‹ Indiç dal sît · Pagjine dal museu · repert restaurât
Condivît:FacebookXWhatsAppTelegramEmail
Ancjemò sproloqui (Cjâr Maurizio Costanzo Show... letare n.46)
letare n.46

«Jo o fevel cence savê ce che o larai a dî, cussì come che o pensi cence savê ce che o larai a pensâ. Al è un mût eficientissim par dî e pensâ, cualchi volte, robis gnovis e origjinâls. Di sigûr, cussì si finìs ancje cul dî un grum di stronzadis, ma cui isal che no int dîs tantis in ogni câs?»

ROBERTO QUAGLIA
















ANCJEMÒ SPROLOQUI

Cjâr Maurizio Costanzo Show,

tal principi al jere il caos, cussì almancul si dîs o si à dit e forsit si disarà simpri di plui. E alore, che il caos al sedi!
Rumôrs di font. Barbotaments che no si capissin. Fruscj. Atribûts dal caos, ma no ancjemò caos. Fisiche indeterministiche, cuants di ca e di là, trops cuants si lassaran cuantizâ e cuant? Cuâl isal il fîl che al lee i fîi, la metafore che e dissolf lis metaforis?
Che tal principi al fos il Verp lu san ancje i fruts. Ma prime dal verp e jere la spirâl, forme magjiche che di jê dut si gjenere. L'argoment al nas di se di un caos pôc stabil, che za si dissolf te autocostruzion di une parvence di significât condivisibil. La spirâl. La spirâl. La spirâl e je la forme de nestre galassie. La spirâl e je la forme di une cape. La spirâl e nas in ogni televisôr di bessole cuant che o pontìn une telecjamare impiade viers il schermi che al trasmet la imagjin che e produs. E nas cussì, dal nuie, spontanie, perfete te sô gjeometrie autoprodusude, dinamiche te sô rotazion armoniche aparente. Nissun le à creade. E nas di ce che o clamìn un efiet di retroazion tra la telecjamare e il monitor. Ma il fat che nô le clamìn cussì no le spieghe par nuie. La spirâl e je une forme gjeometriche impuartantissime che mai nus insegnin a scuele, dulà che nus drogin la ment cu lis coordenadis futilis dai cuadrâts, dai triangui e des lôr ipotenusis stupidis. Mai un acen però ae spirâl, forme gjeometriche complesse e ineffabile, origjin di dut ce che di complès o cognossìn, nô includûts. Eh, sì, il nestri DNA, chê superbe molecule che e ten il nestri codiç gjenetic, cioè il progjet di costruzion di ogni minime part di nô stes, e à une forme elicoidâl, plui simile a une spirâl che a un cuadrât ancje se plen di ipotenusis.
Ma parcè intestardîsi su la spirâl? Dacuardi che cuasi nissun si è tormentât plui di tant sui misteris di cheste forme cussì impuartante, ma cumò che le vin nomenade o cambiìn il vers dal nestri voli.
Ve di gnûf cualchi acen di caos, cune di ogni faliscje di novitât autentiche. Sfuarçìn il caos a acopiâsi su di se, bandonìn i significâts, significhìn i bandons e imbroìn i aloc. Zovìn a ce che di jovial za o sin cence savê di jessi, cingìn il nonsens cul polpastrel lecât di un dêt sconetût di chel cerviel che di autentic despot nus instighe a dâi tocs di significance conclamade.
Rimpinìnsi sù pe metafore che cul rimpinâsi e sugjerìs significâts che no disvilupìn plui indevant, sprofondìnsi te sô sûr plui triste e deprimude, masanìn crots e pan dûr di fer, pornopernio di stabilitât metalogjiche alucinade, enucleìn la peraule enucleâ cence zontâ altri.
