Manifestu Filovegetale (Caro Maurizio Costanzo Show... lìtera n.13)

‹ Ìndighe de su situ · Pàgina de su museu · repertu restauradu

◀ in segus ■ ìndighe in antis ▶

lìtera n.13

CUMMESTÌBILE: Bonu de mandigare, sanu e digerìbile comente unu bermigone pro una rana bùbula, una rana bùbula pro unu terpente, unu terpente pro unu porcu, unu porcu pro un'òmine e un'òmine pro unu bermigone.

AMBROSE BIERCE

MANIFESTU FILOVEGETALE

Caru Maurizio Costanzo Show,

Eris s'àteru apo bidu unu betzu documentàriu chi dae minoreddu no m'aiat fatu perunu efetu, e dae mannu so abbarradu fulminadu.
Luego b'aiat una pranta subra una mesa cun atacadu su lie detector o màchina de sa veridade. A pustis, unu ricercadore li istratzaiat una foza e sa lancetta de s'istrumentu faghiat unu sàrtiu finas a arribare a fundu iscala. Posca totus (belle una bintina de persones) essiant e intraiant unu a unu. Cando pro penùrtimu intreit s'istratzadore, un'àtera borta s'istrumentu sartiaiat finas a fundu iscala.
Gasi sa pranta no isceti sufriat, ma fiat in gradu de reconnòschere su feridore suo e nde àere timòria. Cambiadu pro semper dae custa esperièntzia, a pustis unu primu impulsu umanitàriu... o mègius vegetalitàriu, chi m'aiat a àere ispintu a fàghere una carneficina de fruteris, sa resone prevaleit: mègius fundare su MOVIMENTU FILOVEGETALE che acabare in presone pro fruteri-tzìdiu.
Sa resone, a sa longa, tenet semper resone, est a nàrrere tenet a sese matessi.
Creare una currente de pensamentu antagonista suba de totu a sos ratzistas vegetarianos e vegetalistas, chi risparmiant sos animales pro s'acanire contra sas birduras, sa fruta, sos tzereales, sos ligùmenes, sas cucurbitàceas, totu indivìduos chi proant comente a nois de si cunservare e de si reprodùere.
Proite difatis amare sa pudda e no s'aspàragu, ambos duos èsseres bivos cun paris dignidade? Proite gratziare su bitellu e su porcu pro isterminare su mìgiu e s'òrgiu? Detzimare sa chibudda e difèndere s'ostrutzu cummestìbile? Sas raighinas de onni ratzismu sunt in su refudu de su diversu: prus unu est diversu dae chie lu vàlutat ponende a sese matessi comente archètipu de s'èssere bivu, prus pagu suscitat identificatzione e solidariedade. Eccu tando una sèrie de progressivos islittamentos de s'identificatzione:

Tenet sa pedde de unu colore diversu de su meu, però tenet origras ogros nasu buca manos e pes comente a mie. Faeddat sa limba sua a modu chi pro mie est incumprensìbile. Però faghet sa caca comente a mie. "Vabbè." (esempru: nieddu)
Tenet bàtoro trampas, est cobertu de pilu, ma semper tenet origras ogros nasu e buca belle comente a mie. No faeddat, però bèlat. E faghet sa caca a paddighinas. "Insomma..." (es: becu)
Est totu ogros, rasadu e cun manna buca. Chissai in ue tenet sas origras. Faghet unu sonu isgradèvole. Isputat e faghet sa caca istrana. "Bleah...!" (es: rana bùbula)
Est de forma allongada, s'isterrit e si cuntorchet. Chissai in ue tenet sos bratzos o a su nessi sas trampas. Est de carre comente a mie, però bìsculu. Istat mudu, faghende sa caca continua. "Ite schifu!" (es: bermigone)
Imbetzes de faeddare ronzat, forsis tenet unu pùntighe, no si ischit dae in ue arribat, no est un'abe chi nos faghet su mele, a ite servit? E posca faghet paga caca e la faghet pro s'aera. "Pìstalu! Pìstalu!" (es: intzetu)
No tenet nudda a chi bìdere cun nois. No tenet origras nasu buca manos pes pòddighes, no est de carre, no est capatze ne de faeddare ne de fàghere a su nessi sos frunidos. No càminat. No faghet mancu sa caca. Comente podet sufrire comente a nois? "Mastichèmusla, duncas!" (es: mela)

Eccu comente proietziones antropocèntricas determinant iseberos genòcidas pro iscopu nutritzionale.

B'at tzìnicos vegetarianos chi refudant fintzas su gorgonzola, matèria sena vida pròpia e pro sos prus fetèntzia, pro addentare gulosos sos tènneros minoreddos de sas carotas cruas, pròpiu istratzadas dae sa cuna de s'humus. Isceti proite sas origras umanas nostras no intendent sos vagidos de dolore de sas caroteddas chi fintzas sos istrumentos tècnicos registrant sena duda, nois partetzipamus impassìbiles a beros e pròpios olocàustos vegetales. Sos massajos retzint fintzas sovventziones de s'istadu pro allestire sos campos de cuntzentramentu issoro de birduras votadas a su venidore isterminu. Mentras sos animalistas inorridint cara a una pitica butega de carre de bighinadu o a unu alimentarista cun sartitzas, percurrent imbetzes indifferentes, antzis etzitados, sos mercados generales, beros e pròpios obitòrios in ue sunt espostas sas sarmas de fruta e birdura, chi ràntulant sena èssere intesas perdende sas ùrtimas gutas de linfa.

