se po' dìcere quanto se vo' ca tené 'e preconcette è male, ma, appunto, se dice e abbasta e anze, 'n stu dìcere - si vulimmo ì 'nfunno â questione - ce sta pure assaje poco 'e bello.
'O essere umano vive defatte grazie a 'na visione d''o munno fatta pe 'e cchiù 'e preconcette. 'A nozione stessa ca tené 'e preconcette sia 'nu fatto negativo, è essa stessa 'nu preconcetto. Ma che è 'nu preconcetto?
D''o dizionario Gabrielli: "PRECONCETTO: Ca è cuncepito dint'a ll'ànemo primma 'e essere stato canusciuto, cunziderato, sperimentato, a muodo 'e creà pregiudizio, 'e vietà 'nu giudizio sereno d''a realtà."
Comme se vede, 'o preconcetto nun è 'o pregiudizio, ma ne è 'mméce eventualmente 'a causa. Se noti comme pure dint'ô dizionario Gabrielli s'accenna ô significato negativo d''o tèrmene (...vietà 'nu giudizio sereno...). 'O dizionario Gabrielli, definenno 'o preconcetto, è vìttima isso stesso 'e 'nu preconcetto, e 'a chesto cunzegue, 'n virtù d''a definizione ca isso stesso dà â parola "preconcetto", ca 'o redattore d''o dizionario ha definuto stu cuncètto senza ll'avé primma canusciuto, cunziderato, sperimentato, 'n ate parole capito, ripurtànnone 'mméce 'o significato popolarmente cchiù diffuso, 'n ate parole 'o preconcetto.
Penzà ca 'n Australia vìvano 'e canguro è 'nu preconcetto, pe ogne perzona ca nun sia maje stata 'n Australia. Pure ll'idea ca ll'Australia esiste è 'nu preconcetto, pe chi nun ce sia maje stato. Chi ce garantisce ca ll'esistenza 'e ll'Australia nun sia sulo 'na leggenda senza funnamiento? È opinione diffusa ca ll'Australia esiste, ma fino a quanno uno nun ce va, chella opinione soja è 'nu preconcetto.
Nun ce sta niente 'e male 'n sti preconcette. 'N realtà nun ce sta niente 'e male dint'a 'e preconcette 'n generale. 'O 99% d''e canuscenze noste sò 'n realtà preconcette. Pure 'o cuncètto ca Marilyn Monroe sia sessualmente appetìbbile è 'nu preconcetto. 'N realtà è morta, atterrata e decomposta e accussì tutt'ato ca sessualmente riutilizzàbbile. Pure 'o cuncètto ca fosse sessualmente appetìbbile quanno era viva è 'nu preconcetto. Avimmo giusto visto quacche immàggine soja truccatìssema bidimensionale 'n muvimento, senza manco ne sentì 'a voce (doppiata). Pe chello ca ne sapimmo nuje puzzava, e ll'alito suo putesse evocà ll'impressione 'e 'nu distillato 'e cazette fracete. Pe chello ca ne sapimmo tutte 'e foto soje e tutte 'e fotogramme 'e tutte 'e film suoje sò abilmente ritoccate pe ce 'a fa paré arrapante. Nun ll'avimmo canusciuta e sperimentata, chesta è 'a verità, ogne opinione ca tenimmo 'e chello ca essa fosse è 'nu preconcetto.
Si uno proprio nun sape che fa, se po' assettà a 'na scrivania o 'n ate pizzo e elencà ncopp'a 'nu fuoglio 'e carta tutte 'e preconcette suoje ca lle vènono 'mmente, ovèro tutte 'e cose ca penza 'e sapé pure nun avenno maje avuto occasione 'e 'e verificà, sperimentà, ne fa esperienza 'mprimma perzona. Nun tengo idea a che po' servì 'o fa, ma si a quaccheduno lle vène overamente 'a voglia 'e 'o fa, isso/essa saparrà che lle servarrà.
Si allora 'e preconcette nun sò niente 'e male, a che serve sapé che sò? E pecché ne stammo parlanno?
Embè, tanto pe accummencià pe restituì 'a dignità perduta ô cuncètto 'e preconcetto, incorpèvole vìttima 'e sé stesso, ovèro 'e 'nu preconcetto.
E tirammo mò 'n ballo 'n ato vocàbbulo vìttima 'e 'n atroce preconcetto: "Discriminazione"! Ce hanno 'mparato ca discriminà è male. Ce se dice solidale cu 'e accussì ditte "vìttime d''a discriminazione". Se parla dint'a 'e telegiornale 'e "gravi fatte 'e discriminazione". 'A parola "discriminazione" è spisso associata a "'ntolleranza", comme si significàssero quaccosa 'e sìmmele.
'O dizionario Gabrielli dice: "DISCRIMINAZIONE: ll'atto e ll'effetto d''o discriminà, distinzione, differenza."
E ancora: "DISCRIMINARE: Fa differenza o distìnguere tra perzone e cose; differenzià, distìnguere." Niente 'e negativo è cuntenuto 'n stu vocàbbulo. Ca 'a discriminazione sia quaccosa 'e negativo 'n sé, è 'nu preconcetto. Chiunque penza ca "discriminà" sia male, ha adottato stu preconcetto, e 'a chesto cunzegue, 'n virtù d''a definizione d''o Gabrielli 'e "preconcetto", ca sta perzona nun ha maje canusciuto, cunziderato, sperimentato, 'o reale significato d''a parola "discriminà".
E discriminà, ovèro distìnguere, ricanóscere differenze, è 'mméce essenziale dint'â vita 'e chiunque. E è 'mpurtante 'mparà a discriminà coscientemente, lùcidamente, suprattutto riguardo a 'e preconcette, ovèro chella gran massa 'e cunvinziune ca nun sò frutto 'e ll'esperienza, d''a sperimentazione propia, 'e 'na canuscenza approffonnuta, d''e necessarie verìfeche. Ce vo' piglià cuscienza d''e preconcette suoje e tra lloro discriminà, separanno 'e preconcette ùtile 'a chille dannuse, chille sensate 'a chille dissennate. È ùtile e sensato tené 'o preconcetto ca ll'Australia esiste, pure si nun ce se è maje stato, pecché accussì se po' eventualmente piglià 'n cunziderazione ll'opportunità 'e ce ì 'n vacanza. È dannuso e dissennato tené 'o preconcetto ca 'e nire sò 'na razza inferiore, pecché ce se crea nemice ca nemice si no nun sarrìano, e se incentiva e legittima ô stesso tiempo ate individue a sviluppà 'o stesso preconcetto verzo 'e nuje.
'N sìntese, 'a via d''a saggezza è chella 'e 'mparà a discriminà tra 'e preconcette suoje, e non 'n base a 'e preconcette suoje.
Tutto stu purpettone vuleva introdurre quacche divagazione ncopp'ô diffuso preconcetto d''a morte. Ne parlarrammo, caro Maurizio Costanzo Show, dint'â lettera ca vène.

Roberto Quaglia