‹ Indiç dal sît · Pagjine dal museu · repert restaurât
Condivît:FacebookXWhatsAppTelegramEmail
La manie dai Parcè (Cjâr Maurizio Costanzo Show... letare n.4)
letare n.4

La robe impuartante e je no smeti mai di fâsi domandis. La curiositât e à la sô buine reson di esisti. No si pues che restâ inmagâts, cuant che si contemplin i misteris de eternitât, de vite, de struture maraveose de realtât. Al baste dome cirî di capî un pôc di chest misteri ogni dì. Mai pierdi il gust di une curiositât sante.

ALBERT EINSTEIN






















LA MANIE DAI PARCÈ

Cjâr Maurizio Costanzo Show,

Come i fruts o ai la manie dai parcè, e mi 'nt vanti. La manie dai parcè e je il strument che nô jessis umans o vin par imparâ, come che il stomi al è il strument che o vin par digjerî il mangjâ. Intant che il stomi al funzione par dute la vite, cu lis ecezions di tant in tant des indigjestions, la manie dai parcè e flapìs tai umans grancj e e lasse di se dome cualchi olme vaghe. Finide la etât de cressite, ogni dì al è bon par celebrâ il funerâl de manie dai parcè. La atrofie no je mai dal dut complete. Cualchi piçul parcè al sorevîf in ducj, ma tai umans grancj a son altris lis funzions che a guviernin la volontât: su la sene de ment, butâts jù i parcè si sentin lis certecis cjapadis e i dogmis personâi. Di grancj si domandisi il mancul pussibil e si difindin cun dute la fuarce lis propriis convinzions. Ogni propri cognossince e devente un dogme e si combat o si à pôre di cualsisei che al meti in discussion i fondaments.
Dal dì che la manie dai parcè nus bandone o smetìn di cressi, e o deventìn dome vecjos. Al è par chest che duncje o gjoldi a ogni parcè che in me o rivi a gjenerâ. Tal refudâ il dubi si cuvin chei che a àn rinunziât a cressi e a vuelin dome invecjâ. Di solit si sacrifiche la proprie manie dai parcè sul altâr de praticitât di ogni dì. Si fâs mâl cuant che si è rosseâts dai dubis. Lis certecis a saran ancje falsis, ma a tornin comudissimis cuant che si interagjìs cul mont. Al è une vore afassinant interogâsi su la vere nature di un grues würstel, cuant che si à intenzion di muardilu, e a saressin une vore di robis di domandâsi: "Isal chest pardabon un würstel? Parcè soio convint che chest al sedi un würstel? Saressial chest un würstel se jo no lu considerà tâl? Cui mi sigure che i budiscj no vedin reson e che il würstel nol sedi fat di un purcit che al jere la reincarnazion di Hitler? Cemût puedio mangjâ chest würstel se magari al è il cuarp di Hitler, cuant che ancjemò îr o ai fat la comunion, cioè o ai mangjât pan che forsit (ma cemût fasio a jessint sigûr?) al jere il cuarp di Crist? E ancje se chest würstel nol fos il cuarp di Hitler reincarnât, al è simpri fat dal cuarp di un purcit... isal just che jo lu associ, tal gno stomi e - ancjemò piês - te mê ment, al cuarp di Crist? Cemût puedio shakerâ tal gno stomi il cocktail alucinant di Crist e di un purcit che forsit al jere ancje Hitler? Isal in plui just che o dismenteedi che o stoi par muardi un cadavar? Ma soio sigûr di vê pardabon fan? E ancje se o ves pardabon fan, par cuâl motîf varessio di mangjâ? No saressial plui dignitôs refudâ la mê nemalitât e lassâmi murî di fan? Prime o dopo o sarès muart in ogni câs... e forsit cun mancul dignitât... Se jo o fos il würstel e il würstel al fos me, mi plasarèssial jessi mangjât di me? E cemût puedio cumò mangjâ chest würstel che si è sglaçât intant che mi fasevi dutis chestis domandis gratuitis e se po (par vendete?) mi restàs sul stomi?" Vint di mangjâ un würstel, al è miôr mangjâlu e vonde, cence stâ a fâsi masse domandis. In maniere compagne, dispès, vint di vivi, al è miôr vivi e vonde, cence stâ a fâsi masse domandis. Fasint cussì, però, il riscj al è di mangjâsi il würstel sore pinsîr, cuasi cence inacuarzisi e, tal stes timp, di vivi la proprie vite sore pinsîr, cuasi cence inacuarzisi, e chest, stant che si vîf une volte sole, al sarès un pôc un pecjât, parcè che alore al deventarès leciti cambiâ - come che cualchidun al à fat pardabon - il famôs dît in "NO SI VÎF NANCJE UNE VOLTE.", rindint inevitabil ancje la autogjenerazion di un dît colateral: "NO SI MANGJE NANCJE UN WÜRSTEL."
