fin de' mond, mo l'è sèmpar quèl ad nôv, e l'è però l'ucasion ad fê una spasegêda. U j è un museo d'ste gènar una masa piò grând e interesânt a Bucarest, mo nó a sem a Timisoara. Ch'la è, insòma, un pöst interesânt e piasèvul. Int e' dopmezdè u j è la cerimonia d'inaugurazion dla convention. Me a n' supòrt nisuna cerimonia d'nisun gènar, e alóra a n' v'vöi cunvèncar ch'la sia par me una fònt ad giöia. Dsem ch'a m'anoi manch che d'solit. Fôrsi sti cerimonì agli è un mêl necesêri. La sêra, cumè d'solit, a magnem a la rumena. Cumè cusèna la n' è mêl, mo la n' cambia mai e dop un pêr d'magnêdi t'é zà pruvê tot.
 |
 |
 |
| Sheckley e Quaglia sponsorizé i firma autògraf |
 |
Lunedè 9 agòst i s'porta a vdé un museo. A n' sem tip da museo, né Sheckley né e' sotoscrèt, e alóra prèst a scapem, e a s'arfugem da MacDonalds, un pöst che niseun di dù u frequenta d'solit. Mo aquè e' fa un chêld dl'inféran, e MacDonalds l'à l'aria cundiziunêda. E pu u n' è òbligh magnê. Par quest u j è al bivandi. Da lè a pôch la troupe d'una rêt televisiva nazionêla la s'ven a intervistê. Int e' dopmezdè, un pô ad tregua int l'albêrgh. L'hotel Continental l'è grând e acuglient, l'à una dezèna ad piân e u n' gn'è ón interesânt: e' sgònd. Dè dop dè a dventem tot difati sensèbil a quel ch'a cmenzem a ciamê e' Mistero del Secondo Piano: a ognun ad nó, difati, int e' su va e ven cun l'ascensor u j capita spës ad truvês in cumpagnì ad burdëli maravigiösi che dì vistidi l'è tròp, e tot sti burdëli al j entra o al j esc da l'ascensor a e' sgònd piân. Sti bëli burdëli al spares pu chissà duv cun la stesa svultëza cun cui al cumpares. Esplorazion fati bën a e' sgònd piân a n' s'aiuta a capì e' mistero. E a nó u s'arvanza sôl al nöstri ipotesi.
 |
 |
 |
| I giurnêl ad Timisoara de' dè dop |
 |
Martedè 10 agòst a n' so incôra bën dsdê che a m'artrov cun Sheckley, Max, Mario, Ada, Jonathan e tot cj êtar a la librarì BIC-ALL par la presentazion dl'edizion rumena de' lìbar ad Sheckley
Scambio Mentale (Transfer Mental) e de' mi Pane, burro e paradossina (Pâine, unt si paradoxina), tot e' dù publiché da Nemira. U j è ènca un sponsor ad mëz, la bira Kaiser, e a Sheckley e a me u s'tòca mètas al magliet rosi cun e' marchi dla bira, e sóratot u s'tòca bé una masa ad bira, l'ideêl apena dsdé. U j è ènca e' vicesindich ad Timisoara, ch'u s'lancia int un discurs lòngh in rumen. Quând ch'u m'tòca a me a degh par un pô dal cös a vânvara cumè ch'u m'capita ormai da un ban pëz, savènd bën che qualsiasi roba ch'a dega tânt tot i s'la smengarà in prèsa, sôl che sta vôlta a m'sbaj. Int i dè dop a m'artruvarò difati, cun un zért ingrispiment, i mi discurs sènza cô né cova ripurté par bën int un ban pô d'artécul int tot i giurnêl de' pöst, cumè s'i vlès pröpi dì quèl. Sheckley, piò furb, e' scêj una linea piò sobria. U j è relativament un ban pô ad pòblic, parchè int i dè prèma i giurnêl de' pöst i à gunfiê l'event, cun dagli artécul ilustré ènca cun dal imagin scarghêdi sènza ch'a e' savès da i mi sit int Internet. E' diretôr marketing dla Nemira, Laurentiu Teohar, l'à lavurê bën, s'capès. Dop i discurs un asedi tradiziunêl par l'autògraf s'al cópi di lìbar u n' s'dà gnânca fastidi, e a la fin ènca ste bël mument u s'smôrza. E al ôr qualunque al cmenza d'nôv a pasê int e' chêld ch'u s'mór ad Timisoara e nó a turnem a s'arfugê cvalch minùt da MacDonalds. A al zinch de' dopmezdè a sintem una cunfarènza ad Jonathan Cowie s'l'eclissi ch'u j sarà dmân.
