
 |
U NUME DA ROSA
Caru Maurizio Costanzo Show,
scusa si intitulu a littera cumu ha fattu umbertoeco ccu u libru sue, ma tantu chiru titulu un c'entrava nente ccu u libru sue accussì cumu un c'entra nente ccu a littera mia. Illu intra a sapienza sua e iu intra l'ignoranza mia avimu fattu a stessa cosa.
Ogni tantu chi mi cade l'uocchiu supra tanti de chisti littere mei tutte chine de parole chi un capisciu e frasi chi capisciu ancora menu de i parole, pensu chi ci vò propriu chi quarchi vota ti scrive puru quarcunu cumu a mia, cchiù semplice e puru sinceru, armenu cridu. Iu u sacciu chi mi dicianu chi sugnu propriu a stessa persuna chi scrive puru tutti chiri littere accussì complicate, e mi dispiace puru si sugnu cuntentu. E si vida benissimu chi u sacciu pecchì già all'inizio dicu chi mi cade l'uocchiu supra i mei littere, allura si capisce chi iu sacciu chi su' mei, o comunque u capisciu iu e chistu mi basta.
Aju lettu na vota intra a carta de nu cioccolatinu chi nue tutti (i persune) simu puru tanti identità tutte 'nzèmmula o 'nveci a turnu. C'entra quarchi cosa ccu a pissicanalisi, chira scienza 'nventata de Froid. Ppe meritu de Froid iu allura sacciu chi certi voti scrivu i cose tutte complicate, ccu puru i parole difficili e i frasi ancora de cchiù, e l'atri voti cumu oje un riesciu a capire n'acca de chiru chi mi ricordu chi puru aju scrittu iu. È buffu, veru, caru Maurizio Costanzo Show?
Aju vistu intra a televisione nu bellu film chi si chiamava "I due mondi di Charlie", chi parlava de nu fessu chi ci fannu na cura ppe addivintare a persuna cchiù intelligente du munnu e illu ci addiventa veramente, ma alla fine torna fessu, e quannu torna fessu si ricorda però chi era statu intelligente, e puru si un capisce nente de chiri parole e frasi chi ha scrittu de intelligente u fattu de essere statu intelligente ci piace u stessu puru mo de fessu. Iu aju vistu u film, ma mi ricordu chi a persuna chi sugnu de intelligente (tuttu chistu è stranu, veru?) avìa puru lettu u libru, chi si chiamava e forse si chiama ancora "Fiori per Algernon". Si ppe casu c'è quarcunu intelligente chi legge ci cunsigliu de leggere u libru, ppe tutti l'atri cumu a mia è megliu guardare u film chi tantu a storia è a stessa e va puru a finire allu stessu modu. L'auture du libru si chiama Daniel Keyes, u dicu pecchì au show tue s'usa dicere i nomi de chiri chi scrivianu i libri belli, e puru si iu un l'aju letti i libri chi tu dici sempre chi su' belli iu ci cridu veramente chi su' tutti assai belli pecchì mu ha dittu u purtinaru mie chi si nn'intende.
A vita mia è bella, caru Maurizio Costanzo Show. Sugnu cuntentu de essere a persuna chi sugnu, e sugnu cuntentu de essere puru chira chi un sugnu. Speru chi un sto facennu cunfusione. Vuogliu dicere chi mi piace puru chi certi voti sugnu intelligente (cridu chi i 'ntelligenti su' chiri chi parlanu ccu i parole tutte difficili e i frasi ancora de cchiù), pecchì sugnu cunvintu chi essere intelligenti ha de essere na cosa bona. C'è però na cosa chi mi duna nu pocu fastidiu, 'n chistu fattu de essere intelligente a turnu. Iu mi sentu iu stessu, s'intenne, e sacciu chi chistu è giustu pecchì si unu un si sente se stessu 'n pratica è malatu, cridu chi puru ccà c'è u zampinu de Froid. Datu chi sugnu intelligente a turnu, e mo un u sugnu, iu mi dumannu chi cosa succede ccu mia quannu un sugnu iu? A carta du cioccolatinu dice chi simu tutti tanti persune, chistu l'aju capitu. E allura, quannu iu un sugnu iu stessu pecchì sugnu quarcunu atru (ppe esempiu l'intelligente), aduve vaju a finire iu? (cioè chiru chi sugnu mo?) Chista cosa aju de dicere chi mi duna nu pocu fastidiu. Speru chi un pensati chi sugnu intelligente contra a vuluntà mia.
Certi voti forse sugnu puru cchiù semplice de oje, ma un u sacciu. Chissà si quannu sugnu intelligente mi ricordu chi iu sugnu puru accussì cumu mo, cioè assai megliu (umanamente parlannu), ma cchiù semplice.
