
 |
VIVA I FILÒSOF!
Caro Maurizio Costanzo Show,
mo chi s'crëdal d'ësar, cl'è là ch'a so me quand ch'u m vé l'inteligenza? Cun che dirët ch'u s fa la prèdica, ch'pu a n'ò gnânca capì cs'ël ch'l'à da zighê tânt? A n' so s'avì lèt la su ultma letracia, ch'la s'la tô cun i filòsof, ch'i è fôrsi l'ultma brêva zênta ch'u j sia, ch'i n'à mai rubê gnint a niseun, fôra ch'a i filòsof de' passê, ch'però i è môrt e quindi ènca par la lèz i n'à piò gnint, e ènca i zincuânt an dla su môrta i è za pasê e, cumè ch'la dis la SIAE, i à pêrs i dirët s'al su idèi, e alóra i filòsof ch'i dröva al su idèi par filusufê e guadagnês unestament e' pân insgnènd a la zênta ignurânta i n' gli rôba pröpi gnint.
Scusì e' sfôg, mo a j tëgn ch'a e' sapiva ch'a m dissòci da quel ch'a dégh quand ch'u m suzèd cla roba là dl'inteligenza. Dürânt l'inteligenza a n' so pröpi me, l'è cumè un'êtra parsona dêntar ad me ch'la vén fôra, cumè la paràbula de' dutôr jechill e mister haidy, e a n' pòs ësar cundanê par dal colp ch'al n' è psicologicamënt mi.
Me i filòsof a j rispët. I è sèmpar calom calom, i parla cun una vóša ch'la m'arlasa. Ogni tânt a m'indörum, mo l'è colpa mi ch'a n' so inteligènt abastânza (par furtuna). I filòsof i è zênta calma, ch'i à pasê la vita a pinsê, e ch'i à capì tót, ânzi, i à capì ch'i aveva za capì tót mèl e mèl an fa. Dop tót la verità l'è una sóla e l'è sémpliza, sinò cumè ch'i avrébb fat a capìl za i grec, ch'i pasèva e' temp a fê al orge? Una vôlta pu u n'è ch'i filòsof t'i incuntrèvta par la strê, o sè, mo t'an i cnusèvta. U n' gn'era difati la televisiòn ch'la t'i fasèva vdé e la t'dgèva: ècco, lò l'è un filòsof. Par quest i era pröpi svantagiê, a pens me. Mo i era istès istruì, basta pinsê ch'i saveva ènca e' grec antic.
Me a so cunvint che, par ezèmpi, la Grecia l'è ancora pina ad filòsof. Ènca l'Itaglia la n' schirza. I dis sèmpar a la televisiòn che l'Itaglia l'è e' paês cun piò cultura de' mond. Me a j crëd, parchè, dop tót, a so itaglièn.
E' piò grând filòsof de' mond l'è Crést. A j so arivê dop tânt an ch'a j pens, quand ch'int e' mi zarvël u n' gn'è cl'è là ch'a v'ò za dët, cun tót i pinsìr cumplichê ch'i n' sérv a gnint, e sóratót ch'i n' sérv a capì. Crést l'era un grând filòsof, e difati i l'insègna ancora a scôla e i fa bèn. Lò e' dgèva una masa ad cös savi, e ènca filosòfichi. Bié i ultum. L'è fazil par un camël pasê par la cruna d'un ag. E pu quand ch'e' spzèva e' pân e' l'multiplichèva pröpi, difati u j n'era sèmpar par tót, e quand ch'e' spartèva i pèss e' cavèva ènca la lésca. L'è par quest ch'e' i spartèva in dò. Scusì, quest u n' c'entra gnint, mo a me i pèss i m pis una masa, mo a zèrch ad n'in magnê tròp parchè i m'à dët ch'i à e' fòsfor ch'e' fa dvintê inteligènt, e d'inteligentòn in famèja u j n'è asê e d'avânz ón, ch'pu e' srèb cl'è là ch'u j è ènca lò int e' mi zarvël e ch'u t scriv ènca lò al lètar ch'a t prèg ad scusêi. E' n' fa apòsta. L'è ch'e' n' riès a fên a meno.
