
 |
LA FLABE DE FRUTE SFORTUNADE
Cjâr Maurizio Costanzo Show,
pai tiei spetadôrs plui piçui, vuê ti conti une flabe, la flabe de Frute Sfortunade.
E jere une volte une frute sfortunade, che e cjalave simpri la television. Di matine e leve a scuele, come dutis lis frutis de sô etât, ma dopo misdì si plantave simpri denant de television e no si moveve plui, fin cuant che e jere la ore di lâ a durmî.
Stant che e cjalave simpri la television, cheste frute sfortunade no veve amîs, fûr di chei che a jerin dentri te television. Jê e jere convinte di vê tancj amîs, parcè che la television e jere dute plene di personis simpatichis che a someavin pròpit siei amîs. A jerin tancj tancj cartons, e a jerin ducj siei amîs. Par disgracie però la frute sfortunade si sintive compagn une vore sole, ancje se e veve ducj chei amîs strambis dentri te television. Cheste e jere la prime des sôs sfortunis.
A scuele chei altris fruts i contavin che il dì prime a vevin zuiât dut il dopo misdì. E la frute sfortunade e rispuindeve che jê no veve zuiât, ma che e veve cjalât i siei amîs dentri te television zuiâ par jê. Cuant che i fruts no sfortunâts a levin la domenie dopo misdì in biciclete, la frute sfortunade e cjalave invezit cualchi figure che e leve in biciclete dentri te television.
La sô compagne di banc i diseve simpri trop che si divertive a zuiâ cu lis sôs gnovis pipinis. Chê frute sfortunade no si divertive a zuiâ cu lis sôs gnovis pipinis, parcè che no veve timp. E passave difat dut il so timp a cjalâ i fruts dentri te television a zuiâ cu lis lôr gnovis pipinis.
A passarin i agns, e la frute sfortunade e cresseve, ma e restave simpri une frute, ancje se cressude, e simpri sfortunade. Chei altris fruts si visavin di cuant che a jerin stâts plui piçui, e int fevelavin tra di lôr. La frute sfortunade no rivave a visâsi di cuant che e jere stade plui piçule, parcè che si visave dome di cuant che a jerin stâts plui piçui ducj i siei amîs dentri te television. Cuant che a scuele e contave alc ai altris fruts no sfortunâts, e podeve simpri contâ dome ce che e veve viodût dentri te television, parcè che te sô vite no veve mai viodût altri.
"Ti plasial cjaminâ tal bosc?" i domandave ogni tant un compagn.
E la frute sfortunade e rispuindeve: "Al Grant Puffo i plâs une vore cjaminâ tal bosc". Po e zontave "Ancje a Ros Cjapielut, ma e à di stâ atente al Lôf." Ma jê no jere mai stade tal bosc.
Ancje a Nadâl, la frute sfortunade e jere sfortunade, parcè che chei altris fruts a contavin dai biei regâi che a vevin ricevût di Pari Nadâl che al jere jentrât di scuindon tes lôr cjasis, e jê invezit si visave dome dai biei regâi che i fruts dentri te television a vevin ricevût di Pari Nadâl che al jere jentrât mighe tant di scuindon dentri te Television.
A passarin altris agns, e la frute sfortunade e jere simpri une frute, ancje se simpri plui cressude, e simpri plui sfortunade.
No si visave difat di nuie, di ducj i agns che a jerin passâts, ma si visave dome di ce che e veve viodût te television. No si visave nancje plui cemût che a jerin fats i siei gjenitôrs, parcè che no comparivin mai te television e alore jê no ju cjalave, e alore dopo un pôc ancje lôr a vevin smetût di cjalâ jê.
"Puare me!" si disè une dì la frute sfortunade "No mi visi plui nancje cemût che e je fate mê mari!"
E provà alore a no cjalâ la television par viodi sô mari, ma no rivà. Di dutis lis bandis che e cjalave, e viodeve dome la television. Si jere usade a cjalâle tant che oramai no viodeve plui nuie altri. Ancje a scuele, ducj i siei compagns a sparirin denant dai siei voi, sostituîts di tantis piçulis televisions che a saltuçavin ca e là. La mestre si trasformà intun grant grant televisoron cun dentri dome la muse di une strie che le sberlave di continui.
"Puare me!" si diseve la frute sfortunade "O soi simpri plui sfortunade! Oh, trop che o volarès smeti di cjalâ simpri la television!"
Ma e jere aimè masse tart! Oramai jê e jere par simpri une vitime de television! No veve plui pinsîrs siei, ma dome pinsîrs che la television i veve metût dentri. No veve ricuarts siei, ma dome ricuarts che a vignivin de television.
Po une dì la frute sfortunade e pierdè ancje il so non, e al è par chest che il so non nol comparìs in cheste flabe. Nissune des personis che a comparivin dentri te television no veve mai pronunziât il so non, e alore jê lu veve dismenteât.
Cuant che une dì la frute sfortunade e sparì, nissun si 'nt inacuarzè, nancje jê, stant che jê si inacuarzeve dome des robis che a sucedevin dentri te television, e dentri te television jê no jere mai sparide stant che no jere nancje mai comparide.
Nissun vuê si vise plui de puare frute sfortunade che e cjalave masse la television.
Nissun fûr de persone buine che e à scrit cheste flabe par salvâ ducj i fruts e lis frutis che a cjalin masse la television invezit di divertîsi zuiant come che si scugne, e a riscjin cussì ancje lôr di sparî dal mont, come la frute sfortunade che vuê nissun nol vise plui.
Roberto Quaglia
La opare "Cjâr Maurizio Costanzo Show...", dute o in part, e pues jessi leiude, discjamade sul computer, stampade e copiade cence limits, dome par ûs personâl. Ducj i tescj e lis ilustrazions a son proprietât di Roberto Quaglia e no puedin jessi doprâts dal dut o in part cence autorizazion. Il progjet grafic e lis componentis grafichis di chestis pagjinis a son proprietât riservade di Roberto Quaglia. La opare "Cjâr Maurizio Costanzo Show...", dute o in part, no pues jessi metude in vendite a nissun titul cence autorizazion prime.
© 1994-2000 Roberto Quaglia.
|