Car Maurizio Costanzo Show,

ëd tant an tant ant la vita a venta imité la reclam, o ëdcò pì dëspess, dzurtut s'as dà a ment a la reclam midema.
Antlora i l'hai pensà ch'a l'era obligatòri, për mi, fete n'oferta special ëdcò mi, com ij pubblissitari an l'han mostrà ch'a sia bin fé.
Al près d'na sola lettera, ancheuj, it na mando adritura sinch. Sinch lettere al Maurizio Costanzo Show al près d'un-a!
A sarà ancheuj ël Gigi Picetti ch'an mi as stërma a l'avèjje prodòte. I lo diso nen tant a ti, quant i lo ricòrdo a chiel e a mi.

Car Maurizio Costanzo Show,
I l'hai 49 agn e mes e i-m son mai marià.
I-m son tnù lìber e arichì d'esperiensa, d'informassion.
I-m ritnisso al pass coj temp e a diso ch'i son nen peui parèj mal esteticament.
I son nen plà, i l'hai nen la pansa, e i l'hai squasi tùit ij dent mè.
Sert, për la stra i-m giro a vardé le fije, e quaidun-a am strapa ëdcò un coment, për com a l'é e com a va vestìa.
Ma quand i j'era fiòt a l'era difìcil l'aprocc (parloma nen peui dla conclusion) përchè le fomne a j'ero tute timorà.
Adess ch'a-i é ël liberalism e tut a l'é përmëttù ansi a avèj pudor as fa bruta figura, le giovo ch'as regalo ai sò tepistin coetani a rifugio da na përson-a san-a e madura com mi ch'a savrìa dëdlà sodisféje con competensa.
I ciamo përchè a ste giovo a-j anteresso nen j'òm con la u maiùscola e as basoto e as sfrèiso a minca canton basta ch'a sio dij sò. Për mi sòn a l'é rassism. Se nò, fije d'adess, rispondé përchè.

Car Maurizio Costanzo Show,
A mi am pias vàire scrive. Dle vire am scapa pròpi da scrive. I scrivo al ristorant, spece dòp mangià, an sij tovajolin. I scrivo ant le sale d'aspet ëd stassion e dentista. I scrivo ëdcò ant la toilette, an sla mia carta personal. Tùit ij mè amis e parent ëdcò malign a apresso le ròbe ch'i scrivo quand i-je sotpon-o, i son andàit an redassion ëd giornaj e riviste e da squasi tùit j'editor ëd Milano, ma i-m son sempe sentù risponde: ch'a continua parèj ch'a sta andasend bin, ch'a ripassa pì anans, ecc. Përchè antlora le ròbe ch'i scrivo a van bin al pùblich e nen a chi ch'a pùblica?
A l'é question d'amicissie, ëd racomandassion, i veuj nen pensé ëd mafia?
S'i veule i peuss vnì a trovéve con un pòch ëd feuj, i sai ëdcò lese bin, e peui i chërdo ch'a sia sempe mej ch'na ròba a la lesa chi ch'a l'ha scrivula, përchè mej ëd chiel gnun a la conòss. I l'hai pàgine an sù squasi tùit j'argoment, a dipend còs av anteressa.
I spero che sta mia a ancontra vòst favor e antant complimenta për na trasmission ch'a-i vorìa pròpi.

Car Maurizio Costanzo Show,
I son pòver, i ciamo an gir ij dné da vint agn.
Però i lo faso con educassion e i veuj nen esse insistent. Fin-a adess la gent a l'é sempe stàita gentil con mi e am l'ha mai fàit manché gnente. Però s'a fussa nen ch'i son stàit prevident an sti agn adess i-m trovrìa an serie dificoltà. I parlo donca nen mach për anteresse personal, ma ëdcò për d'àutri com mi ch'a stan pes.
Tùit a diso ch'a-i é la crisi dël capital e gnun as é ancorzù ch'a-i é ëdcò cola dij spìssol. Tra ij drogà ch'as pòrto via le 100 lire con aroganssa, ij fiotin ch'a bùto le 200 ant le machinëtte dij gieugh automàtich, ij neuv teléfon a monede da 100 e 200 e 500 sensa rest, ij parchìmeter ch'a na angolo tut ël dì e, dulcis in fundo, o mej "in cauda venenum" le machinëtte dj'autobus ch'an cambi dël biliet as pijo le 50, le 100, le 200 e a Milano adess i l'hai savù ëdcò le 500, còs a resta da dé a un pòvrëtt? Nen sert ij dné ëd carta o j'assegn circolar (bej temp dij mini-assegn!) specialment a Gènoa.
Ma a lo san coj ch'a bùto ste màchine mangia-dné a minca crosiera ch'a compiso n'at grevement antisocial?
An veulo ridue a la fam, nojàutri ch'i pesoma nen an sl'economìa dël travaj e i-s rangioma an pròpri?
I ciamo a governant e aministrator pùblich ch'a médito an sël problema s'a veulo ëdcò nòst vot, e ch'a sio na vira tant lor ch'ij problema an-je creo a trové la solussion.