Eclissi
 |
 |
 |
| Sheckley e' guêrda l'eclissi |
 |
Mercoldè 11 Agòst l'è e' dè dl'eclissi totêla ad sól. E u cmenza mêl ch'u n' s'pô. E' zil l'è tot cvért e e' piôv. Pu e' smett, mo e' zil u n' migliora. Finalment e' fa fred. Sheckley e' dis ch'u j pis piò un pô ad fresch che l'eclissi. Tutavì a Decid listès ad n' rimanéi mêl. L'è sèmpar interesânt vdé e' dè ch'e' dventa nöt. Intânt l'eclissi parziêla la cmenza, acsè almânch e' dis la nöstra tabelina. Nó a n' pusem vdé gnint, a pêrt al cös normêli. Sènonchè al nuvul pianin al s'fa piò fini, e tot int un culp cvalcadun e' vèd un quèl ad sól ch'e' scapa fura da e' zil dispetös. Sóbit l'è una gran corsa a tô j uciêlin da eclissi. E' zil u s'avr incôra un pô e ogni tânt e' sól u s'fa vdé tot par cvalch minùt. E acsè a s'sem fat la nöstra eclissi parziêla, a s'dsem. A s'avsinem a e' mument dla totalitê, e e' zil u s'avr sèmpar d'piò. Fôrsi a avem fortuna. L'incògnita de' temp la fa tot fôrsi una masa piò emozionânt d'cum ch'e' sarìa stê cun un temp perfèt. A sem int e' nöst albêrgh e a muntem s'la teraza. Da lè u s'vèd tota la zitê. Ogni tânt e' vèn zo una scargnêda d'aqua, tânt par gradì. S'e' tèt, una tivù de' pöst la intervista Sheckley e me in diretta e cun la scusa dl'eclissi a fasem la pubblicitê a i nöst lìbar. U mânca ormai un pugn ad minùt a e' mument fatêl, e e' zil l'è turnê a prumètar bën. Una corsa zo int la camara par seguì in televisiôn l'andament dl'eclissi totêla atravérs l'Europa. Tivù via satèlit, prugrâm inglês, francês e tedesch, ch'i fa vdé e i cumenta ón dri a cl'êtar l'eclissi totêla ch'l'ariva e ch'la va. Sènza aspitêl, l'è emozionânt, nonostânt al stupidêdi ch'i telecronesta i n' riès a fê d'manch ad dì. Quând che l'eclissi totêla la lasa ènca l'Austria, l'è e' mument ad precipitês d'nôv s'e' tèt. U j è una lòta par l'ascensor, mo a vinzem nó. E' sól u s'vèd incôra, atravérs un strêd fin ad nuvul ch'e' s'möv in prèsa, mo u n' gn'è sôl una fêlza znina. Al nuvul al fa da filtar e u s'pô parfin guardê a ôc nud sènza pinsir. A l'orizont, intânt, e' zil u s'è fat nirissum vers ovest. L'è l'eclissi totêla ch'la ven avânti. Pu una nuvla brota la va a finì duv ch'la n' duvrèb e e' sól e' spares, eclissê dl tot da la nuvla un mumint prèma che da la lôna. E pu tot int un culp l'è tot scur, e e' rèsta acsè par un pô. A vdem cla nuvla mêl vnuda ch'la s'möv, mo nö in prèsa abastânza. La zitê l'è int e' scur, e' zil d'sóra ad nó l'è scur, mo l'orizont l'è luminosissum a 360 grêd. Un panurama mai vest. Pu la linea dla lus la s'avsèna, cumè prèma l'era vnu e' scur. A guêrd in êlt e la nuvla la s'n'è quasi andêda a sent un bôat ad vòs ch'e' ven da un'êtra pêrta dla zitê. Là zo la nuvla la s'n'è zà andêda e par un mumint u s'è vest l'eclissi totêla. A guêrd in bas: incôra scur. A guêrd d'nôv in êlt: e tot int un culp u m'ciapa un rag ad sól ch'u t'inurbès e par un mumint a intravèd un pëz ad diamond ring, l'imagin ch'la segna la fin dl'eclissi totêla. A guêrd in bas e la zitê l'è iluminêda. A s'sem pers l'eclissi totêla par dù o tri sgònd o, s'a preferì, par dusent o trizent mètar. Mo fôrsi a n' avrèsum avù tot agli emozion ch'a javem avù se al cös al fos andêdi cumè ch'a avrèsum vlu. Da cl mument in là, insòma, e' sól sfutènt u n' à piò smess ad lusì.
