|
E' principi l'era e' Mêl...
...e a v'al dimòstar. |
 In principi l'era Il Male, a l'incontrêri ad quel ch'la dis la Bibbia. Il Male l'è stê un setimanêl satìric publichê int i an stânta de' sècul passê. L'è stê l'ùnic periòdic satìric italiân bon dabón ad dissacrê e tô in gir i custum e i scustumê dla su època. Quest l'è un dê stòric ugetiv. La próva? Par pudé esèstar, Il Male l'aveva e' su diretór respunsàbil ch'e' stêva fës in galera. E a ogni nùmar de' setimanêl la su pena la s'slunghêva. Sôl acsè Il Male l'era bon d'esercitê la su libertê d'upinion e ad stampa. Un quèl l'è sicur: qualcadun ad sti sgnur l'aveva al bal. |
Dis an dop...
...e' gnint. |
Pu Il Male l'à smès al pubblicazion. Un pô d'an dop, a m'so ritruvê a lèzar un tabloid verdulèn che zert i s'arcurdarà: Cuore. A l'inizi supplemént de l'Unità, e' dventè prest una testata indipendent. Almânc in apparenza. Par un pô u m'à divertì, ènca se l'era ciêr ch'l'aveva ben pôc de' spìrit dissacrant de Il Male. Pu e' suzedé un quèl ch'u m'à fat arsavì una vôlta par sèmpar. |
Nàsita e mort ad Crepacuore
Periòdic efìmar ad sàtira istantânea |
| GALEOTTA L'È STÊDA LA GITA |
L'era l'an 1991 e a sérum ad Lój. A avéva lèt s'e' setimanêl Cuore che una cosidèta "Festa dla Sàtira" la s'srèb fata da lè a pôc int una citadina dl'Emilia, organizêda pröpi da Cuore. A cl'épuca a n'avéva ancora pers tota la mi fede int la sàtira, alóra a jò pensê un pô senza zudizi - e una masa misticamént - che l'avenimént e' pses ësar d'interès par me.
Acsè, un zert dopmezdè ad lój de' '91 a jò fat un sêlt a ca de' mi amig Gigi Picetti e a j ò prupòst ad fê un sêlt a la festa dla sàtira. Incantê ènca lò da st'idea astràta, u s'è unì a me, a sém partì sóbit da Genova e pôch ór dop a sém arivê ad sera a Montecchio, la citadina dl'Emilia duv che la festa la s'feva.
Cun un orór imediêt a avém scuvért sóbit che la tânt decantêda festa dla sàtira in sìntesi la n'era êtar che un banalèsum Festival dell'Unità. Int chi stes dè u j era un festival dell'unità ènca a Genova, e a s'sintìvum quindi piutost scémi d'avé fat tre ór ad machina par andê a una fiera cumpâgna a cla ch'a avìvum sota ca.
Angusié, a avém zirchê a dèstra e a mânca un pô ad sàtira o un quèl de' gènar, mo tot quel ch'a avém truvê l'è stê sól una spezie d'anfiteâtar pin ch'u s'arbaltéva duv che migliéra ad parsón cumè al pégur al j ascultéva una spezie ad talkshow ch'u s'cunsuméva s'e' pêlch. Insòma, l'era cumè guardê e' Maurizio Costanzo Show, sól che j òspit j era i vèri Michele Serra, Paolo Hendel, Fabio Fazio e cumpagnì bëla ch'i ciacaréva tra ad lór senza savé bén cs'avì da dì, cumè ad sòlit u suzéd int qualsiasi talk show.
Ènca s'a n'capìvum bén parchè a fósum andê lè, Gigi Picetti e me ad un quèl a sérum però sicur: u n'ci interesèva gnint d'ascultê dla zênta tota presa a ciacarê tra ad lór par dis dal cös mânch interesânti ad cal ch'a putìvum dìs nun tra ad nun. E la masa ad pégur in muta adurazion s'al gradinêd de' anfiteâtar l'era, int la su muta pasività, ancora piò schifosa dla zênta presuntuosa s'e' pêlch. S'a capì parchè, bën, sinò amen.
