
 |
PIÇULE STORIE DE FANTASIENCE
Cjâr Maurizio Costanzo Show,
O continui a notâ che di te si fevele di dut, fûr che di fantasience. Cussì, a benefici de Umanitât Taliane, che di solit tu sês paladin tu plui di tancj altris, mi cjati invezit obleât a fevelâ un pôc jo. Ce ise la fantasience? Cemût ise nassude? Cuant ise nassude? Parcè ise nassude? Partìn dal inizi, cioè dal secul passât.
Tal mont ocidentâl, fin ae rivoluzion industriâl dal disenovesim secul, l'avignî de societât al jere pal individui un "ambient" che nol sveave curiositâts particolârs. Il progrès tecnologjic al trasformave za di milenaris la societât - al è vêr - ma il disvilup, ancje sveltint di continui, nol jere mai stât facil di percepî pal individui in prime persone. Tal arc di une vite umane, a jerin ben pôcs o adiriture nissun i progrès tecnologjics e lis trasformazions dal vivi di ogni dì che la societât e produseve. Si nasseve e si deventave vecjos intun mont che al cambiave masse planc par rivâ a inacuarzisi che la onde dal cambiament e sarès lade indevant dopo de proprie muart. Il fi di un cjaliâr al imparave il lavôr dal pari par po une dì passâlu al so fi, e nol jere nissun riscji che intant cualchidun altri al inventàs un gnûf sisteme automatizât pe produzion di scarpis. L'avignî tecnologjic nol esisteve, a nivel de cussience comune. Ce che al jere, al sarès simpri stât ancje dopo. Lis invenzions sporadichis che ancje, tai milenaris, a vevin fat fâ pas di gjigant ae specie umane, a jerin consideradis ecezions miracolosis a une regule di imutabilitât de tecnologjie. Lis invenzions de umanitât, raris tal cors di une vite umane, a jerin assimiladis come une magjie che di colp e deventave pussibile, e duncje acetadis come une gnove norme, un travuart prodigjôs rivât oltri dal cuâl nuie di gnûf al pues plui jessi inventât.
Il Ream dal Ignot nol jere duncje tal avignî (che la cussience comune si imagjinave cuasi compagn dal presint), ma in altre bande, intun altri lûc. Al jere in altre bande, intun paîs lontan, di là dai confins dal mont cognossût, tal Ream dai Cîi e in mil altris localitâts imagjinariis che si consumavin aventuris maraveosis e vicendis aliens. La imagjinazion, tai sumiadôrs che a vevin une imagjinazion potente, e esplorave simpri tal spazi e mai tal timp, parcè che al jere ametibil che a lûcs lontans a podessin corispuindi contescj no cognossûts, (dopo dut, ogni tant cualchidun al tornave di viaçs lungjissims contant che pardabon a esistevin lûcs dal dut diferents dai propris, abitâts di personis cun musis, usancis e costums une vore diferents), ma al jere dal dut inametibil che a moments temporâi lontans (tal avignî, naturalmentri) a podessin corispuindi contescj diferents di chel presint. A dimostrazion di dut chest si consideri dute la leterature fantastiche vignude fûr de umanitât par milenaris: no 'nd è cuasi olme di narazions dulà che la alienitât dal contest e sedi rapresentade di un spostament de azion dilunc dal ass dal timp, viers l'avignî, intant che invezit a son tantis lis storiis di viaçs in lûcs aliens parcè che lontans tal spazi.
Chest stât des robis al cambià une vore cu la rivoluzion industriâl dal disenovesim secul. Il sveltiment dal disvilup tecnologjic al causà trasformazions tant frecuentis te vite des personis, di no rindi plui inametibil il concet che il disvilup tecnologjic al varès podût tal avignî trasformâ ancjemò la vite des personis.
