i l'hai lesù le lettere ëdnans scrite dal mè alter ego (as dis parèj?), diretament antramentre ch'a-je scrivìa, dàit ch'essend mi an soa tèsta sò malgré i podìa benissim ësbircé, a travers j'euj ch'i l'oma an multiproprietà, le paròle ant ël moment esatìssim ch'chiel a-je scrivìa veriament.
Mi i-i chërdo benissim che j'UFO a esisto. S'a esisto nen, përchè a-i é la paròla për ciameje? Tute le ròbe ch'a-i é la paròla a devo esiste për fòrsa përchè se nò a l'ha gnun sens ch'a-i é la paròla. S'mi i diso ch'a-i é ël calé dël sol, i lo peuss dì mach përchè i l'hai vist ch'a-i é dabon. J'àutri am capisso mach përchè ëdcò lor a san còs a l'é ël calé dël sol. Tùit i savoma còs a son j'UFO, antlora a l'é automàtich che sti-sì a esisto automaticament për fòrsa dabon sensa dùbit.
Antlora i capisso nen përchè col'àutra përson-a ch'mi ëdcò i son a l'ha dit ant le lettere passà parèj tante ròbe ch'a stan né an cel né an tèra e donca a peulo esse gnun UFO (bel gieugh ëd paròle, ver? eh!).
La verità a l'é ch'ij marsian a-i son, da quàiche part, ma a son nen sì, përchè s'a fusso sì a sarìo nen marsian, com an dis la lògica. E j'UFO a son naturalment ij dìsch volant, com minca un a l'ha podù noté quand a son comparì sà e là. E j'UFO a son pien ëd marsian, ma a na stan tanti përchè a son cit.
Antlora i capisso nen còs a-i é parèj tant da dì an sù sta fantasiensa, che peui an pràtica a sarìa d'àutr che ij film an sj'UFO e con tùit coj efet speciaj për tiré le përson-e al cìnema. Ma a mi am frego nen! Mi i speto ch'ij film a ven-o an television.
Mi i son convint ch'a-i son già stàit tanti ancontr ravsinà. J'estraterèstr a son nen cativ, o almanch, a son nen cativìssim, ma a podrìo dventelo da un moment a l'àutr. S'a fusso cativìssim an avrìo già dëstruì, sòn a l'é evident. Nopà an contròlo, për vëdde com i-s comportoma, përchè për lor i soma important, ëdcò s'i sai nen përchè. A podrìo esse-je ëdcò estraterèstr travestì da esse uman. J'estraterèstr a peulo fé tut, dòp-tut a son marsian! Mi i chërdo ch'a venta sté atent a coj ch'a parlo ëd ste ròbe fasend tanta confusion. A-i son j'UFOLOGI serios, ch'a van rispetà, e ci manchèissa! Ma peui a-i son coj com col tipo ch'i son mi quand i lo son (scusé s'i son nen ciàir), ch'a diso parèj tante paròle ch'a veulo dì un bel gnente, e ch'a servo mach a convince nojàutri tùit che lor a na san ëd pì ëd nojàutri! Ma mi i-m faso nen freghé! Se sti bej tipo a l'han avù quàich ancontr ravsinà, ëdcò dël ters tipo, a lo devo dì ciàirament e miraco fé vëdde ëdcò quàiche fotografìa o mej a sarìa na videocassëtta. S'a l'han nen avulo antlora ch'as në stan ciuto përchè còs a veulo savèjne ëd pì dj'àutri ch'miraco quàich ancontr ravsinà a l'han pura avulo, discretament. I spero ch'i son stàit ciàir.
Còs a veulo spieghé a mi còs a l'é la fantasiensa?!!! I lo sai benissim!! I l'hai la videocassëtta ëd Guerre Stellari e i l'hai vist ëdcò tùit ij film ch'a son vnù dòp. I l'hai vist ëdcò ij film pì brut, com Blade Runner, ch'an efet a m'é nen piasù përchè a l'é nen possìbil ch'ël marsian an ven-a a fé la moral e a la fin a l'abia ancora rason chiel combin che giustament a meuir.