Naturalmënt d'solit a n' li capès al teurì filosòfichi. Fôra che Crést, ch'e' dis dal cös ch'al pò capì tót, cumè Funari, ch'j ëtar e' pê ch'i e' fëga apòsta a cumplichê al cös. Par quest a n'ò piò pruvê a lèz i su lìbar. L'è mëi sintì a la televisiòn i filòsof ch'i parla ad filosofì, l'è piò arlasânt. Purtrop i i fa vdé pôc parchè i fa calê i ìndiz d'ascölt. Mo quel ch'i dis l'à un sòn pröpi piasévul, basta n' stê a fê j inteligentòn par capì pröpi tót. Basta capì al cös principêli. Cumè e' fat che int la vita u j vô filosofì, ch'bsògna cumpurtês bèn, ch'bsògna avé bon sèns. L'è pröpi quel ch'a j ò sèmpar pinsê, e a so cuntènt che i filòsof i è d'acôrd cun me. Sóratót Crést, tót i l'adora giustamënt par la ròba religiosa, mo la su vira natura l'era ad fê e' filòsof, ad spieghê a la zênta cumè ch'u s'as cumpôrta. Âma e' tu pròsum. L'è una frêṡa acsè sémpliza, epör l'è tra al piò impurtânti de' mond. Me a n' so mìga se Buddha o Maometto i à dët quèl d'acsè bël e profònd, e s'i l'à dët i n' l'à dët in Itaglièn, ch'l'è la lèngua ch'la sòna mëi de' mond, cumè ch'tót i itaglièn i sarà d'acôrd cun me.
Un mi amìg cuntadèn l'era un grând filòsof. Quand ch'e' vnèva la sêra, e' saveva sèmpar cumè ch'e' vnèva e' temp e' dè dop. Guardènd al furmìgh, e' capèva ènca e' temp d'una stmâna prèma. L'era bén vlù da tóti al vachi, ch'e' rispitèva da vér cristiân. L'era ènca una parsona istruida, e' fasèva sintì Beethoven a al vachi par fêi fê e' lat piò bon, e acsè e' istruèva ènca al vachi. Se un l'è un bon filòsof, s'e' vô e' riès a fês capì ènca da al vachi, a pens me. S'e' n' riès a fês capì gnânca da al su vachi, che râza ad filòsof èl?
E' piò grând filòsof itaglièn l'è cl'è là De Crescenzo. Giustamënt l'à guadagnê una masa ad miliêrd insgnènd la filosofì a la zênta sémpliza cumè me.
Cumè ch'a vdì, u n'è necesêri fê j inteligentòn par mètas a dscòrar ad filosofì. E' mi vsèn ad ca ad sóra (ch'e' sta int l'apartament ad sóra) l'à scuvèrt la mój ch'la era insèn a un óm ch'u n'era lò (e' vsèn ad ca), insèn in sèns ènca sessuêl, ciôé sóratót, e alóra u j à dê una curtlê. Questa l'è mancanza ad filosofì, a dégh me. S'l'aves lèt i lìbar ad De Crescenzo, a dégh me ch'u n' j avrèb dê una curtlê. Sóratót s'e' s'mitèva a lèzi invezi d'andê a guardê cs'la fasèva su mój. E ènca s'l'aves studiê un pô al paròl ad Crést, mo nö par la religiòn ch'u j è lè dêntar, mo par la filosofì. U j à dê la curtlê pröpi par la su mancanza ad filosofì. E ènca cl'è là ch'u s'è fat ciapê cun cla mój a lët, s'l'era un pô piò filòsof u n' s'ciapèva cla curtlê. S'l'era piò filòsof o u n' s'lasèva tentê da la chêrna ad lì, o almânc e' staşèva un pô piò atent, insòma.
Ècco, caro Maurizio Costanzo Show, quel ch'a t vléva dì s'la filosofì a t l'ò dët.
Roberto Quaglia
L'òpera "Caro Maurizio Costanzo Show...", tota intìra o in pêrt, la pò ësar lèta, scarghêda int e' computer, stampêda e cupiêda sènza lèmit, sôl par ûs persunêl. Tot i tèst e al ilustraziôn i è pruprietà ad Roberto Quaglia e i n' pò ësar druvê tot intìr o in pêrt sènza autorizaziôn. E' prugèt gràfic e i cumpunént gràfic ad sti pàgin i è pruprietà riservêda ad Roberto Quaglia. L'òpera "Caro Maurizio Costanzo Show...", tota intìra o in pêrt, la n' pò ësar mesa in vèndita a niseun tìtul sènza autorizaziôn prèma.
© 1994-2000 Roberto Quaglia.
|