‹ Indiç dal sît · Pagjine dal museu · repert restaurât
Condivît:FacebookXWhatsAppTelegramEmail
Vilipendi de fantasience (Cjâr Maurizio Costanzo Show... letare n.36)
letare n.36

No sta sotvalutâ il podê de stupiditât umane.

ROBERT HEINLEIN






















VILIPENDI DE FANTASIENCE

Cjâr Maurizio Costanzo Show,

o ai let lis letaris di prime scritis dal gno alter ego (si disial cussì?), diret intant che lis scriveve, stant che jessint jo tal so cjâf cuintri de sô volontât o podevi benon sbirçâ, traviers i voi che o vin in multiproprietât, lis peraulis tal moment esatissim che lui lis scriveve pardabon.
Jo o crôt benon che i UFO a esistin. Se no esistin, parcè ise la peraule par clamâju? Dutis lis robis che e je la peraule a àn di esisti par fuarce parcè che se no nol à nissun sens che e je la peraule. Se jo o dîs che al è il tramont, lu pues dî dome parcè che o ai viodût che al è pardabon. Chei altris mi capissin dome parcè che ancje lôr a san ce che al è il tramont. Ducj o savìn ce che a son i UFO, alore al è automatic che chescj a esistin in mût automatic par fuarce pardabon cence dubi.
Alore no capìs parcè che chê altre persone che o soi ancje jo e à dit tes letaris passadis tantis robis che no stan ni in cîl ni in tiere e duncje no puedin jessi nissun UFO (biel zûc di peraulis, no? eh!).
La veretât e je che i marzians a son, di cualchi bande, ma no son achì, parcè che se a fossin achì no saressin marzians, come che nus dîs la logjiche. E i UFO a son naturalmentri i discs svoladôrs, come che ognun al à podût notâ cuant che a son comparîts achì e là. E i UFO a son plens di marzians, ma int stan tancj parcè che a son piçui.
Alore no capìs ce che al è cussì tant di dî su cheste fantasience, che po in pratiche no sarès altri che i films sui UFO e cun ducj chei efiets speciâi par tirâ lis personis al cine. Ma a mi no mi freain! Jo o spieti che i films a vegnin in television.
Jo o soi convint che a son za stâts tancj incuintris ravicinâts. I extraterestris no son triscj, o almancul, no son tristissims, ma a podaressin deventâlu di un moment al altri. Se a fossin tristissims nus varessin za distrûts, chest al è clâr. Invezit nus controlin, par viodi cemût che si compuartìn, parcè che par lôr o sin impuartants, ancje se no sai parcè. A podaressin jessi ancje extraterestris mascarâts di jessis umans. I extraterestris a puedin fâ dut, dopo dut a son marzians! Jo o crôt che bisugne stâ atents a chei che a fevelin di chestis robis fasint tante confusion. A son i UFOLICS serios, che a van rispietâts, e ci mancjarès! Ma po a son chei come chel tip che o soi jo cuant che lu soi (scusait se no soi clâr), che a disin tantis peraulis che no vuelin dî un biel nuie, e che a coventin dome a convinci ducj nô che lôr int san plui di nô! Ma jo no mi fâs freâ! Se chescj biei tips a àn vût cualchi incuintri ravicinât, ancje dal tierç tip, lu àn di dî in mût clâr e magari fâ viodi ancje cualchi fotografie o miôr e sarès une videocassete. Se no lu àn vût alore che a stedin cidins parcè che ce vuelino savênt plui di chei altris che magari cualchi incuintri ravicinât lu àn ancje vût, in mût discret. O speri di jessi stât clâr.
Ce vuelino spiegâmi a mi ce che e je la fantasience?!!! Lu sai benon!! O ai la videocassete di Guerre Stellari e o ai viodût ancje ducj i films che a son vignûts dopo. O ai viodût ancje i films plui bruts, come Blade Runner, che difat no mi è plasût parcè che nol è pussibil che il marzian nus vegni a fâ la morâl e ae fin al vedi ancjemò reson lui ancje se cun reson al mûr.