Mi i chërdo ch'an futur la fantasiensa a deuv për fòrsa dventé pì importanta, përchè con ij modern computer as peulo fé sempe pì efet speciaj, e quand a-i sarà un ancontr ravsinà ufissial sòn a-j farà ëdcò na mucia ëd reclam (a la fantasiensa). Për quant a dventerà importanta, la fantasiensa a sarà però sempe na conseguensa dl'UFOLOGIA, ëd sòn i na son sigur. Peui dzurtut adess ch'a l'han fàit tùit sti modern teléscop potentìssim con ij cui as podrà ëd sigur vëdde ij dìsch volant ëdcò vàire pì da lontan e ingrandì.
Mi peui i l'hai ëdcò na teorìa personal, ch'i diso a gnun ma a ti ch'it ses ël Maurizio Costanzo Show i peuss dila. A-i son na mucia ëd përson-e famose ch'probabilment a son dj'estraterèstr travestì, o pura a son an contat con lor. I veuj nen dì ij nòm, se nò as ancòrzo ch'i l'hai dëscoverte e com al sòlit am soprimo. S'it m'invite a toa trasmission it spiego tùit ij particolar, ma it deuve promëtteme ëd nen invité ëdcò col'àutra përson-a ch'a-i é ëdcò drinta ëd mi e ch'as chërd parèj inteligent mach përchè a lo l'é, përchè s'a ven ëdcò chiel peui sël pì bel, quand i deuv parlé mi, am scassa da la guida dël servel e as bùta a dì tute le tòtarìe ch'a dis sempe për confonde le përson-e pì sempie com mi, e parèj a finiss ch'ti't m'has invità për gnente.
Mi i-j òdio coj ch'a fan ij superior lesend ij liber ëd fantasiensa! As ancòrzo nen ch'a son ridìcoj? Tute le përson-e normaj la fantasiensa a la vardo giustament mach al cìnema o an tivù, e se dabon as apassion-o a dvento UFOLOGI. Ant ij liber a-i é ëd sigur gnente ëd pì che al cìnema: ant ij liber a-i son mach le paròle, ma ste-sì a-i son ëdcò al cìnema o an tivù, an efet ij përsonagi a parlo, nò? Ma al cìnema e an tivù a-i son ëdcò j'imàgin, l'assion, ël son stéreo e an cèrte sale ëdcò ël sorround o com diàul as ciama. E peui ij liber a son n'invension ëd quand a-i era nen la television. S'a-i fussa stàita la television, ij liber a l'avrìo nen inventaje ëd sert, sòn a l'é sigur! E ël cìnema e la tivù a l'han inventaje pròpi përchè ij liber a j'ero tròp noios. E peui an han mostrà ch'a venta vive con la democrassìa, ch'a veul dì che la magioransa a l'ha sempe rason. E antlora mi i sfido sti presuntuos, com col sapienton ch'ëdcò a-i é da quàiche part drinta ëd mi, a dì che la magioransa a preferiss ij liber al cìnema e a la tivù! La magioransa ij liber a-j masserìa sùbit, costa a l'é la verità, e a l'é dabon antidemocràtich ch'as provëda nen a avèjlo già fàit da temp!
Dzurtut con ij liber ëd fantasiensa ël divari a l'é terìbil. J'efet speciaj, contà an sël liber, sensa figure, am fan mach tantìssima pen-a. Për fortun-a i l'hai mai lesù sti liber, ma i-m imagino che la descrission a paròle dj'efet speciaj a sia la ròba pì stùpida ch'i-m riesso a imaginé. E se da un liber ëd fantasiensa i-j gave la descrission dj'efet speciaj, còs a-i resta?

Roberto Quaglia