Abietzione e crudeltade! E su chi est prus grave, cara a su prus diversu de sos diversos dae nois, cùspide de efferada discriminatzione ratziale, sa pranta!

Ma sa cadena de s'orrore no si firmat inoghe!

Prus sos mortos vegetales sunt mortos dae pagu, prus sunt apretziados e costosos.

B'at istrumentos de tortura comente sa centrìfuga chi bogant sàmbene de pranta pro Dracula vegetarianos chi s'ingullint totu e abbarrant impunidos.

Sas criaduras benint addestradas a no àere rispetu pro su mundu birde, cunditzionèndelas cun s'oferta de gelau a sa fràula o a su pistàcciu, ma mai a su cunillu o a su craboneddu. Est un'ingiustìtzia macarrona, fata cun s'acuiescèntzia de chie s'artziat a sola difesa de sa parte animale de sa natura. Sos innamorados no oferint a sas isposas matzos de trampas de cigno, proite sas piseddhas inorridiant, ma sos ogros durches lugorant de gòsiu a sa vista de muntones de corpos de frores, segados cun sas cisòrgias, e macabramente atacados paris cun giros de ispau dorados, nastros e istagnola.

Sos mannos eroes e patriotas vegetales, comente Amanita, su fungu velenosu e sa cumpanza sua Cicuta, chi ant vindicadu milliones de prantas suprìmidas bochende isceti carchi òmine inoghe e incue, benint dae sos òmines persighidos e isterminados pro su solu gustu de bochire, sena mancu batire pretestos gastronòmicos. Est unu beru e pròpiu delitu polìticu. Ite faghet Amnesty? Muidat? Isceti proite in dae là de sos deretos de s'Òmine no esistint sos deretos de su Fungu?

Abbaidade s'animalista vegetarianu chi si impietosit cara a unu piatu de cecenielli e si iscàgliat contra sas istrages de su novellame ìtticu, ma posca s'ingullit giovanìssimos cateddos de latuca, a pustis àere ispartu subra sas feridas issoro sale ògiu aghedu, limone e pìbere.

E issu galu refudat sas mòmias de porcu comente presutu e salame, ma posca esitat isceti unu àttimu, e pro solos dubbios organolèticos, cara a sas mòmias vegetales comente sa mostarda e sa fruta sicca o cannida.

Proite s'ou nono e sa nughe eja?

E, no isceti in sas cantinas, su late nono e su binu eja?

E cussos chi màndigant germòllios de soja e no puddighinos bios cundidos?

Fintzas sa terminologia est sa mandiga-mortos: si màsticant coros de parma e de iscarcioffa, ancas de àpiu, concas de àgiu e origritas pugliesas cun sas chimas de rapa.

Giai prevista, e gasi iscontada, est sa reatzione de sos animalistas vegetarianos, cara a custos capos de imputatzione, e gasi no la numenamus mancu. Poborittos, lassèmuslos crogiolare in sas male cuadas cussèntzias de curpa issoro.

No si podet barare cun s'incontzu personale, ne suba de totu cun cussu coletivu.

Su Tempus, a tempus suo, s'at a incarrigare de vindicare tantos delitos a sensu ùnicu, e l'at a fàghere impreende s'ampra patologia de cussas maladias chi andant a devastare sa giai trista tertza edade de cussos chi si sunt incaboniados in un'assurda alimentatzione isbilantziada, fintzas ischende de tènnere un'intestinu cun longària e dotatzione glandulare dae onnìvoru.

Su Tempus, mannu ideòlogu de su movimentu filovegetale: faghet bìvere millènnios de sequòias e una die isceti de mariposas efìmeras.

Cun custu Fundadore e Presidente Onoràriu, su MOVIMENTU FILOVEGETALE giamat a racolta sos filovegetales de totu su mundu pro annuntziare: "Filovegetales de totu su mundu, aunìdebos pro cumbàtere aunidos a favore de sa càusa comuna!"

Pro immoe medas no nos cumprendent e medas àteros sunt fintzas contra a nois.

Ma a sa fine, su Tempus nos at a dare resone.

Gigi Picetti
Roberto Quaglia

Lassa unu Cummentu.

Lege sos cummentos de sos àteros.

Mi praghet! Mi praghet! Mi praghet!

Ìndighe de sas lìteras.

Cubertina.

Ma chie est Roberto Quaglia?

S'òpera "Caro Maurizio Costanzo Show...", intrea o in parte, podet èssere lèghida, iscarrigada in su computer, imprentada e copiada chene lìmites, isceti pro impreu personale. Totu sos testos e sas illustratziones sunt propiedade de Roberto Quaglia e no podent èssere impreados intreos o in parte chene permissu. Su progetu gràficu e sos cumponentes gràficos de custas pàginas sunt propiedade riservada de Roberto Quaglia. S'òpera "Caro Maurizio Costanzo Show...", intrea o in parte, no podet èssere posta in bèndida a perunu tìtulu chene permissu in antis.
© 1994-2000 Roberto Quaglia.