te rendi conto che qualunque cosa, ciapà in sé, la ga senso soło limitatamente? No ghe xe cosa che no la sia profondamente parte de qualche cos'altro. Ciapemo na formìgoła. Da tute le parti ti la vardi la xe sensa dubio na formìgoła. Gnente de diverso da na formìgoła. Dovunque ti la meti, eła la svolzarà senpre le so funsion de formìgoła. Epuro, se no te lìmiti a na osservasion superfisial, na formìgoła no la xe soło na formìgoła, ma anca na picolìsima parte de un formigaro. Se ti ciapi la formìgoła isolà, e ti la meti in na càmera voda, la farà queło che faria qualunque formìgoła sarà in na càmera voda. Ma se ti ciapi la formìgoła, e ti la meti in un formigaro, la farà qualcosa de diverso da asè de le altre formìgołe. Diventando parte de un formigaro, che la voja o no la formìgoła la asume un so roło e na so funsion, che le trascende le so primarie atività de formìgoła individual, e che la la farà conportar in un modo ùtile a l'economia del formigaro pì che a queła de sé. La formìgoła no la esitarà a sacrificar la so stesa vita, se questo el sarà de utilità a'l formigaro. "Eroismo", in sto caso, el xe un concèto fuorviante. Queło che su la formìgoła inte'l formigaro el àgise, sénplisemente, el xe la potente forsa de na nesesità che la trascende le nesesità de la formìgoła sìngola: la superior nesesità del formigaro.
Ebe, tuto sto genere de cose el sucede anca con i èseri umani.
Par quanto se sforsemo de èser egoisti, le leji no scrite del formigaro le sovrasta la nostra esistensa e le la influensa par tuta la nostra vita.
Ma com'el xe fato el formigaro uman? Ghe ne xe uno soło? Ghe ne xe pì de uno?
Par rispónder a sta domanda gavemo da imaginarse de véder el nostro formigaro da la pì granda distansa posìbile. Cussì montemo su un space shuttle mental e metémose in òrbita, atorno a la tera, e vardemo sta maestosa bała azura che sensa presa la gira e la gira... la xe tropo maestosa, lontanémose un poco... Eco, deso la xe pì pìcola e sensa pretese. Ebe, écone qua! Semo estraterestri che i sta vardando sta bałeta sperdù inte'l cosmo ricoverta de un putiferio de bestiołine. Prima descoverta: el Gran Formigaro Terestre el conprende tute le bestie del mondo, e la pì parte de indivìdui (a ocio e crose pì del 99%, credo, se se ecetua i bàteri) i xe inseti. A parte l'esenpio de le formìgołe, dei inseti no ne frega gnente e cussì ciapemo in considerasion soło i èseri umani. Fasendo finta de no véder tuti i altri animali (e piante) che ghe xe, eco che da lontanìsimo, con ocio da estraterestre, vedemo sta rotante bała azura su la quale i se àgita, sensa visìbile senso, sinque miliardi abondanti de puntini, ognun dei quali asè convinto de èser na persona.
Eco cussì el Gran Formigaro Uman.
Avisinémose drasticamente, volando atorno a'l globo a soli diesemila metri de quota. Eco che'l Gran Formigaro Uman el se framenta in mijara de subformigari, le sità. Se avisinemo ancora e sorvolemo na sità a volo de elicòtero. El formigaro no'l se framenta pì in modo rilevante. Le sità le xe donca i veri formigari inte i quali la pì parte de noaltri la vive. La domanda la xe: quanto el àgise el Formigaro del quale semo parte su queło che ciamemo el nostro lìbero arbìtrio? In qual mesura semo s'ciavi de le superiori esizense del nostro Formigaro? Come el àgise el Formigaro verso de noaltri? Ma... el àgise? E che diferensa ghe xe tra un Formigaro e un altro (ovaro fra do diversi nùclei urbani?), par queło che riguarda la asion de lu verso de noaltri?
Introdusemo na nosion de la quale poco e senpre a sproposito se parla. Par che'l sia stà dimostrà che la telepatia la esiste. No lo savévi? No ve lassè però portar in ingano da'l pì difuso preconseto che'l circoła su la telepatia, e ovaro che eła la sia un fenòmeno del quale noaltri se posa o se àbia da incorzerse o adiritura che se la posa esersitar o esperir volontariamente. Tute putanade, metévele ben in testa. La telepatia la va intesa come "comunicasion a distansa tra do o pì sarvèli", ricordàndose che par "comunicasion" no intendemo che se àbia par forsa da instaurar discorsi, ma che sénplisemente ghe sia un fluso, par quanto pìcolo, de informasion. Ebe, par che'l sia posìbile mesurar, in un sarvèło, picole modificasion de la atività elètrica quando uno o pì altri indivìdui umani (proveduti de sarvèło) i se trova visin. Questo el significaria che'l sarvèło uman "el se incorze" se ghe xe un altro sarvèło uman là visin, anca se "noaltri", cosientemente, no se incorzemo de gnente. Questo el significaria che ghe xe un scanbio de informasion, anca se asè pìcolo, tra i do sarvèli, ovaro un vìncoło telepàtico. El fato che no se sia ancora riusìo a spiegar come tècnicamente el avegnaria tuto questo, no'l anula el fato che "tuto questo" el avegnaria. No'l xe del tuto ilècito ipotizar che sti invisìbili nesi tra sarvèli i posa èser anca abastansa intensi e agir anca a granda distansa. El xe asè de frequente el caso de persone che le "sente", anca a granda distansa, la morte de caro conzonto. El sovranatural no'l ghe trase (parché par definision el sovranatural no'l esiste, e soło un siòco o un ignorante el pol crédar diferentemente). Ghe trase eventualmente soło la comunicasion a distansa tra sarvèli. La telepatia. Che usualmente la restaria a soto de la soja de la nostra cosiensa, fora in ecesionali casi, inte i quali, con gran stupor, qualcun el se ne incorze.
