
 |
VIVA I FILOSOFI!
Caru Maurizio Costanzo Show,
ma chine si cride de essere chiru llà chi sugnu iu quannu mi vene l'intelligenza? Ccu quale diritto ni fa a predica chi pue un aju capitu mancu chi cosa tene de gridare tantu? Un sacciu si ha lettu l'urtima litteraccia sua, chi si la piglia ccu i filosofi, chi forse su' l'urtima gente brava chi c'è, chi un ha mai arrobbatu nente a nullu, fora 'n effetti de i filosofi du passatu, chi però su' morti allura puru legalmente un tenanu cchiù nente e puru i cinquant'anni da morte loro su' già passati e cumu dice a SIAE hannu persu i diritti supra l'idee loro e allura i filosofi chi usanu l'idee loro ppe filosofeggiare e si guadagnare onestamente u pane istruennu i persune ignoranti un ci arrobbanu propriu nente.
Scusati u sfogu, ma ci tegnu chi u sapiti chi iu mi dissociu de chiru chi dicu quannu mi succede chira cosa llà de l'intelligenza. Duranti l'intelligenza un sugnu propriu iu, è cumu n'atra persuna intra de mia chi nesce fora, cumu a parabola du dottor jechill e mister haidy, e un pozzu essere cundannatu ppe curpe chi un su' psicologicamente mei.
Iu i filosofi i rispettu. Su' sempre assai calmi, parlanu ccu na vuce rilassante chi mi rilassa. Ogni tantu m'addormentu, ma è curpa mia chi un sugnu abbastanza intelligente (ppe fortuna). I filosofi su' persune calme, chi hannu passatu a vita a pensare, e chi giustamente hannu capitu tuttu, anzi, hannu capitu chi avìanu capitu tuttu già migliara de anni fa. Doppu tuttu a verità è una sula e è semplice, sinnò cumu avissaru fattu a a capire già i greci, chi passavanu i tiempi a fare l'orge? Na vota pue un è chi i filosofi l'incontravi ppe a strata, oppuru sì ma un i ricanuscivi. Un c'era infatti a televisione chi ti i facìa vidire e ti dicìa: eccu illu è nu filosofu. 'N chistu sensu eranu davveru svantaggiati, pensu iu. Ma eranu u stessu colti, basta pensare chi sapìanu puru u grecu anticu.
Iu sugnu cunvintu chi ppe esempiu a Grecia è ancora china de filosofi. Puru l'Italia un scherza. Dicianu sempre alla televisione chi l'Italia è u paise ccu cchiù cultura du munnu. Iu ci cridu, pecchì doppu tuttu sugnu italianu.
U cchiù granne filosofu du munnu è Cristu. Ci sugnu arrivatu doppu tanti anni chi ci pensu quannu intru u ciarviellu mie un c'è chiru llà chi v'aju già dittu ccu tutti pinsieri complicati chi un servanu nente, e chi suprattuttu un servanu a capire. Cristu era nu granne filosofu, e infatti u 'mparanu ancora a scola e fannu bonu. Illu dicìa infatti nu saccu de cose sagge, e puru filosofiche. Beati l'urtimi. È facile ppe nu cammellu passare ppe a cruna de n'agu. E pue quannu spezzava u pane u moltiplicava davveru, infatti ci nn'era sempre ppe tutti, e quannu spartìa i pisci levava puru a spina. È ppe chistu chi i spartìa 'n dui. Scusati, chistu un c'entra nente, ma a mia mi piacianu assai i pisci, ma circu de un ni mangiare troppi pecchì m'hannu dittu chi cuntenanu u fosforu chi fa addivintare intelligenti, e de intelligentoni intra a famiglia ni basta e avanza unu, chi pue fussa chiru chi c'è puru illu intru u ciarviellu mie e chi ti scrive puru illu i littere chi ti preju de ci scusare. Un u fa apposta. È chi un riesce a ni fare a menu.