Zobia 12 agòst l'è e' nöst ultum dè a Timisoara. Int e' dopmezdè Sheckley, Tony Chester e me a sem impegné a ciacarê int una tèvla tônda. La sêra, zena ad gala int un ristorant tnu quasi tot par nó. U s'pê un bël pöst, a s'mitem cômod e par un pô tot e' va bën. Mo stra la prèma purtêda e la sgònda u pasa dö ôr d'atesa, a dì la verità tròp par n' fês vnì e' nervos. Dop zena u j è i cumpliment ad rit ch'i va dri a la fin d'tot al zen ad gala, e Sheckley, furb, e' s'artira int l'albêrgh. A i andarem dri dop pôch ènca nó. Dmân la sarà una zurnêda dura.
 |
 |
 |
| Ogni mumint l'è bon par bitê zo dagli apunt |
 |
Vènar 13 agòst l'è una zurnêda dura. A al öt e mëz dla matèna a javem carghê tot e tot in machina e a partem, vers e' sudest de' paés. U n' gn'è quasi autostrê in Romania, e al strê statêli, ènca s'al è stêdi asfaltêdi da pôch, agli n' è un scherz, sóratot s'u t'tòca viazê par setzent chilòmetar d'fila. Ènca parchè travarsènd e' paés t'si s'la stesa rota d'tot e' trafich cumerciêl dla nazion e nö sôl: e quest e' vô dì fil ad TIR rumen, bulgar, turch, mo ènca italian e tedesch. E tot quest cundì da dal trebbiatrici che ogni tânt al salta fura da dri a una curva e al ciapa una corsia e mëza, mièra ad carèt ad cuntadèin tirê da i cavàl, caruvân d'zìngar ch'i s'sposta ènca lôr cun i su carèt e i su cavàl, branch ad pigur ch'ogni tânt i taja la strê cumè s'gnint fos, vachi da par lôr e nö da par lôr e cân randag suicida. A interval regulêr, difati, i bórd dal strê dla Romania i è pin ad caràvar ad cân ch'i à travarsê la strê int e' mument sbajê. U j è milion ad cân randag, in Romania, ch'i cres sènza fermês, e da quel ch'i m'à spieghê la comunitê europea la j à intimê a i rumen ad n' amazêi par n' vlê i su dirèt bestiêl, o quèl ad simil. A n' so s'l'è vera mo e' sarìa tipich, e intânt i cân randag i cres, i fa di branch vëri ch'ogni tânt, sgònd cvalcadun, i s'magna ènca cvalch burdèl. E intânt me a guid. A n'ò par tot e' dè. Diversament da guidê in autostrê, aquè t'an t'pu distrê gnânca un mumint. Guai a tô j ôc da la strê! An fa, quând ch'a so vnu da sti pêrt insèn a Silvio Sosio e Luigi Pachì, par zarchê ad calmêr e' su shock par al strê rumeni (a cl temp agli era una masa manch asfaltêdi che adës) a j ò dét che al strê in Romania agli è una metàfora dla vita: t'an sé mai quel ch'e' vnirà fra un mumint, e quând che manch t'al aspèt t'at imbat int cvalch imprevèst. A entrem int i Carpazi e a afruntem la travarsêda dla Transilvania int un clima lugubar e afascinânt. E' temp l'è brot, al nuvul agli è basi e e' cmenza a piòvar a dirotto. A s'ralegrem par l'atmosfera ch'la và bën, mo l'alegrì la dura pôch. La strê la và dri a un fiòm e a la nöstra dèstra u j è sôl dal parêd ad sas. Da cui, par via dla piôva, u n' è sôl aqua quel ch'e' vèn zo. Sèmpar piò spës a s'imbatem int una frana ch'la tapa una pêrta dla nöstra carezêda. L'è un bël curàg. Fintânt che la strê l'è tot int un culp blucêda da una frana ch'la vèn zo pröpi in cl mument dnenz a nó. Al machin agli è tot lè fermi ch'agli aspèta. La strê la n' è incôra blucêda dl tot, mo di sas grus e di sasulin i ròtula atravérs la strê e i fa e' pasàg pôch atraènt. Ogni tânt, cvalca machina la tenta l'azardo e la pasa, zarchènd ad schivê i sas zà s'la strê e cvi, piò pericolös, ch'i ariva. A m'port s'la corsia ad sorpas e a m'avsèn. A m'ferm. A pruvem a pasê o a aspitem incôra? Fra pôch u purèb ësar tròp têrd, la strê la purèb tapês dl tot. In cl mument un sas grös e' fila d'una velocitê mata atravérs la strê dnenz a nó. L'è una roulette rösa. Par fortuna, la frana adës la