
 |
MET CHE I MÎTS MATS NO SEDIN MÛTS E IMOBII
Cjâr Maurizio Costanzo Show,
un dai mîts modernis che la Television nus puarte al è l'umorisim. Un altri dai mîts che a incalcin al è il lengaç volgâr. Mît che al cres di resint al è ancje il straparlâ, simbul clâr positîf (e in part, naturalmentri, contrastât) de no-conformitât. Stant che mi rivolç a ti, Maurizio Costanzo Show, simbul ideâl de Societât Televisive Taliane, e rivolzintmi a ti e traviers di te jo cumò in maniere virtuâl o feveli ae Italie interie, al è util a mi e al letôr-utent che jo no fasi di mancul di chescj trê mîts che a vegnin sù, e duncje in maniere coerente o furnissi, di tant in tant, in cheste e/o tes letaris che a vignaran o passadis, la mê prose di semantemis modernis e legris, magari straparlant. In altris peraulis, che jo o fichi framieç des riis cualchi element di tirade volgâr, inserzions di delìris a teme, cualchi biele batude frede e, plui di râr, cualchi batude fine. Duncje, tant par scomençâ, al è ore che o fermi di fevelâ in maniere intorteade, e che lis mês frasis a deventin plui semplicis e claris, e ancje i concets plui clârs, plui banâi, plui democratics, plui dongje de int. Stant che chestis mês letaris che ti mandi, ae fin, a deventaran forsit un libri che cualchidun, leint chestis riis, magari al sta za leint dopo vêlu comprât o fat imprestâ di un amì o vêlu ricevût in regâl par Nadâl de none cjapade dal titul che al tire, no volarès mai che po a pensassin che o vuei fâ l'inteletuâl come i tancj alberoni e che il libri al è une lagne mate e che in pratiche ur ai fregât i bêçs dal presit dal libri, parcè che difat il libri al costave un grum come oramai ducj i libris, e po dentri dal libri, cioè chi dentri (cuant che cheste letare e sarà part di un libri), no si capìs une bale di ce che o dîs e al jere miôr no comprâlu, duncje no volarès mai che ae fin si passin la peraule e il libri no lu compre nissun. Ve, al jere miôr se o fasevi une frase plui curte, al è che cuant che o tachi a fevelâ mi lassi puartâ de passion e soredut des peraulis, tal sens che int scrîf un grum dutis in file e ae fin mi cjati cun frasis cussì lungjis come chê di prime e in ogni câs ancje cheste chi no scherce.
O disevi che cheste letare e je une letare, parcè che difat jo o stoi cumò scrivint une letare e o ai za pronte ancje la buste, epûr e je ancje un toc di un libri, parcè che ti zuri che int fasarai un libri, e cui che lu à za in man lu sa. Cualchi volte o disarai robis seriis, parcè che un altri dai mîts mats che nus à insegnât la Television al è che al è impuartant dî robis seriis. Chest mît a nô nus al à insegnât la Television, ma al è un mît antichissim. Cuant che la Glesie e veve il passetimp de Incuisizion, e veve puartât al estrem l'art di cjapâ dut sul seri, e difat no si divertive nissun. Cumò par fortune, cul jutori de Television, al è un mît par dutis lis ativitâts umanis che si puedin imagjinâ, come par esempli johnholmes, il pornoatôr muart che le veve lungje 35 cm, che elioelestorietese i à dedicât une cjançon. johnholmes al è un mît moderni, intant che la serietât e je un mît antîc dal savôr vêr, come la vecchiaromagna (no, al jere il montenegro). Duncje, par no jessi incolpât di discriminazion mitologjiche, o sarai dispès seri, in chestis letaris, e dispès no lu sarai. O sarai dispès spes (che al è il contrari di sutîl, come il dot. Amato), cioè spes tai contignûts, e o sarai dispès sutîl (ma no come il dot. Amato), sutîl tai contignûts, ce che al vueli dî chest agjetîf cence sintiment, te ment di cui che al sta leint.
Cui che al ves esaminât, prime di cheste, lis dôs letaris di prime scritis di me - che l'esaminadôr al sedi un funzionari dal Maurizio Costanzo Show, o che al sedi invezit il letôr dal libri che cheste letare e fos part - al varà di sigûr notât fuartis diferencis di stîl e di teme tra lis letaris di prime e cheste. Al podarès jessi parût, leint lis primis dôs, che jo o ves tal cûr di produsi cualchi sorte di sagjo sui rûi simbolics fantomatics che la Television e varès tal grim de nestre societât. Falât. No soi avonde savi par scrivi un vêr sagjo, e tal stes timp o soi avonde savi par no metimi a scrivi un sagjo. I miei studis a son stâts masse scjars par dâmi i titui che al sarès ben che si vistìs un aspirant sagjist, e chest jo lu sai benon, e duncje no cjol te trapule di volê confezionâ un sagjo. Di chê altre bande, e cun dut chel, jo o esist pardabon, no dome parcè che cogitoergosum, ma ancje parcè che la anagrafe lu certifiche cun grande convinzion, e cualsisei, fin che jo o disarai di jessi vîf, al pues fâsi une biele code in anagrafe par controlâ, cjatantint conferme. In plui, ogni volte che mi cjali tal spieli mi torni a viodi, e oramai o crôt pròpit che chel lì o soi jo, cioè cualchidun che al esist pardabon. Esistint, par câs mi è sucedût di pensâ, e la invenzion dai struments mecanics di scriture (come il computer) no mi judin a evitâ di meti neri su blanc il frut dal percors dal gno pensâ. Ve duncje chestis letaris e - a un altri nivel - chest libri. Chestis secuencis di letaris, peraulis, frasis, pagjinis a vegnin fûr semplicementri di chel grant cjaos di protons, neutrons e eletrons che metûts in ordin intune cierte maniere a formin il cussì clamât "jo", il cussì clamât Roberto Quaglia. A vegnin fûr di Roberto Quaglia dret viers di te, il totem, il Maurizio Costanzo Show, il fulcri e il cûr di chê che jo o clami la Societât Televisive Taliane. Tu uman talian che tu leis chestis riis e che te tô ment a sunin, lassant la eco dal lôr significât, sepiti che no a ti lis ai indreçadis di prime man, ma al nestri pont di riferiment comun indispensabil e inevitabil: il Maurizio Costanzo Show. Cuant che a fâ di mieç te comunicazion tra i oms e jere la religjon, i concets a jentravin miôr tal interlocutôr se furnîts cun rinfuarçs sacris come la espression "seDiuvûl", Vuê il rinfuarç plui sacri e duncje plui eficient al è la menzion dal Maurizio Costanzo Show. Che si domandi, cualsisei che al stedi leint chestis riis: lis staressial lui (o jê) leint se jo no i ves recitât prime denant e a alte vôs la peraulute magjiche "Maurizio Costanzo Show"?
Roberto Quaglia
La opare "Cjâr Maurizio Costanzo Show...", dute o in part, e pues jessi leiude, discjamade sul computer, stampade e copiade cence limits, dome par ûs personâl. Ducj i tescj e lis ilustrazions a son proprietât di Roberto Quaglia e no puedin jessi doprâts dal dut o in part cence autorizazion. Il progjet grafic e lis componentis grafichis di chestis pagjinis a son proprietât riservade di Roberto Quaglia. La opare "Cjâr Maurizio Costanzo Show...", dute o in part, no pues jessi metude in vendite a nissun titul cence autorizazion prime.
© 1994-2000 Roberto Quaglia.
|