‹ Indiç dal sît · Pagjine dal museu · repert restaurât
Condivît:FacebookXWhatsAppTelegramEmail
Plui television par ducj! (Cjâr Maurizio Costanzo Show... letare n.29)
letare n.29

Al è l'unic che o cognòs bon di pensâ a une robe ae volte.

MARIO QUAGLIA






















PLUI TELEVISION PAR DUCJ!

Cjâr Maurizio Costanzo Show,

jo o soi chel che o soi. Cioè, scusait se no sai cemût spiegâlu, ma jo o soi chel che ti scrîf dutis chestis letaris inteligjentis, ancje se par furtune o pues ben vantâmi di no jessi lui. Jo o sai che lu soi parcè che la anagrafe mal garantìs. Ma o sai ancje che le pensi in mût diferent di cemût che al dîs di pensâle lui, epûr cuant che mi cjali tal spieli il cuarp e ancje la muse a son pròpit chei stes. La muse di fat e cambie un pôc te espression. Cuant che o soi il me stes di cumò o ai une muse plui normâl e une espression principâl sole, biele semplice come che al conven. Cuant che o soi il me stes inteligjent o ai espressions, ancje su la muse, che no capìs e al è miôr cussì. Ce m'interessino, difat? Jo o sai che o soi parcè che cogito ergo sum (o sarai semplic ma no soi mighe cretin). E o sai ancje che al è lui, parcè che dut som o sin tal stes cuarp, ancje se a turni. O soi sigûr che ancje lui al sa che o soi jo dutun cun lui tal stes cuarp a turni, parcè che dopo dut l'inteligjenton al è lui. Ma o crôt ancje che si vergogne di me e alore nol ametarà mai. O vês di cjapâlu sul fat cuant che il so cuarp al è doprât di me, filmâlu e po fâi notâ che al è lui, cioè che duncje nol è mighe po simpri cussì inteligjent come che i plâs invezit fâ viodi di jessi. E se us dîs che chel tal film nol è lui ma il so fradi gjemel handicapât no stait a crodii! Al è pròpit lui, dome che in chei moments o stoi controlant jo il nestri cuarp. I fâs viodi jo cui di nô doi al è plui se stes di chel altri!
In ogni câs o volevi dî di no dâi bade aes monadis che us à contât te sô ultime letare. Cheste storie de ment che e à lis dôs stanziis e je une monade. Intant al è assurt il fat che la ment e je un bilocâl. E po, seont lui Diu al è intune di chestis dôs stanziis e ogni tant al citofone in chê altre par dîi ce fâ. Ma cemût fasial Diu a stâ sierât intune stanzie (che po tra l'altri mi vês di spiegâ dulà che cheste stanzie si plate tal cerviel plen di materie grise) se come che ducj a san Lui al è ubicuo?
Dal so discors nus trate come se nô o fossin une specie di nemâi che o stin deventant umans ma che al covente ancjemò un grum di timp. Ben, nemâl al sarà lui, jo mi sint umanissim cuasi ogni dì. Cuant che o recite lis mês poesiis che o scrîf cuant che mi ven la tristece mi sint une vore poetic e soredut tantissim uman. E cuant che o dîs dutis lis mês preieris a Diu mi sint pardabon bon, e puedial un nemâl sintîsi bon? No, o dîs jo, se mi sint bon al vûl dî che o soi uman e che o soi ancje bon, se no mi sintarès trist. Difat, cuant che par sbali o soi trist (no soi perfet), mi sint ancje trist, e dopo o ai di confessâmi e al è just che al è cussì. Dopo che mi confessi mi sint bon di gnûf, e cussì se po mi capite di gnûf par sbali di jessi trist, la tristerie no si ingrume, e in gjenerâl jo o resti bon. Lis personis tristis come Hitler a sintin di jessi tristis ma no si confessin, cussì la tristerie si ingrume e ae fin a son obleâts a copâsi, o in ogni câs a finî tal infier, come che al è just, par furtune, ci mancjarès altri che po si ju cjatìn in paradîs a tradiment!