Sicome ogni formigaro el ga caraterìstiche e esizense che le trascende la mera soma de le caraterìstiche e esizense de le formìgołe che i lo conpone, no me par azardà suponer che anca ogni Formigaro Uman (ogni sità) el àbia da gaver caraterìstiche e esizense che le àbia da trascénder la mera soma de le caraterìstiche e esizense de le formìgołe umane (e sitadini) che i lo conpone.
El fato el xe che intanto che trovemo asè fàsile descrìver sti fenòmeni analizando un formigaro de formìgołe (o in genere qualunque organismo conpleso, el cui fonsionamento global el trascende la soma dei fonsionamenti dei sub-organismi che i lo conpone), fasemo fadiga a aplicar i stesi validìsimi rasonamenti a'l Formigaro Uman, ovaro queł sistema conpleso inte'l quale semo noaltri a èser i sub-organismi che i lo conpone.
Tropo conplicà?
Tentemo alora de saltar a piè pari tute le pur interesantìsime disertasion contestuali, degne de pì ampia sede, e consentrémose su'l nòsoło de queło de cui deso se intendeva disquisir, dando par acquisìe le presunte premese sientìfiche de le quali el xe stà apena dà soło un fuzévole e mìnimal acèno.
Le sità le xe organismi vivi, che le sta a noaltri sitadini come l'èser uman el sta a le cèłule che i lo conpone. Ogni sità la xe diversa da le altre, come ognun de noaltri el xe diverso dai altri èseri umani. Ghe xe asè funsion in comune. Ghe xe diversità anca clamorose. Serti òmeni i xe atlètici e in perfeta salute, altri obesi e malatici. Serte sità le xe piene de vita e in continua cresita, altre le xe malà e destinà a roina.
La sità la xe formà da la mutua interasion (anca telepàtica?) de tuti i sarvèli umani che in eła i se trova, ma come ogni organismo conpleso, la sità la xe pì de la soma de lori.
Ogni sità la ga le so esizense. I sitadini i vien da la sità doparà par asòlver a le so esizense. Sicome le sità le xe diverse una da l'altra, noaltri se se sente diferentemente a seconda che se sia inte l'una o inte l'altra.
Ogni sità la ga come na aura psìchica pròpria, de la quale se trase a far parte trasendo in sità. Se ne esse, evidentemente, ndàndone fora.
I problemi de cui na sità speso la te càrica no i xe toi. I xe de la sità. Se ti scanpi, se ti abandoni queła urbe, speso i problemi no i te seguita, parché no i gera toi. El staco el pol èser anca clamoroso. Su l'orlo del suisidio in na serta sità, ti te salvi e ti rinasi ndando in un altro luogo. Ti rinunsi a èser l'ingranajo che a la sità la gera ùtile che ti fusi, logoràndote e fasendo scenpio de ti, par ndar in altri canti a èser un ingranajo pì cònsono a quełe che ti reconosi èser le to pecularità. Par un'altra persona el sarà invese el contrario. Content de èser l'ingranajo che a la sità ghe convien che ti sii, ti stè ben indove ti stè, e ti stè mal apena ti te ne va.
Ogni sità la ga na so identità, che no la vive inte i so edifisi e inte le mere face dei so abitanti, ma inte la atmosfera prodota da la mutua interasion de tuto queło che la sità la abita, cussì in prevalensa dei èseri cussì diti umani.
El steso discorso e le stese dinàmiche i vale ovviamente par tuti i tipi de ragrupamento umani. Da le famije a le nasion ai ragrupamenti de nasion. Ma de questo parlaremo n'altra volta, opur no.
Tuto sto discorso el gera un modo asè sofisticà par rivar a la diciarasion arbitraria (ma no tropo) che intanto che Praga, par esenpio, la xe na sità evidentemente belìsima indove se sta in media ben, Zènova la xe na sità evidentemente moribonda indove se sta in media mal.
Tuto questo el xe vero, o forse no, ma el sonava ben, opur no, e cussì lo go dito o mejo lo go scrito.

Roberto Quaglia