s'vèd benissum int tot e' su andament. E' sta vnènd zo d'tot int la ripa a la nöstra dèstra, mo u s'vèd bën, e par la piò pêrta i è sasulin znin. E quest e' vô dì che cun un pô d'atenzion u s'pô pasê sènza tròp rèsc, andènd d'acôrd cun i temp dla frana acsè da schivê i rêr sas grus. A schèz e' pedêl de' acelerador e a impiz e' turbo de' mutor e dl'adrenalina. Intânt ch'a pas atravérs la frana una röda la fa schizê un sas contra e' telaio ad sota dla machina e e' rumor fort dl'impat u n' s'ralegra. Un mumint dop a fil a una velocitê mai vèsta stra al machin che da cl'êtra pêrta dla frana agli aspèta, e cvalcadun, par furtuna, u m'e' fa nutê. Quând che e' turbo dl'adrenalina u s'mett in möt, e' pô suzèdar che un e' s'smènga ad smurzêl. Nö sènza fadiga a l'smorz e a ralènt. A m'sent un pô in colpa cun Sheckley par avêl purtê fena aquè e alóra a j degh: Almânch u n' è un viaz nuios. Sheckley l'arspònd cun l'aria cunvinta: Nö, u n' è nuios. Stra tot u s'pê e' manch preocupê. E' s'armett sóbit a scrìvar. A sbirc int e' su taquin e a lez We stopped at one point and watched a flow of small pubbles trickle out of a hole in the mountainside and onto the road. It was like the Earth was bleeding. Par lò i fat i è sóratot l'ucasion par avé quèl da scrìvar. I Carpazi i è quasi par finì. E' cuntinua a diluviê. Sheckley e' cuntinua a scrìvar. A j rob un êtar pugn ad fras: The flooding grew worse as we continued. A deserted car park had become a lake, empty except for one white plasticchair floating in it. Occasionally we passed a peasant, standing at the side of the road, huddled under a plastic raincoat, waiting for God knows what. But for the most part we encountered no one. Quând ch'a cridem d'avé pasê e' pez, a s'imbatem int un ingòrg. U j è un bus, s'la strê, ch'u s'è impinì d'aqua. I camion i pasa, mo una machina ch'la prova a fê listès la va sota e la rèsta lè. D'aquè u n' s'pasa. Par fortuna u j è una strê alternativa, mo a avem da turnê indrì cvalch chilòmetar. A fëz invarsion e, rifasènd a l'arvèrs la strê apena fata, a m'imbat prèst int un sas grös in mëz a la strê. Pôch prèma u n' gn'era. L'è vnu zo pôch dop e' nöst prém pasàg da lè e pôch prèma de' sgònd. A sem furtuné o almânch a n' sem sfurtuné. Mëz'ôra dop a javem pasê i Carpazi sènza dân e l'è d'nôv pianura, e quest u n' s'dispiês pröpi, ènca s'l'atmosfera la n' è interesânta listès. A arivem a Bucarest vers al öt ad sêra, mo questa la n' è la nöstra destinazion d'incù. A pinsem s'fermês o nö, e pu tot d'acôrd a decidem d'andê avânti. E' vèn e' scur, e sôl alóra a m'arcôrd parchè a n'ò mai vlu viazê atravérs la Romania d'nöt. J êtar i l'scôr par la prèma vôlta. Int e' scur, al lus abagliânti dla fila ad TIR s'la corsia ad cuntra al t'inurbès, e quest u n' è pröpi e' mas-cim in Romania, duv che al strê al t'fa una sorpresa dri a cl'êtra, duv che i carèt tirê da i cavàl i n' à lus ad dri e duv ch'i pedón d'ucasion i camina quasi in mëz a la strê, fidènds fôrsi che al machin al i scansa, o piò fazil sènza pinsêj gnânca. L'è la pêrta manch divertènta de' viaz. A arivem a Cernavoda stra al dis e al öndg ad sêra. Lè u j è una zentrêl nucleêr, mo a n' pusem lamintês tròp. A l'avem fata nó italian (o mej, nó genvês) insèn a i canadês. I s'fa stê int i apartament grând e ad lus' ch'i avéva fat una vôlta par e' parsunêl ucidentêl dla zentrêl. A sem stràc, mo ènca abastânza cuntent. Par quèndg ôr a sem stê in carezêda, pasènd sèmpar machin, TIR e carèt, stènd atent a n' andê a sbàtar ad frônt contra i TIR che s'la corsia ad sorpas t'at trov dnenz ogni mument, e a sem sopravvissù.