E po ce ise cheste storie che la television nus mandarès in "trance"? Jo chest "trance" no sai mighe dulà che al è e no soi mai stât. Mal visarès, se no! Jo o cjali tantissim la television, parcè che al è il gno hobby, e parcè che o sint che mi fâs ben. E no ai mai viodût il "trance". O cjali ancje i films piçants, al è vêr, chei che o fitui lis videocassetis parcè che li int fasin di ducj i colôrs, ma un puar Crist come me che dutis lis feminis mi dan un tai ce aial di fâ, eh? Al è une vore miôr che mi sodisfi di bessôl cuntune biele videocassete piçante che no lâ ator a violentâ lis siorutis par ben, come che a disin te television. Ogni tant, a sintî te television che e je tante int che e stupre mi ven la tentazion di fâlu ancje jo, ma o ai pôre di no rivâ a stuprâ ben, che sul plui biel po al ven fûr chel inteligjent che al è dentri di me che po mi dîs: "Ou! Ce fâstu?! Che o finìn ducj i doi in preson!"
No ai tancj amîs, anzit, jo no 'nt ai pròpit. Ducj i amîs che o varès invezit ju à chel altri là che al è inteligjent dentri di me ma che cumò al sta cidin. Ve i vantaçs de inteligjence. Ti fasin puartâ vie i amîs al te stes plui semplic che tu âs dentri (ancje se cumò jo o soi di fûr e di dentri al è lui). Jo no varai amîs, ma cu la television al è come se invezit 'nt ves plen, di amîs. Ju cognòs ducj, dal vieli Pippo Baudo ae biele e simpatiche Ambra, e mi semee di cognossiju cussì ben che se ju intopi pe strade o soi cuasi convint che mi cognossin ancje lôr. A cualchidun i spudarès, come a chel Sgarbi che i spudaressin ducj chei che le pensin come me. Chel altri me stes al è invezit di chei che si fasin freâ de sô parlantine e lu stan ancjemò a sintî. Fantozzi po al è come un barbe par me. Jo lu ai intopât une volte, che par cjoli vie lu clamavin ducj siôr Villaggio e lui si compuartave come se ancje lui come me al ves dentri di se un plui inteligjent che ogni tant i cjape la man e ancje il cuarp. Jo alore a Fantozzi i ai strenzût la man, e dopo un pôc lui mi à dit "mandi roberto". Viodût che alore no soi dome jo a cognossi chês personis famosis, che mi somein come miei amîs, ma ancje lôr a cognossin me? Une volte che la Television e jere rote o soi stât mâl ancje jo. Par tancj dîs o ai rinunziât ae mê cuote di cuarp e o ai lassât il comant a chel altri inteligjent che o ai dentri. A lui i plâs cuant che no je la television. Vêso capît ce raze di persone che al è? No si vergognial nancje? Seont me la int e cjale masse pôc la television. Al è dimostrât che cui che le cjale di plui al vîf miôr parcè che al à mancul preocupazions. Jo ti sugjerìs, caro Maurizio Costanzo Show, che tu vierzis une campagne par rindi obligatorie la television tes scuelis. Se i fruts a podessin cjalâ la television ancje tes scuelis, e jo o soi sigûr che tal avignî lu fasaran parcè che la civiltât par furtune e va indevant, a cressaressin une vore miôr, deventant di grancj pròpit ducj come me ma cence la sfortune di chel inteligjent dentri che ti rompe lis scjatulis, che cence di lui dentri che ti secje simpri si podarès jessi cussì contents...

Roberto Quaglia





Lasse un Coment.

Lei i coments di chei altris.

Mi plâs! Mi plâs! Mi plâs!

Indiç des letaris.

Cuviertine.

Ma cui isal Roberto Quaglia?





La opare "Cjâr Maurizio Costanzo Show...", dute o in part, e pues jessi leiude, discjamade sul computer, stampade e copiade cence limits, dome par ûs personâl. Ducj i tescj e lis ilustrazions a son proprietât di Roberto Quaglia e no puedin jessi doprâts dal dut o in part cence autorizazion. Il progjet grafic e lis componentis grafichis di chestis pagjinis a son proprietât riservade di Roberto Quaglia. La opare "Cjâr Maurizio Costanzo Show...", dute o in part, no pues jessi metude in vendite a nissun titul cence autorizazion prime.
© 1994-2000 Roberto Quaglia.




















Condivît:FacebookXWhatsAppTelegramEmail