Il rifles di chest su la leterature al fo che e nassè la fantasience (par inglês, in mût plui just: science fiction, cioè leterature di sience). Mary Shelley (la femine dal famôs poete) e ipotizà che i progrès te biochimiche e te chirurgjie a varessin une dì permetût di tornâ a gjenerâ in laboratori la vite, e e scrivè Frankenstein. Jules Verne, ancje restant ancorât ae tradizion che e cirive la alienitât in altre bande, midiant viaçs, al ipotizà che a saressin stâts i progrès tecnologjics a rindi pussibii i siei viaçs tai lûcs plui disparâts. H.G. Wells, ispirât de convinzion sientifiche de epoche che Mart al podès ospitâ vite extraterestre, al scrivè "La vuere dai monts", il prin romanç dulà che la tiere e vignìs invadude di extraterestris. Tal 1926 Hugo Gernsback, tai USA, al fondà la prime riviste specializade in leterature di fantasience, ma al fo dome cu la iruzion di John Campbell Jr., tal 1938, ae vuide de riviste Astounding Stories, che une gnove e foltissime schirie di scritôrs si formà, dant il vie a chê che e fo dopo clamade "La etât dal aur de Fantasience". Ricuardìn, di cheste gnove gjenerazion di autôrs, trê nons che forsit o varês za sintût: Isaac Asimov, Robert Heinlein, Arthur Clark. In cheste fase, i temis dominants des storiis a deventarin, pe prime volte, estrapolazions rigorosamentri sientifichis sul progrès futûr de tecniche. La esplosion sconcertante de bombe atomiche su Hiroshima e spiegà cence dubis al mont che l'avignî al jere za scomençât, e simpri plui int si interessà ae fantasience par cirî di capî cemût che al varès podût jessi l'avignî.
Po e fo inventade la television. I letôrs di narative tradizionâl a bandonarin in masse i libris par dedicâsi al lôr gnûf passetimp che nol mûr mai. Ma i letôrs di fantasience a cresserin, e cussì ancje i autôrs.
De seconde metât dai agns cincuante in là, e par ducj i agns sessante, la fantasience e jentrà intune gnove fase, che e fo clamade "New Wave". Lis storiis su la sience e i sienziâts no jerin plui al centri de atenzion. Protagoniste de gnove fantasience e deventà la int comune, che e subive i efiets dai progrès tecnologjics. Lis estrapolazions dai scritôrs no jerin plui limitadis aes pursis invenzions tecnologjichis, ma si aventuravin ancje te sociologjie e te psicologjie. La fantasience e jere cressude e madurade, si jere inricjide. E veve fat iruzion cun prepotence tal cjamp la satire sociâl.
Tai agns otante al nassè il moviment cyberpunk, ancjemò vuê rigoglios, clamât ancje neuromantic (di Norman Spinrad). I personaçs neuromantics, tai romançs cyberpunk come fûr di lôr (il moviment cyberpunk al è difat strabocât dai siei rivâi leteraris par deventâ un fenomen sociâl), a son dispès une gnove gjenerazion di ribei tecnologjizâts. Il disvilup cence freni de informatiche al indûs in plui a crodi che tal avignî il concet stes di realtât al podedi jessi dal dut trasfigurât, e lis estrapolazions su chest a flochin. La "Realtât Virtuâl" e je par nô ancjemò dome un videogame, ma tal avignî...
La fantasience no si ferme achì. Nô invezit sì.
Roberto Quaglia
La opare "Cjâr Maurizio Costanzo Show...", dute o in part, e pues jessi leiude, discjamade sul computer, stampade e copiade cence limits, dome par ûs personâl. Ducj i tescj e lis ilustrazions a son proprietât di Roberto Quaglia e no puedin jessi doprâts dal dut o in part cence autorizazion. Il progjet grafic e lis componentis grafichis di chestis pagjinis a son proprietât riservade di Roberto Quaglia. La opare "Cjâr Maurizio Costanzo Show...", dute o in part, no pues jessi metude in vendite a nissun titul cence autorizazion prime.
© 1994-2000 Roberto Quaglia.
|