 |
 |
 |
| S'la barca par Atlatikron |
 |
Sabat 14 agòst l'è una zurnêda nuvlösa. A trentazinch chilòmetar da Cernavoda u j è un'isulèta s'e' Danubio ch'i la cióma Atlantykron, dacânt a e' paés ad Capidava. L'è lè ch'a andem. Un pöst selvàdg e fura da e' mond d'tot i dè duv che ogni an i rumen i organiza una stmâna ad manifestazion ch'agli à da fê cun la fantascienza. Un batël znin u s'porta là zo. Almânch, a zerch ad fê curàg a Sheckley, aquè niseun u t'purtarà a fê un zir turistich. Sheckley l'arspònd: Questa l'è una bôna nutizia. Mo a s'sbajem. Apena sbarché s'l'isulèta, Sorin Repanovici, l'organizadôr dla manifestazion, u s'acôj e u s'porta a fê un zir turistich par l'isulèta, fasèndas vdé al tèndi e chi ch'u j sta dentar. Pu u s'bev e u s'magna quèl s'e' pont de' batël ormegê a l'isula, e dop u j è un incöntar-dibàtit cun chi ch'l'è s'l'isula. Int e' dopmezdè, Sheckley e' prefères turnê int e' su apartamentin a Cernavoda parchè e' vô scrìvar un racont e par quest u j vô ësar da par lò. La sêra u l'avrà zà finì e e' sarà tânt cuntent.
Dmenga 15 agòst a turnem a Bucarest. L'è e' prém pass vers ca. A Bucarest a javem a dispusizion un pêr d'apartament duv ch'a pusem stê. A andem a magnê da Sydney, un pub australian una masa in duv ch'u s'magna ènca dla roba messicana. E l'è pröpi lè, a sêder da Sydney dnenz a un bon piât esotic, che Sheckley e' dis che la Romania la j cmenza a piasé, e ch'e' purèb imaginês ad stê lè. Int e' dopmezdè, Sheckley e' vô andê avânti a scrìvar. A j lâs a dispusizion e' mi laptop e nóêtar a s'n'andem a fê dù zir. La sêra l'avrà scrèt un êtar racont.
 |
 |
 |
| A la TV rumena intervisté da e' ministar |
 |
Lunedè 16 agòst l'è una zurnêda una masa fisa, cminzêda cun un bël taramòt. E' sisma ch'l'à distrut la Turchia u s'è fat sintì ènca aquè. Max e Ada, j unich ad nó dsdé a cl'ôra, i dis che tot l'à balê par un bël pô, intânt che i lampadêri i ciundléva par bën d'aquè e d'ad là. Me a durmiva e a n' m'so acôrt ad gnint. In matinêda a sem invidé a la televisiôn rumena da Alexandru Mironov, ex ministar dlo sport e dla zuventò e ènca espert ad fantascienza e cunduttor d'una trasmission televisiva ad fantascienza s'la prèma rêt nazionêla, ch'l'à fat una trasmission ad prima tota d'intorna a nó. Sheckley l'è tânt cuntent, e me a n' so da manch. L'è stêda una bëla trasmission, cun dal dmând e di discurs inteligent e fura da ogni banalitê d'tot i dè. A mezdè a s'arfugem incôra da Sydney. E int e' dopmezdè u j è in bal una sgònda partecipazion a una trasmission televisiva. Sta vôlta a sem ospit int e' salòt ad
Mihaela Muraru Mandrea. La sêra invezi a sem invidé a zena da Florin Munteanu, scienzié rumen brilantissum e e' mi grandissum amig. L'è una gran bëla seràda, e qualsiasi descrizion la sarìa tròp poca. Sheckley l'è entusiasta. What a fantastico man! e' cumentarà dop, arpinsènd a Florin.