Jo o crôt che tal avignî la fantasience e à di deventâ par fuarce plui impuartante, parcè che cui computers moderns a puedin fâ simpri plui efiets speciâi, e cuant che al sarà un incuintri ravicinât uficiâl chest i fasarà ancje un grum di publicitât (ae fantasience). Par trop che e deventarà impuartante, la fantasience e sarà però simpri une conseguence de UFOLOGJIE, di chest o soi sigûr. Po soredut cumò che a àn fat ducj chescj telescopis moderns potentissims cun cuâi si podarà di sigûr viodi i discs svoladôrs ancje une vore plui di lontan e ingrandîts.
Jo po o ai ancje une teorie personâl, che no dîs a nissun ma a ti che tu sês il Maurizio Costanzo Show o pues dîle. A son un grum di personis famosis che probabilmentri a son extraterestris mascarâts, o ben a son in contat cun lôr. No vuei dî i nons, se no si inacuargin che ju ai scuvierts e come simpri mi sopprimin. Se tu mi invidis te tô trasmission ti spieghi ducj i particolârs, ma tu âs di prometimi di no invidâ ancje chê altre persone che e je ancje dentri di me e che si crôt cussì inteligjente dome parcè che lu è, parcè che se al ven ancje lui po sul plui biel, cuant che o ai di fevelâ jo, mi pare vie de vuide dal cerviel e si met a dî dutis lis monadis che al dîs simpri par confondi lis personis plui semplicis come me, e cussì al finìs che tu mi âs invidât par nuie.
Jo ju odei chei che a fasin i superiôrs leint i libris di fantasience! No si inacuargino che a son ridicui? Dutis lis personis normâls la fantasience le cjalin cun reson dome al cine o in tivù, e se pardabon si apassionin a deventin UFOLICS. Tai libris no 'nd è di sigûr nuie di plui che al cine: tai libris a son dome lis peraulis, ma chestis a son ancje al cine o in tivù, difat i personaçs a fevelin, no? Ma al cine e in tivù a son ancje lis imagjins, la azion, il sun stereo e in ciertis salis ancje il sorround o come diaul che si clame. E po i libris a son une invenzion di cuant che no jere la television. Se e fos stade la television, i libris no ju varessin inventâts di sigûr, chest al è sigûr! E il cine e la tivù ju àn inventâts pròpit parcè che i libris a jerin masse noiôs. E po nus àn insegnât che bisugne vivi cu la democrazie, che e vûl dî che la maiorance e à simpri reson. E alore jo o sfidi chescj presuntuôs, come chel sapienton che al è ancje di cualchi bande dentri di me, a dî che la maiorance e preferìs i libris al cine e ae tivù! La maiorance i libris ju coparès subit, cheste e je la veretât, e al è pardabon antidemocratic che no si vedi za proviodût a fâlu di timp!
Soredut cui libris di fantasience la diference e je teribil. I efiets speciâi, contâts sul libri, cence figuris, mi fasin dome une tantissime pene. Par furtune no ai mai let chescj libris, ma mi imagjini che la descrizion a peraulis dai efiets speciâi e sedi la robe plui stupide che o rivi a imagjinâmi. E se di un libri di fantasience tu i gjavis la descrizion dai efiets speciâi, ce i restial?

Roberto Quaglia





Lasse un Coment.

Lei i coments di chei altris.

Mi plâs! Mi plâs! Mi plâs!

Indiç des letaris.

Cuviertine.

Ma cui isal Roberto Quaglia?





La opare "Cjâr Maurizio Costanzo Show...", dute o in part, e pues jessi leiude, discjamade sul computer, stampade e copiade cence limits, dome par ûs personâl. Ducj i tescj e lis ilustrazions a son proprietât di Roberto Quaglia e no puedin jessi doprâts dal dut o in part cence autorizazion. Il progjet grafic e lis componentis grafichis di chestis pagjinis a son proprietât riservade di Roberto Quaglia. La opare "Cjâr Maurizio Costanzo Show...", dute o in part, no pues jessi metude in vendite a nissun titul cence autorizazion prime.
© 1994-2000 Roberto Quaglia.




















Condivît:FacebookXWhatsAppTelegramEmail