Tröp tèrd par turnê a Genova, a avém duvù anghê int la bira la delusion d'ësar lè e, dop ësar intrê a sparlê un pô int un videobox, a la fin a sém andê a durmì int la tènda ch'a s'érum purtê dri. |
| SENZACUORE |
La matêna dop, una svélta perlustrazion dla "festa" la s'à mes davânti a un'alternativa drammàtica: anujês a mort tot e' dè o turnês a Genova cun al piv int e' sach. Una sorta ad alternativa de' diêvul. La "festa" l'era un mortori ch'u n's pò descrìvar (difati u n'gn'è pröpi gnint da descrìvar), mo turnê sóbit a Genova u n'ci entusiasmêva. Alóra a avém decis ad rimandê ad quèlch óra e' ritóran, cun l'intenzion ad fê un quèl ch'u s'divertès almânc un pô int al pôchi ór ch'a avrésum ancora pasê a Montecchio.
A avìvum nutê che la zona, ch'tot i sa ch'l'è infestêda ad zinzêli, la n'era invézi straordinariamént senza. Quaicadun u s'à spieghê che cl'an u j era stê una bóna disinfestazion. A avém ciapê e' spunt e a avém decis ad fê la cosa piò improbàbil che quaicadun e' pses mai fê: a avém improvisê una racolta ad firme contra e' brot stermini dal zinzêli. Parchè a l'avém fat? Bè, cs'a avrésum mai putù fê d'êtar? |
 |
L'è nêd acsè SENZACUORE.
Senzacuore l'era un cartël ad cartón (un mèt e mez par un mèt), s'e' quêl Gigi Picetti e me a avìvum improvisê al prémi stupidêdi ch'a s'érum vnudi in ment. Int un môd ch'a n'm'arcörd, a sém riusì pu a stampê e fotocupiê un bël nómar ad mòdul fêls par la racolta dal firme. Armê ad tot quest, a sém andê in zir par la presunta "festa dla sàtira" sbrajend cumè se davéra u s'ni interesès un quèl dla sôrta dal zinzêli. Incredìbil a dìs, i s'à ciapê tot sul sèri. Mustrend a la vérta e' su òdi par al zinzêli, la zênta la s'rifiutêva ad firmê. A la cosidèta festa dla sàtira, niseun l'era bon ad ricunòssar cumè tal una truvêda satìrica cretina cumè la nòstra. |
Intânt l'era bël mezdè, e u s'è capitê d'imbàtas int una tavulêda cun tot i VIP dla festa. I vèri Michele Serra, Fabio Fazio, ecc. Par e' nòstar stupór, ènca lór i n'à dê segn ad capì cs'u stès suzedènd davânti a lór. A m'arcörd Fabio Fazio ch'e' dgéva "L'è inùtil. Tânt u n'serv a gnint." A n'jò mai capì a cs'u s'fus riferì.
Dop un pô a n'avém avù abastânza. Ësar lè u n'aveva gnint ad sens. A avém smuntê la tènda, a sém muntê in machina e a s'n'sém turnê a Genova. |
| CREPACUORE |
Però, a sérum indigné. Ènca s'a avìvum sèmpar savù che Cuore u n'aveva gnint a che spartì cun Il Male, a cardìvum che un pô d'inteligenza la zirès ènca lè. Dop tot, pòl forsi esìstar la sàtira senza inteligenza? Nö, la n'pò. Mo e' pónt u n'è quest. L'essenza de' prubléma l'era difati un'êtra, e la dmânda giösta da fês la duvéva ësar:
"L'è Cuore un giurnêl davéra satìric?" |
 |
 |
A avém decis quindi d'investì un pêr ad dopmezdè par dê vita a Crepacuore. Niseun l'aveva mai fat la sàtira dla sàtira, e a cl'épuca e int chi dè a nun u s'è parù la cosa piò giösta da fê. O, s'an'êtar, la mânch nujósa.
L'era e' 1991, e da pôc al stampânti laser al j era dventêdi a bon pàt par tot. Gigi Picetti e me a s'sém mes d'impegn e dop dû dopmezdè a sém vnù fura cun un fòi A3 stampê fronte/retro cun quel ch'l'era la nòstra risposta a la delusion Cuore. A l'avém fotocupiê in zentnêra ad cópi.
Quèlch dè dop a so turnê a la cosidèta "festa dla sàtira" ad Cuore e a jò tapezê dapartot cun Crepacuore. Incredìbil, mo vér, j organizadur (cosidèt alfir dla sàtira) i s'la è ciapêda nö pôc. Ón ad lór in particulêr u s'è mustrê ufés una masa par e' fat ch'a avìvum paragunê Cuore a la trasmission ad varietà televisiva ch'l'andéva d'moda alóra Creme
Caramel (una purcarì cun Pippo Franco, s'a n'm'arcörd mêl). Sbalurdì, me a jò arspóst ingenuamént ch'a avìvum fat dla sàtira. Lò u n'paréva capì ad cs'a stès parlend. L'era tröp. |
|