se pol dir quanto se vol che gaver i preconseti el xe mal, ma, apunto, se dise e basta e anzi, in sto dir - se volemo ndar in fondo a la question - ghe xe anca asè poco de beło.
L'èser uman el vive de fato grasie a na vision del mondo fata par lo pì de preconseti. La nosion stesa che gaver i preconseti el sia un fato negativo, la xe eła stesa un preconseto. Ma cosa xe un preconseto?
Da'l disionàrio Gabrielli: "PRECONSETO: Che'l xe consepìo inte l'ànimo prima de èser stà conosùo, considerà, sperimentà, a modo de crear pregiudisio, de vietar un giudisio seren de la realtà."
Come se vede, el preconseto no'l xe el pregiudisio, ma el ne xe invese eventualmente la causa. Se noti come anca inte'l disionàrio Gabrielli se acena a'l significato negativo del tèrmine (...vietar un giudisio seren...). El disionàrio Gabrielli, definendo el preconseto, el xe vìtima lu steso de un preconseto, e da questo consegue, in virtù de la definision che lu steso el dà a la parola "preconseto", che el redator del disionàrio el ga definìo sto concèto sensa gaverlo prima conosùo, considerà, sperimentà, in altre parole capìo, riportàndone invese el significato popolarmente pì difuso, in altre parole el preconseto.
Pensar che in Australia i viva i canguri el xe un preconseto, par ogni persona che no la sia mai stà in Australia. Anca l'idea che l'Australia la esiste el xe un preconseto, par chi no'l ghe sia mai stà. Chi ne garantise che l'esistensa de l'Australia no la sia soło na legenda sensa fondamento? La xe opinion difusa che l'Australia la esiste, ma fin a quando uno no'l ghe va, queła so opinion la xe un preconseto.
No ghe xe gnente de mal in sti preconseti. In realtà no ghe xe gnente de mal inte i preconseti in generale. El 99% de le nostre conosense le xe in realtà preconseti. Anca el concèto che Marilyn Monroe la sia sesualmente apetìbile el xe un preconseto. In realtà la xe morta, interà e deconposta e cussì tut'altro che sesualmente riutilizàbile. Anca el concèto che la fuse sesualmente apetìbile quando la gera viva el xe un preconseto. Gavemo giusto visto qualche so imàgine truccatìsima bidimensional in movimento, sensa gnanca sentìrghene la vose (dopià). Par queło che ne savemo noaltri la spusava, e el so alito el podeva evocar l'inpresion de un distilà de calseti frasi. Par queło che ne savemo tute le so foto e tuti i fotograma de tuti i so film i xe abilmente ritocà par fàrnela parer arapante. No la gavemo conosùa e sperimentà, questa la xe la verità, ogni opinion che gavemo de queło che eła la fuse el xe un preconseto.
Se uno proprio no'l sa cosa far, el pol sentarse a na scrivania o in altro canton e elencar su un fojo de carta tuti i so preconseti che ghe vien in mente, ovaro tute le cose che'l pensa de saver anca no gavendo mai gavù ocasion de verificarle, sperimentarle, farghene esperiensa in prima persona. No go idea a cosa el pol servir farlo, ma se a qualcun ghe vien davero la voja de farlo, lu/eła el saverà cosa ghe servirà.
Se alora i preconseti no i xe gnente de mal, a cosa serve saver cosa i xe? E parché ghe ne stemo parlando?
Ebe, tanto par scominsiar par restituir la dignità perdùa a'l concèto de preconseto, incolpévole vìtima de se steso, ovaro de un preconseto.
E tiremo deso in bało un altro vocàbolo vìtima de un atrose preconseto: "Discriminasion"! I ne ga inparà che discriminar el xe mal. Se se dise solidali co le cussì dite "vìtime de la discriminasion". Se parla inte i telegiornali de "gravi fati de discriminasion". La parola "discriminasion" la xe speso asosià a "intoleransa", come se le significase qualcosa de sìmile.
El disionàrio Gabrielli el dise: "DISCRIMINASION: l'ato e l'efeto del discriminar, distinsion, diferensa."
E ancora: "DISCRIMINAR: Far diferensa o distìnguer tra persone e cose; diferensiar, distìnguer." Gnente de negativo el xe contegnù in sto vocàbolo. Che la discriminasion la sia qualcosa de negativo in sé, el xe un preconseto. Chiunque el pensa che "discriminar" el sia mal, el ga adotà sto preconseto, e da questo consegue, in virtù de la definision del Gabrielli de "preconseto", che sta persona no la ga mai conosùo, considerà, sperimentà, el real significato de la parola "discriminar".
E discriminar, ovaro distìnguer, reconóser diferense, el xe invese esensial inte la vita de chiunque. E el xe inportante inparar a discriminar cosientemente, lùsidamente, soratuto riguardo ai preconseti, ovaro queła gran masa de convinsion che no le xe fruto de l'esperiensa, de la sperimentasion pròpria, de na conosensa aprofondìa, de le necesarie verìfiche. Ghe vol ciapar cosiensa dei so preconseti e tra lori discriminar, separando i preconseti ùtili da queli danosi, queli sensati da queli disenà. El xe ùtile e sensà gaver el preconseto che l'Australia la esiste, anca se no se ghe xe mai stà, parché cussì se pol eventualmente ciapar in considerasion l'oportunità de ndarghe in vacansa. El xe danoso e disenà gaver el preconseto che i negri i xe na rasa inferior, parché se se crea nemighi che nemighi senò no i saria, e se insentiva e legìtima a'l steso tenpo altri indivìdui a sviłupar el steso preconseto verso de noaltri.
In sìntesi, la via de la sagesa la xe queła de inparar a discriminar tra i so preconseti, e non in base ai so preconseti.
Tuto sto polpeton el voleva introdur qualche divagasion su'l difuso preconseto de la morte. Ghe ne parlaremo, caro Maurizio Costanzo Show, inte la létera che vien.

Roberto Quaglia