Martedè 17 agòst a andem da Nemira, la nöstra ca editrice. I s'acôj bën Valentin Nicolau, l'editor, e Vlad Popescu, e' su vice. AnticipatiaGnint discurs ad prammatica. Invezi, un bël pô ad temp insèn a ciacarê fura da i rit d'tot i dè. U j è ènca e' temp par un salt int la redazion ad Anticipatia, la rivesta ad SF rumena ch'la dura da piò temp. Pu e' solit spuntin da Sydney. Int e' dopmezdè, Sheckley e' s'artira d'nôv a scrìvar. A andem tot a durmì prèst. Dmân la sarà una zurnêda dura.
Ritöran
Mercoldè 18 agòst a partem d'nôv par l'Italia. A al zinch e mëza dla matèna. Svèja a al quatar e mëza. L'è e' sistema mej par sparagnês cvalch ôra ad trafich fis e fê e' viaz piò curt. Difati a viazem in prèsa e sènza tròp pinsir. Partènd acsè prèst, a anticipem i grând fluss ad trafich e int e' prém dopmezdè a sem zà a la frontiera ad Arad. A mëz dopmezdè a arivem a Budapest, duv ch'a vlem fermês. Truvê in prèsa un pöst par Sheckley, a s'mitem cvalch ôra par sistemês ènca nóêtar. Budapest l'è pina zèpa, mo a la fin a truvem quèl. L'è e' mument de' viaz ch'a so piò stràc. A jò sèmpar guidê sôl me, e la fadiga la s'è andêda a mucê. Dì ch'a so distrut l'è un diminutiv. A turnem a zena s'e' batël duv ch'a javem magnê a l'andêda, e ch'u s'era piasù tânt. L'è pasê un mês da quând che Sheckley l'è cun nó, e adës lò e' magna in media e' dòp ad quând ch'l'era arivê. Sta sêra e' magna piò de' quadrupal. E' dirà pôch dop: A m'arcurdarò sta zena par un ban pëz. Ènca nó.
Zobia 19 agòst l'è e' dè ch'a turnem in Italia. A travarsem l'Austria, duv che in autostrê u s'scapa ènca una bëla multa par eccesso ad velocitê, e vers sêra a arivem a l'aeropôrt ad Venezia, duv che tot int un culp u n' s'trova piò e' biglièt ad ritöran ad Sheckley. L'è un'urèta ad suspense, pu e' biglièt e' salta fura. A truvem una lucânda davsen e acsè a risolvem ènca e' prublema d'st'ultma nöt. Par festegê e' ritöran in Italia a s'magnem un pêr ad pizz ad prima par tësta.
Vènar 20 agòst Sheckley e' ciapa l'aeroplan che passènd da Londra e Seattle u l'purtarà a ca a Portland, Oregon, duv che la su moj Gail la l'aspèta. Int la strê de' ritöran a Genova u j è par un pô e' silenzi int la machina. E l'è Max che a un zért pont e' dis: U n' gn'è piò. E' ribat Mario: U n' gn'è mai stê. U m'tòca a me: U j è stê, u j è stê, u n' era un'alucinazion. E s'l'era, l'è però un'alucinazion mej ad cl'êtri.
Par la verità fôrsi a n' l'ò dét pröpi acsè. Mo a chi ch'u j interesa i particulêr, adës che Sheckley u n' è piò int sta storia?
Fura da e' temp u j è incôra e' temp par una cunsiderazion finêla: quel ch'a javì let fena adës l'è sôl la crunulugì ad quel ch'l'è suzèst. Gnint ad pröpi impurtânt l'è sêr dentar int quel ch'l'è scrèt aquè. Quel ch'l'impôrta dabón u n' s'pô cuntê acsè. Fôrsi u n' s'pô cuntê par gnint. U s'pô sôl arcurdê, da chi ch'u l'à vissù. E fôrsi gnânca quest l'è vera. Quel ch'l'impôrta dabón u s'pô sôl vìvar intânt ch'u s'vìv. Tot e' rest agli è sôl rapresentazion trasparenti. Opura, s'a preferì, rapresentazion ad rapresentazion. Ciuè quèl che cun la realtê e' finès par avé pôch da fê. Cuntintèmas e cuntintèv. L'impurtânt l'è capì e' manch stort pusèbil.
Un album ad fotografì piò cumplet de' viaz l'è a dispusizion clichènd aquè. (http://www.fantascienza.com/quaglia/sheckley/1999/)
|