pro sos ispetadores tuos prus minoreddos, oje ti conto una fàula, sa fàula de sa Criadura Malassortada.

B'aiat una borta una criadura malassortada, chi abbaidaiat semper sa televisione. Su manzanu andaiat a iscola, comente totu sas criaduras de s'edade sua, ma su merie si piatzaiat semper in antis a sa televisione e no si moviat prus, fintzas a cando fiat s'ora de andare a letu.
Dadu chi abbaidaiat semper sa televisione, custa criadura malassortada no teniat amigos, foras cuddos chi fiant in sa televisione. Issa fiat cumbinta de tènnere tantos amigos, proite sa televisione fiat tota prena de simpàticas persones chi pariant pròpiu amigos suos. B'aiat tantos tantos cartones, e fiant totu amigos suos. Disgratziadamente però sa criadura malassortada si sentiat su matessi meda sola, fintzas si teniat totu cuddos istranos amigos in sa televisione. Custa fiat sa prima de sas malas sortes suas.
A iscola sas àteras criaduras li contaiant chi su die in antis aiant giogadu totu su merie. E sa criadura malassortada rispondiat chi issa no aiat giogadu, ma chi aiat abbaidadu sos amigos suos in sa televisione a giogare pro issa. Cando sas criaduras no malassortadas andaiant sa domìniga a merie in bicicleta, sa criadura malassortada abbaidaiat imbetzes carchi figura chi andaiat in bicicleta in sa televisione.
Sa cumpàngia de bancu sua li naraiat semper cantu si divertiat a giogare cun sas pipias noas suas. Cussa criadura malassortada no si divertiat a giogare cun sas pipias noas suas, proite no teniat tempus. Passaiat difatis totu su tempus suo a abbaidare sas criaduras in sa televisione a giogare cun sas pipias noas issoro.
Passesint sos annos, e sa criadura malassortada creschiat, ma abbarraiat semper una criadura, fintzas si crèschida, e semper malassortada. Sas àteras criaduras si regordaiant de cando fiant istadas prus minoreddas, e nde faeddaiant intre issas. Sa criadura malassortada no resessiat a si regordare de cando fiat istada prus minoredda, proite si regordaiat isceti de cando fiant istados prus minoreddos totu sos amigos suos in sa televisione. Cando a iscola contaiat carchi cosa a sas àteras criaduras no malassortadas, podiat semper contare isceti cussu chi aiat bidu in sa televisione, proite in sa vida sua no aiat mai bidu àteru. "Ti piaghet a passillare in su buscu?" li pediat ogne tantu unu cumpàngiu.
E sa criadura malassortada rispondiat: "A su Puffu Mannu li piaghet meda a passillare in su buscu". Poi aciungiat "A Cappuccetto Rosso fintzas, ma depet istare atenta a su Lupu." Ma issa no bi fiat mai istada in su buscu.
Fintzas a Nadale, sa criadura malassortada fiat malassortada, proite sas àteras criaduras contaiant de sos bellos regalos chi aiant retzidu dae Babbu Nadale chi fiat intradu de cua in sas domos issoro, e issa imbetzes si regordaiat isceti de sos bellos regalos chi sas criaduras in sa televisione aiant retzidu dae Babbu Nadale chi fiat intradu no meda de cua in sa Televisione.
Passesint àteros annos, e sa criadura malassortada fiat semper una criadura, fintzas si semper prus crèschida, e semper prus malassortada.
No si regordaiat difatis nudda, de totu sos annos chi fiant passados, ma si regordaiat isceti cussu chi aiat bidu in televisione. No si regordaiat mancu prus comente fiant fatos sos genitores suos, proite no apariant mai in televisione e tando issa no los abbaidaiat, e tando a pustis de unu pagu fintzas issos aiant acabadu de abbaidare a issa.
"Pòbera me!" si at naradu unu die sa criadura malassortada "No mi regordo prus mancu comente est fata mamma mea!"
At proadu tando a no abbaidare sa televisione pro bìdere sa mamma sua, ma no bi resessit. In dogni parte abbaidaiat, bidiat isceti sa televisione. Si fiat abituada a l'abbaidare gasi meda chi oramai no bidiat prus nudda àteru. Fintzas a iscola, totu sas cumpàngias suas iscumparfesint in antis a sos ogros suos, sostituidas dae tantas minores televisiones chi saltiellaiant inoghe e incue. Sa insinzante si trasformesit in unu mannu mannu televisorone cun inintro isceti sa cara de una bruscia chi la brigaiat de contìnuu.
"Pòbera me!" si naraiat sa criadura malassortada "So semper prus malassortada! Oh, comente dia chèrrere acabare de abbaidare semper sa televisione!"
Ma fiat ahimè tropu tardu! Oramai issa fiat pro semper una vìtima de sa televisione! No teniat prus pensamentos suos, ma isceti pensamentos chi sa televisione aiat postu in issa. No teniat regordos suos, ma isceti regordos proenientes dae sa televisione.
Poi unu die sa criadura malassortada at pèrdidu fintzas su nòmine suo, e est pro custu chi su nòmine suo no aparet in custa fàula. Peruna de sas persones chi apariant in sa televisione aiat mai pronuntziadu su nòmine suo, e tando issa l'aiat ismentigadu.
Cando unu die sa criadura malassortada iscumparfesit, nemos si nde acatesit, mancu issa, dadu chi issa si acataiat isceti de sas cosas chi sutzediant in sa televisione, e in sa televisione issa no fiat mai iscumparfida dadu chi no bi fiat mai mancu aparfida.
Nemos oje si regordat prus de sa pòbera criadura malassortada chi abbaidaiat tropu sa televisione.
Nemos foras sa persone bona chi at iscritu custa fàula pro sarvare totu sas criaduras chi abbàidant tropu sa televisione imbetzes de si divertire gioghende comente si depet, e arriscant gasi fintzas issos de iscumpàrrere dae su mundu, comente sa criadura malassortada chi oje nemos si regordat prus.

Roberto Quaglia