Ve orpo un sac di sens dens che tu pensis un sac ma ti pâr un fregul un pac. Svac di bocje e di laringe, cuardis vocâls includudis. Lis musis a son fusis, peraulis astrusis a infenoglin cuartîrs mentâi e paramentâi. Al scjavece il so cuel de cjavece il scjavececuel, e cui puedial dâi colpe? Un Wagner di magmer musicaler. Crêpes Moana & Mandingo, Pane e Nutella, flambé cun ghirigoris di ont. Cerviei svaporâts a iosa e a foia no produsin noie, ma a noie a menin. Salts di ment a vierzin visions di eons di ideis, o ben no, ma intrinsichementri sì condît di no e furnît a forsit.
Puar cui che al cîr significâts dulà che i significâts a mancjin, sior cui che al alucine significâts tal stes lûc, o ben puar compagn pròpit lassantsi lâ a chest gjest, ma cun mancul art.
Al ten il caos, o forsit no, al mancje di sigûr il progjet e l'emisferi çamp al duar tal so cerebrantri endocranic.
Putanâ impudent e impunît, parcè vâstu indevant in te stes? Domande oziose, come che al è oziôs dut il sublim, sublim ecels e sublim infim. L'ozi al è il pari di dutis lis ideis. Se si lis fâs abortî a vegnin fûr i vizis, aborts di ideis. I vizis, plens di dut il podê cangjant des ideis, ma cence di lôr. I vizis no puedin jessi viziôs. I viziôs invezit lu son.
Odiôs viziôs e viziôs noiôs, ducj i doi trascurâts e imperfets. Met che i gjats a sedin mats, se ti 'nt freghis permet che i sacs a colin, no sai se mi spieghi ma o sai che no mi spieghi e lu fâs a pueste, parcè che o ai la muse tueste.
Baste. Cui che si impaste a pueste cun peraulis metudis a câs al finìs mâl. No rivi. Ma mi compiasi di trop che o soi paiaç. O pari il sintiment fûr di se e di me, e diference no 'nd è. La rime e fâs rime parcè che e je in rime. Ma no à la mê stime. Si stime che la rime le vessin te cogome prime, prime dal albâ dal sintiment, e chest lu savìn cul sintiment di dopo, in pratiche cumò. Al albâ dal om si viveve in rie e in rime. Olmis di dutis dôs, entitâts stranis, a restin vuê.
Voltìn il cjâf bandonant la rime o ce che rime al pâr al so destin di dismentean. Une dì tal avignî la rime e sparirà ae fin dai discors e dai pinsîrs umans, par simpri, come che al sparì il pêl de nestre piel e a sparissaran i dincj dal judizi e forsit ancje chei altris. Une dì tal avignî, forsit ancje lontan, in chel spazi metaforic che seont nô al è il timp. Al sucedarà cuant che i significâts che si messedin in nô si saran liberâts dai vistîts di simie e post-simie, e a vivaran dal dut de lôr nature metaforiche, bandonant, come che il madrac al bandone la sô piel vecje, la nature formâl antighe musicâl-ritmiche.
Us isal scûr ce che jo fin cumò o ai dit? Sêtint contents. Al è scûr ancje par me o cussì o fâs fente che al sedi te pôre che lu sedi pardabon ancje se a mi mi pâr di no.
Scusait, eh.

Roberto Quaglia





Lasse un Coment.

Lei i coments di chei altris.

Mi plâs! Mi plâs! Mi plâs!

Indiç des letaris.

Cuviertine.

Ma cui isal Roberto Quaglia?





La opare "Cjâr Maurizio Costanzo Show...", dute o in part, e pues jessi leiude, discjamade sul computer, stampade e copiade cence limits, dome par ûs personâl. Ducj i tescj e lis ilustrazions a son proprietât di Roberto Quaglia e no puedin jessi doprâts dal dut o in part cence autorizazion. Il progjet grafic e lis componentis grafichis di chestis pagjinis a son proprietât riservade di Roberto Quaglia. La opare "Cjâr Maurizio Costanzo Show...", dute o in part, no pues jessi metude in vendite a nissun titul cence autorizazion prime.
© 1994-2000 Roberto Quaglia.




















Condivît:FacebookXWhatsAppTelegramEmail