Intant che di une bande al è une vore pratic passâ une vite di grant serene cence curiositâts impetuosis e cence dubis che a scotin, (e cualsisei che al sta vivint la sô vite cussì al aprovarà di sigûr chest argoment), al è altritant vêr che il simbul de vite al è il gust zovenil cence frens, e no la inercie cumpassade dai vecjos. Ogni frut al è un gjeni, se paragonât a un grant. E un gjeni al reste fintremai che la manie dai parcè no tache a bandonâlu. Nol è un bandon che al ven dut intun colp. Al è invezit une muart lente. Cualchidun al ten grancj tocs de curiositât di frut par dute la vite e al devente un sienziât, o un grant savi. Altris a rinunziin a 18 agns a ogni altri savê e di chel moment a invecjin e vonde. Ju cjatis a 40 agns e po a 50 e a 60 cu lis stessis ideis dai vincj agns, intant deventadis vecjis, fûr dal timp e ridiculis, che si disin braurôs, parcè che su di lôr e dome su di lôr e je fabricade la imagjin semplice che chei a àn di se.
Ma il svilup culturâl incredibil de umanitât, che in pocjis miârs di gjenerazions e je passade dal Om-Simie-Cjaçadôr al Astronaut, nol è sucedût par vie dai continuadôrs inerts des proceduris imparadis te adolessence, cioè chei invecjâts prin dal timp, cioè la plui part braurose des propriis certecis. Il svilup culturâl incredibil de nestre specie al è il frut dal pensâ e dal fâ tai secui di chê piçule percentuâl di grancj cu la manie dai parcè, cjalâts simpri cun suspiet di ducj chei altris pe diversitât des lôr ideis e pe ostinazion des lôr curiositâts.
Une des armis vincentis de specie umane rispiet a chei altris mamifars, tal cors de evoluzion, e je stade la strategjie di slungjâ chês funzions dal imparâ che o clamìn "zûc" e "curiositât di frut" e che a son propriis di ducj i mamifars. Cjalait i gjatuts intant che a zuin, fasintsi agùats un cul altri: a stan imparant a cjaçâ. O cuant che, curiôs, a ficjin il music dapardut: a stan esplorant il teritori. Ma la infanzie dai gjats e dure pôcs mês. Chê umane cuasi vincj agns. Cuant che la infanzie e finìs, zûc e curiositât a cessin, lassant di se dome olmis vaghis, e ce che i individuis a son, a restin, cence imparâ plui nuie di impuartant.
Gjavât i grancj che a son ancjemò un pôc fruts, animâts de manie dai parcè, pronts cun passion ai zûcs gnûfs, che come i fruts no si cjapin masse sul seri, e come i fruts no son capîts di chei altris grancj. E cuant che un zûc inventât di lôr al puarte vantaç ae umanitât, dopo e dome dopo il lôr non al devente une etichete positive.
La "storie" e je determinade di pôcs, che oltri ae fadie di determinâ la storie a àn vût di cjamâsi il pês di strissinâsi daûr la zavore dai imobii.

Roberto Quaglia





Lasse un Coment.

Lei i coments di chei altris.

Mi plâs! Mi plâs! Mi plâs!

Indiç des letaris.

Cuviertine.

Ma cui isal Roberto Quaglia?





La opare "Cjâr Maurizio Costanzo Show...", dute o in part, e pues jessi leiude, discjamade sul computer, stampade e copiade cence limits, dome par ûs personâl. Ducj i tescj e lis ilustrazions a son proprietât di Roberto Quaglia e no puedin jessi doprâts dal dut o in part cence autorizazion. Il progjet grafic e lis componentis grafichis di chestis pagjinis a son proprietât riservade di Roberto Quaglia. La opare "Cjâr Maurizio Costanzo Show...", dute o in part, no pues jessi metude in vendite a nissun titul cence autorizazion prime.
© 1994-2000 Roberto Quaglia.




















Condivît:FacebookXWhatsAppTelegramEmail