‹ Indiç dal sît · Pagjine dal museu · repert restaurât
Condivît:FacebookXWhatsAppTelegramEmail
Cu la Tivù tal cerviel (Cjâr Maurizio Costanzo Show... letare n.28)
letare n.28

«...e Mike Bongiorno al comparì tes TV di ducj i salots e al disè: "Comprailu, al è il gno persut", e i fedêi a ubidirin, e a comprarin il persut, parcè che cussì al veve dit Mike Bongiorno...»

dal Vanzeli seont Quaglia,
an 2000 d.TV. (dopo TV)






















CU LA TIVÙ TAL CERVIEL

Cjâr Maurizio Costanzo Show,

intune mê letare che o speri che tu vedis ricevût o ai esponût i trats fondamentâi de teorie de ment bicamerâl (di Julian Jaynes). In altris letaris o ai sviscerât argoments ator de impuartance evidente che la television e à te nestre societât. O indicavi la television come il nestri principâl totem contemporani, come la nestre religjon no declarade, sostitude de religjon tradizionâl e contignidore dai siei rescj. La television e fâs une multitudin di funzions, cualchidune des cuâls a saressin chês che di simpri a son di competence de religjon.
Cumò provìn a viodi ce che al sucêt messedant dut. I sparagni a cui che al lei chê analisi aprofondide plene soredut di premessis e citazions che al sarès gno dovê fâ se o fos come che no soi un sociolic conclamât, o psicolic, o filosof o in ogni câs un alc conclamât, cualchidun cioè paiât par fâlu. Stant che invezit, tal moment che o scrîf, o met dal dut a gratis al servizi di cui che mai al ves la ventura di leimi i prodots des mês riflessions, mi concêt il vizi di saltâ libar di pâl in frasche cuant che mi vignìs il ghiribiç di fâlu, e in ogni câs di vignî subit al dunque, cence anoiâmi a scrivi ce che tal moment che o scrîf no provi il gust di scrivi.
Cemût si inserissie la Television te teorie de ment bicamerâl? Benon, graciis. Seont la teorie de ment bicamerâl, te ment di ducj nô al è un vueit graziosissim, che la Television e jemple in mût maraveôs. Al è il vueit dai dius. Tai timps dai Egjizians, dai Aztechis, e di ducj chei là plens di divinitâts, te ment umane, la cussience come che nô le cjatìn in nô stes no esisteve. L'emisferi diestri dal cerviel, cjapade une decision su ce che al veve di jessi fat, le comunicave cun peraulis, cuntun ordin perentori, al emisferi çamp, che al veve leteralmentri la esperience di sintîle, e in mût automatic e cence critiche al ubidive, parcè che nol veve il spazi mentâl de cussience par fâ une mediazion dialetiche cussiente tra lis sieltis pussibilis. I ordins sintûts a jerin lis vôs dai dius, che ognun al sintive di continui, come che e testemonee DUTE la leterature antighe. Al jere tal ordin des robis che l'emisferi çamp al ubidìs simpri ai ordins che al ricevève dal emisferi diestri, parcè che chel le saveve lungje, tant al è vêr che al vignive considerât un diu. Si ubidive duncje aes alucinazions uditivis, ma ancje a chês visivis, usuâls ancje lôr e de stesse origjin.
Po i dius a tasarin, sostituîts de cussience, che in mût plui eficient e integre lis funzions diferentis dai nestris doi emisferis cerebrâi. Ma il vueit al è restât, a ducj i nivei. A nivel organic, o cjatìn une largje aree di cerviel no doprade tal emisferi diestri. E jere la cjase dai dius, la oficine des vôs e des alucinazions. Cualchi volte e je ancjemò vuê si svee, soredut tai periodis di stress, dant fûr cualchi vision scjarse e vôs plui frecuentis che in gjenerâl no durin. A nivel mentâl, il vueit si tradûs intun sens di nostalgjie pe inocence pierdude, de autoritât benevule che nus guidave tes nestris azions, e di refût de responsabilitât acuisîde.
La Television e jemple in mût maraveôs chest vueit che al è durât milenaris. E je prime di dut une alucinazion visive e uditive. Ce che midiant di jê al sucêt tai nestris tinei, che e sedi une conversazion, un spoiarel, une partide di balon o une esplosion nucleâr, al è evidentementri une ilusion, cioè alc che al semee vêr a ducj i efiets (tant al è vêr che i crodìn), ma che evidentementri nol è, difat no nus fâs dam o no nus sodisfe plui di tant ni la esplosion nucleâr ni il spoiarel.