Naturalmente de solitu un i capisciu i teorie filosofiche. A parte Cristu, chi dice cose chi tutti pònnu capire, cumu Funari, l'atri pare chi u fannu apposta a complicare i cose. Ppe chistu un aju cchiù pruvatu a leggere i libri loro. È megliu sentire 'n televisione i filosofi chi parlanu de filosofia, è cchiù rilassante. Purtroppu i fannu vidire pocu pecchì abbassanu l'indici de ascoltu. Ma chiru chi dicianu tene nu sonu assai piacevule, basta un stare a circare de fare l'intelligentoni ppe capire propriu tuttu. Basta capire i cose principali. Cumu u fattu chi intra a vita ci vò filosofia, chi bisogna si cumportare bonu, chi bisogna avìre bonu sensu. È propriu chiru chi aju sempre pensatu, e sugnu cuntentu chi i filosofi su' d'accordu ccu mia. Suprattuttu Cristu, tutti l'adoranu giustamente ppe u fattu religiusu, ma a vera natura sua era de fare u filosofu, de spiegare alla gente cumu ci si cumporta. Ama u prossimu tue. È na frase accussì semplice, eppuru è tra i cchiù 'mportanti du munnu. Iu un u sacciu mica si Buddha o Maometto hannu dittu quarche cosa de accussì bellu e prufunnu, e si l'hannu dittu un l'hannu dittu 'n Italianu, chi è a lingua chi sona cchiù bona du munnu, cumu tutti l'italiani sarrannu d'accordu ccu mia.
N'amicu mie cuntadinu era nu granne filosofu. Quannu venìa a sira, sapìa sempre cumu venìa u tiempu u jornu doppu. Guardannu i furmiche, capìa puru u tiempu na simana prima. Era amatu de tutti i vacche, chi rispettava de veru cristianu. Era puru na persuna istruita, facìa sentire Beethoven alle vacche ppe ci fare fare u latte cchiù bonu, e accussì facennu istruìa puru i vacche. Si quarcunu è nu bonu filosofu, si vò riesce a si fare capire puru de i vacche, pensu iu. Si un riesce a si fare capire mancu de i vacche sue, chi razza de filosofu è?
U cchiù granne filosofu italianu è chiru llà De Crescenzo. Giustamente ha guadagnatu tanti miliardi 'mparannu a filosofia alle persune semplici cumu a mia.
Cumu viditi, un è necessariu fare l'intelligentoni ppe si mintere a parlare de filosofia. U vicinu mie de casa de supra (chi sta intru l'appartamentu de supra) ha scupertu a mugliere chi era 'nzèmmula a n'omu chi un era illu (u vicinu de casa), 'nzèmmula 'n sensu puru sessuale, cioè suprattuttu, e allura c'ha datu na curtellata. Chista è mancanza de filosofia, dicu iu. Si illu avissa lettu i libri de De Crescenzo, iu dicu chi un ci dunava na curtellata. Suprattuttu si si mintìa a i leggere 'nveci de jire a guardare chi facìa a mugliere sua. E puru si studiava nu pocu i parole de Cristu, ma no ppe a religione chi c'è llà intra, ma ppe a filosofia. C'ha datu a curtellata propriu ppe a mancanza sua de filosofia. E puru chiru llà chi s'è fattu acchiappare ccu chira mugliere au liettu, si era nu pocu cchiù filosofu un si pigliava chira curtellata. Si era cchiù filosofu un si lassava tentare da carne sua, o armenu stava nu pocu cchiù attentu, insomma.
Eccu, caru Maurizio Costanzo Show, chiru chi ti vulìa dicere supra a filosofia t'u aju dittu.
Roberto Quaglia
L'opera "Caro Maurizio Costanzo Show...", tutta o 'n parte, pò essere letta, scaricata supra u computer, stampata e copiata senza limiti, sulu ppe usu personale. Tutti i testi e i illustrazioni su' proprietà de Roberto Quaglia e un pònnu essere usati sani o 'n parte senza permissu. U progettu graficu e i componenti grafiche de chisti pàgine su' proprietà riservata de Roberto Quaglia. L'opera "Caro Maurizio Costanzo Show...", tutta o 'n parte, un pò essere misa 'n vinnita a nullu titulu senza permissu prima.
© 1994-2000 Roberto Quaglia.
|