Car Maurizio Costanzo Show,
a l'é la prima vira ch'i-m decido a scrive a na trasmission, e mach përchè i l'hai savù ch'veriament a-i é un spassi lìber a le opinion dij telespetator, che parèj a peulo colaboré a la sivil discussion tra la gent.
I ven-o sùbit al dunque për espon-ve ël cas ch'am sta a cheur: mi i l'hai sempe fumà le sigarëtte Nazionali Semplici sensa Filtr, sia për economìa, sia për abitùdin. Ël près as é sempe mantnù pì che aceptàbil përchè a l'é nòto che ste sigarëtte i-je l'oma ant ël pané, tocand ël qual as sposta la scala mòbil o mej a dì la contingensa.
Tut a andrìa bin se le sudite Nazionali as trovèisso an consëgna dai vari tabachin ëd Gènoa. Ma gira gira a l'é sempe pì difìcil avèjle, sia përchè a diso ch'a na consëgno pòche, sia përchè miraco i vorìa nen pensé mal ma ij tabachin a-je riservo probabilment a amis e parent ch'as-je prenòto e acaparo.
Parland ëd cost problema Dumìnica 20 Novèmber an un Bar ëd Corso Sardegna con vàire amis a l'é saltà fòra ch'as podrìa oblighé ël Monopòli a fé an mòd che un prodòt fàit për ël consum popolar a sia veriament trovàbil ant la quantità giusta al bzògn ch'a na l'han ij sò fumador. E com podèj fé sòn?
Tùit a san che s'as va an un pané e as ciama dël pan comun a l'eva, col men car, ël panaté istess ch'a l'é sprovist a l'é tnù a consegné a l'acatant ël pan ëd près ch'a l'ha imediatament al dëdzora, ma (important) a lë STESS près ëd col pì económich ch'as treuva nen an condission ëd fornì.
Antlora un mè amis fidà a disìa ch'ël sò legal (an na Càusa an Pretura për bordej dël avzin ëd dzora) a-j avìa garantì ch'as peul fé uguala ëdcò për le Nazionali Semplici, s'a-je dan nen avend a sò pòst le Super sensa filtr da 400 lire e se gnanca ste-sì a-i son, le Alfa da 700 lire e via montand fin-a al tipo ch'a l'han, però sempe a 230 lire al pachèt com le Nazionali Semplici.
S'i adotèisso tùit quant cost sistema i sarìo pì nen pijà an gir da un Govern ch'a fa finta ëd pensé a sò pòpol e peui a fa nen assè sigarëtte për ël bzògn dij fumador pì popolar.
Parèj fasend a sarìo obligà për nen rimëttje a fé pì Nazionali e sensa risigh për nojàutri se nen col ëd fumé semmai na sigarëtta pì cara a lë stess impòrt.
Se tra ij vòstri spetator a-i é n'Avocat i gradirìa conferma ant ël sens ëd lòn ch'esponù, ch'a l'é già com i diso parer d'un legal.
Mersì dl'ospitalità e n'apel a tùit ij fumador ëd Nazionali Semplici sensa filtr a esse unì e compat ant ij nòstri sacrosant drit.

Car Maurizio Costanzo Show,
I travajo an pòrt saltuariament e i son ëdcò apassionà ëd fotografìa. Tute le vire ch'a riva na nav giaponèisa i-m rangio col pòch inglèis ch'i màstio a feme spiegé da l'ecipagi le novità fotogràfiche ch'as pòrto daré. Merco passà a son calà un grup ëd sti giaponèis tùit con la Nikon e ël teleobietiv.
I-j hai ciamà përchè gnente normaj e grandàngoj e a m'han fàit capì che për ij gat ch'a dovìo fotografé a andasìo nen bin.
Un a la mancinant a m'ha vorsù dì che lor an Giapon a l'han na gròssa fàbrica industrial d'un tambor dit "sciamisen" ch'a ven costruì con pel ëd gat o ëdcò cunij.
Ël dì dòp an Sottoripa i-j hai becà spars për ij caruggi ch'a fasìo dabon le fòto ai gat.
Adess, mi i l'hai nen particolar simpatìa për ij felin, ma am sta nen bin che sti giaponèis a faso ij sò tambor con ij nòstri gat.
I-m dëslongo nen dëdlà, ch'a provëda chi ch'a l'ha da dovèj.

Car Maurizio Costanzo Show,
I son un pensionà ëd Piazza Terralba ëd setant-sèis agn.
Con sti bej dì ëd sol ch'an regala l'invern, l'àutra matin i son andàit a pijeme l'aria bon-a a la Villa Imperiale.
Pen-a ch'i-m son setà an sla prima banca i-m son trovà na siringa piantà ant ël daré.
A l'é mai possìbil che n'onest sitadin ch'a l'ha travajà tuta la vita a risia la tossicodipendensa involontaria përchè a lasso an gir ste siringhe che peui am se piànto ant ël cul? Scusé l'espression ma i son pròpi fòra ëd mi.

Gigi Picetti

Lassa un Coment. Les ij coment dj'àutri. Am pias! Am pias! Am pias! Ìndes ëd le lettere. Coertin-a. Ma chi ch'a l'é Roberto Quaglia?