Une des olmis de ment bicamerâl e je il stât di trance. Il fenomen de ipnosi al finìs di jessi un misteri, considerât te clâf di cheste teorie. Cuant che si è in trance la cussience si atenue une vore, e la nestre disposizion mentâl e devente une vore cence critiche. Te epoche bicamerâl, cuant che l'om al viveve in trance, al jere impuartant che cence critiche al ubidìs simpri ai ordins dai dius dal so emisferi diestri.
La Television, al è dimostrât, e indûs in cui che le cjale un stât di trance temporani. A cui di nô no i è sucedût di impiâ un moment la television e po di restâ tacât par oris a viodi robe che no nus interesse, par po di colp inacuarzisi di vêsi fat freâ une altre volte? O disarès che chest al è ce che nus sucêt ancje ogni dì, se no stin plui che atents. La Television nus cjape pal so podê di mandânus in trance, e e ten chest podê pròpit parcè che e jemple il vueit lassât tes nestris ments des alucinazions abituâls dal timp antîc.
Come che lis alucinazions antighis a verin il podê di fâ, la Television e strucje tai nestris cerviei maris di imposizions, di dettâts etics, di modei di compuartament, che nô o assorbìn plui o mancul cence critiche, parcè che cussì o sin stâts usâts a fâ par miârs di agns, cuant che a gjenerâ lis alucinazions o jerin nô stes, o miôr une part cumò cidine di nô stes.
O ten a sotlineâ che il motîf che la Television e je cussì eficiente a inculcânus modei di compuartament al è che nô o sin ancjemò predisponûts ae acetazion cence critiche di diretivis di bande di alucinazions che nus cjapin in stât di trance. L'hardware dal nestri cerviel nol è cambiât gran che, in pocjis miârs di agns. A esistin tai nestris cerviei lis struturis fisichis fatis par fânus ubidî a cui che al à i recuisits de divinitât, e i recuisits de divinitât a son prime di dut: aparizion magjiche, ancje visive, ancje a comant. I nestris vons i domandavin a Diu, o a Giove, o a Apolo, o al Diu Soreli, e Diu, o i siei alter ego, dal profont dai lôr cerviei, simpri al rispuindeve o al comparive denant di lôr. Vuê, come alore, o sin ancje plui e plui voltis al dì obleâts a scoltâ ce che e à di dînus la divinitât, e alore cul telecomant in mût magjic o tornìn a meti la aparizion fedêl di une alucinazion familiâr denant di nô, o parchegjìn la cussience, e o assorbìn diretivis. Cuant che al cussì clamât teledipendent il televisôr si vuaste, confusion e nevrosi lu cjapin, compagn di cemût che chescj sintoms a cjaparin i nestris vons di cualchi miâr di agns indaûr cuant che lis vôs e lis aparizions dai lôr dius a smeterin di comparî regolarmentri ogni volte che lôr lis invocavin. Come i antîcs dai lôr dius, o vin ancje nô bisugne ogni dì des diretivis dal nestri Diu Tivù.
Cualchidun di nô, mancul cence critiche di altris, al rive a sielzi lis diretivis di assorbî, ma simpri dal stes totem lis cjol, simpri de Television.
O crodìn te Television parcè che e je une alucinazion condividude di ducj, come che i dius a jerin une alucinazion condividude di ducj tai milenaris che a forin. Come che tal timp antîc no si fevelave di altri che di ce che a disevin i dius, vuê no si fevele di altri che di ce che al dîs il Diu Tivù.
Stant che, come i dius antîcs alore, la Television e je vuê la principâl font di diretivis, e cause par fuarce ce che e mostre. Vuê la Television e mostre cuasi dome violence, simpri di plui, simpri plui nete, simpri plui reâl, e cussì fasint le cause e le fâs cressi, intun cercli viziôs che nol si pues fermâ che si clame reazion a cjadene. Lis reazions a cjadene a finissin dutis cuntune esplosion. O varìn ancje nô la nestre esplosion.

Roberto Quaglia





Lasse un Coment.

Lei i coments di chei altris.

Mi plâs! Mi plâs! Mi plâs!

Indiç des letaris.

Cuviertine.

Ma cui isal Roberto Quaglia?





La opare "Cjâr Maurizio Costanzo Show...", dute o in part, e pues jessi leiude, discjamade sul computer, stampade e copiade cence limits, dome par ûs personâl. Ducj i tescj e lis ilustrazions a son proprietât di Roberto Quaglia e no puedin jessi doprâts dal dut o in part cence autorizazion. Il progjet grafic e lis componentis grafichis di chestis pagjinis a son proprietât riservade di Roberto Quaglia. La opare "Cjâr Maurizio Costanzo Show...", dute o in part, no pues jessi metude in vendite a nissun titul cence autorizazion prime.
© 1994-2000 Roberto Quaglia.




















Condivît:FacebookXWhatsAppTelegramEmail