Quannu sugnu cumu sugnu mo mi dumannu puru chi cosa vò dicere essere intelligente, precisamente. E si unu si studia a memoria tutti i parole difficili e puru i frasi chi s'hannu de sapìre ppe essere intelligenti, doppu vò dicere chi accussì s'è addivintati intelligenti? Mi dumannu si mi dumannu chisti dumanne puru quannu sugnu intelligente, e si s'intenne m'arriva a risposta datu chi allura sugnu intelligente. E mi dumannu si quannu sugnu intelligente mi dumannu si quannu sugnu cumu mo mi dumannu a stessa dumanna chi mi sugnu dumannatu. Sugnu assai fissicieddu, veru?
Iu ci pensu accussì tantu chi ormai nni sugnu sicuru chi avissaru de dare nu certificatu ppe essere intelligenti. Cioè 'n pratica chi si va all'anagrafe e cumu si dumanna ppe sapìre a data de nascita propria e a residenza e si si è maritati e chiri cose llà, si dumanna puru si c'è l'intelligenza propria oppuru no. M'hannu dittu chi 'n America u fannu, ma llà su' avanti supra tutti i cose. Fussa comodu ppe tutti sapìre si si è intelligenti oppuru no oppuru forse (è veru: pò essere chi si pò essere "forse" intelligenti, cumu puru i persune senza fissa dimora un si sa mica aduve stannu, eppuru de quarchi parte stannu puru iddi). Na persuna chi va all'anagrafe ci dumanna nu certificatu de intelligenza e accussì pue sa precisamente si è intelligente de sicuru, si u è forse oppuru si un u è. Fussa nu bellu prugressu civile. U putissaru scrivere puru supra a carta d'identità. Tutti pònnu vidire subitu chi tegnu l'uocchi e i capilli marrò, puru senza leggere supra a carta d'identità "uocchi: marrò", "capilli: marrò". Fussa cchiù comodu si 'nveci de chisti fesserìe ci jissa scrittu "intelligente: sì/no/forse" (s'intenne no tutti e tri 'nzèmmula sinnò simu da capu).
Ma allura a mia chi cosa m'avissaru de scrivere supra a carta d'identità? Iu sacciu chi un sugnu intelligente, pecchì un sugnu mica fessu, sugnu sulu semplice. Ma sacciu puru chi atri jorni 'nveci u sugnu, sempre ppe curpa de Froid e de i teorie sui. Allura chi cosa ci hannu de scrivere supra chista carta? "Intelligente: nu pocu sì e nu pocu no"? Ma un fussa veru. Iu un sugnu nu pocu intelligente e nu pocu no. È chi sugnu tanti persune, o armenu cchiù de una, cumu 'mpara Froid. Na persuna chi sugnu sacciu chi è intelligente, n'atra persuna chi sugnu (tra l'atru propriu 'n chistu mumentu) sacciu chi un u sugnu (intelligente). Allura chistu vò dicere chi forse aju bisognu de cchiù de na carta d'identità? Ma un è vietatu de tenire cchiù de na carta d'identità? Un è obbligatoriu de essere sulu na persuna? Cridu propriu de sì e allura sugnu fora legge, ma un u fazzu apposta. E si m'acchiappanu mentre fazzu chistu reatu, chi cosa mi farrannu? E si acchiappanu a persuna chi iu sugnu quannu sugnu intelligente? Iu pensu chi è tutta curpa da persuna chi iu sugnu quannu sugnu intelligente. Ci avìa de pensare illu a risolvere chistu guaju, datu chi è propriu intelligente. Chi curpa nn'aju iu, suprattuttu ppe rispettu a illu? Forse, però, è propriu pecchì è intelligente chi ha sempre de pensare a quarchi atra cosa. Si illu penza chiru chi pensu iu, vò dicere chi un è mica tantu intelligente. E allura chine ni sarva? Un ci capisciu cchiù nente. Quarcunu m'aiuta?
Roberto Quaglia
L'opera "Caro Maurizio Costanzo Show...", tutta o 'n parte, pò essere letta, scaricata supra u computer, stampata e copiata senza limiti, sulu ppe usu personale. Tutti i testi e i illustrazioni su' proprietà de Roberto Quaglia e un pònnu essere usati sani o 'n parte senza permissu. U progettu graficu e i componenti grafiche de chisti pàgine su' proprietà riservata de Roberto Quaglia. L'opera "Caro Maurizio Costanzo Show...", tutta o 'n parte, un pò essere misa 'n vinnita a nullu titulu senza permissu prima.
© 1994-2000 Roberto Quaglia.
|