![]() a p r e v a l e n t e u s o
d ' ' e c i b e r n à u t e
"Caro Maurizio Costanzo Show..." l'è e' prèm lavór leterêri Uno e Trino fat in Itàglia. "Uno", parchè me a l'ò fat una vôlta sôla. "Trino", parchè e' tèn int e' stès temp trì fòrom principêli, o identità:
Parchè a j ò dezìs ad mètar su Internet a dispusiziôn ad tot stu mi lìbar? Hò al mi ötimi ragiôn, e la prèma l'è che u n' gn'è ragiôn vàlidi par cvi ch'a duvrèb evitê ad fêl. Una masa ad scritùr e editùr i crèd, sgònd me sènza fundamént, che mètar un su lìbar su Internet e' pòrta piò pirìcul che vantàg. La tutela di dirèt d'autór, la paranoia d'avé di plàgi, e sóratot la pavura che niseun e' cumprarèb in libreria un lìbar ch'e' pò truvê gratis su Internet. Io a pens che tot sti mutìv i sìa dl tot sènza fundamént. A s'tràta ad credenzi ch'al n'à niseuna ragiôn d'esìstar e ch'prëst agli sarà spazêdi vì, cumè ch'prèma o dop u suzéd a tot i tabù ch'i à pérs e' sèns. Preconcèt vèc ch'i n' durarà tânt, ènca parchè me a j ò intenziôn ad sfatêi sóbit. La vendibilità d'un lìbar difati la n' vèn tuchêda par gnint da la su mesa "online" su Internet. A chiunque ch'u i interèsa un lìbar, e' sêrv a pôch avél int e' su computer, duv che la letura la à da pasê par e' monitor, ch'la t'ruvìna j òc óltar a ësar una facènda scumdìsima. Un lìbar ch'e' pis u s'vô avél in mân, par pudél sfujê cun cumdità in pultrôna, a lèt, in curiéra o in spiàza. Un lìbar tôlt da Internet, s'u n' s'vô lèzal s'e' monitor (ruvinèndas j òc), u s'purèb stampêl cun una stampânta laser. L'è d'sicur una sulùziôn vàlida (e adiritura preziósa) par i chês duv che che lìbar u n'esèsta in libreria (e alóra l'autór d'sicur u n' pérd niseuna vèndita). Stampêsal in ca e' dvèinta invezi una facènda piotòst stupida e antieconòmica se e' lìbar in quistiôn l'è in vèndita in libreria. Cun quèl ch'e' costa l'inchiòstar d'una stampânta laser, andê a cumprês e' lìbar in butéga o in edìcula u n' costa piò che stampêsal in ca, e a la fin u t'arèsta in mân e int la biblioteca un lìbar invezi d'un mòcc ad fujàz sparpaiê. Superê e' lògh cumun che d'un lìbar in cumèrzi al vèndit al cala s'e' l'è tot intìr ènca su Internet, a guardèm i vantàg che sta facènda nôva la pòrta: Inòltar, e' gradimént di cibernauti e' sarà e' paràmetar ch'u n' s'pò fêni d'mânch par capì s'un lìbar u j interèsa a i letór e in che misura, prèma ad decidar la publicaziôn s'la chêrta e la tiratura. Quânti vôlt incù j editùr i sbaja ad bròt la tiratura di su vulùm, stimènd tròp o tròp pôch un tìtul o cl'êtar? In futur (o mèi, a cminzê da adës), l'editoria "online" la iutarà e' lavór ad selèziôn dj editùr. Quèst pu e' purtarà a lasê indrì e' pelegrinàg ad incù, rituêl, da pidòcc e umiliânt, di aspirânt autór a la córt di grând editùr che listès int e' 99% di chês i n' lizarà mai i su manuscrët. I sarà difati j editùr a avé tot l'interès ad zarchê su Internet i lìbar online ch'i apa avù int e' ciberspazi un sucès acsè grând da rèndar d'sicur cunvenìnta e ch'la rènd bën ènca la su publicaziôn s'la chêrta e in libreria. In piò, la publicaziôn d'un lìbar su Internet la pò zà da par lì purtê un guadàgn. Par e' software e' vêl zà la fòrmula de' "shareware". La s'pò aplichê ènca a la leteratura online. E' pòblic ch'e' lèz l'è par bôna pêrt fat ad parsôn unèsti, in mèdia bôni ad rispitê un'ètica cundivisa. A st'argumént, ch'a l'ò sôl tuchê aquè, l'è dedichêda par dabón la pàgina ch'la vèn. Se a la fin par chês a pinsèsi d'ësar capitê in sti pàgin par sbài, avènd in partènza vlù zarchê quèlcadun d'êtar o quèlcòs d'êtar, nö angustiêv tròp. L'eròr l'è la quintesènza dl'evoluziôn, la ciêv ad vôlta d'ògni prugrès. Zarchê l'è impurtânt, mo qualsìasi parsôna ad mëza sagèza la sa che a la fin u s'tróva sèmpar quèlcòs d'inaspetê ch'ad sòlit u interèsa piò ad quèl ch'u s'stasèva a zarchê. Cumè ch'e' dis Gigi Picetti, "Chi ch'zerca e' tróva quèlcòs d'êtar". Quèst l'è vèr sóratot su Internet, ch'nö par chês l'è un ambiént ch'e' s'evòlv d'curénta. E pu, chiunque ch'a stasèvi par chês a zarchê, aquè a l'avì truvê in teurìa. U n'è fórsi e' Maurizio Costanzo Show e' vèr e ùnich Totem de' Vilàg Italian? U n'è e' Maurizio Costanzo Show e' cuntenidór idêl di mit mudéran ch'a i tirèm in bal tot i dè in t'una manîra o in cl'êtra, tânt ch'a j andèm a zarchê ènca su Internet? Par dìla a la Negroponte, ògni dè ch'e' pasa l'esistènza digitêla ad ognun ad nò la dvèinta piò efetiva e piò carga d'efèt dla nòstra esistènza materiêla. Roberto Quaglia, 20 Abrìl 1997
|