
 |
SBALO IN PANTECA!
Cjâr Maurizio Costanzo Show,
o tignivi a dî un pâr di robis ancje jo su ce che chel altri me stes al à dit te letare di prime che mi visi che o ai scrit cuant che o jeri lui. Jo o soi difat chel altri me stes che al è dentri di me cuant che o soi inteligjent, cioè cuant che no lu soi come cumò al è simpri però dentri chel che lu è ancje se al sta cidin.
Chel altri me stes al fevele che al à cognossût Baccini cuant che nol jere Baccini, mi pâr di capî. Ma nol à fat i conts cence l'ost, che po o soi jo, ancje leteralmentri, te Panteca. O jeri difat ancje jo, dentri dal gno cuarp, cuant che si stave a menâsele dutun cun Baccini te Panteca. Ma disìn pûr pan al pan. Jo no soi gjelôs che Baccini cumò al è famôs e che si cucche dutis lis feminis che al vûl, ancje se magari cussì fasint si corin chei riscjos dal AIDS, come che al dîs Lupo Alberto. No soi gjelôs però o dîs che e je pròpit une injustizie che Baccini nol vegni a puartâ dutis lis frecis di feminis che i vanzin a nô che o sin restâts sfigâts dentri te Panteca. Se mi sint chel altri me stes inteligjent che si plate dentri di me par po saltâ fûr cuant che jo mi distrai, si inrabie, e il riscji al è che mi sfrate. Lui al è convint che jo lu sputani, a fevelâ a non ancje so cuntun lengaç semplic e sinciêr, che lui al dîs che al è plen di erôrs e di deficients. Ma no pues stâ cidin denant des injustiziis. Chê altre mê personalitât inteligjente no us à dit dutis lis robis perversis di Baccini cuant che al jere sfigât. Al jere pròpit come me cuant che o soi come cumò, te mê version semplice ma sincere. Nol saveve mai ce dî a nissun. Difat nol diseve nuie. Al martelave sul pianoforte, lis fantatutis cence nissun gust si sentavin dongje di lui a cjalâlu sunâ e se i domandavin alc lui nol saveve mai ce rispuindi. Al jere pròpit come me di semplic, ma jo almancul il coragjo di fevelâ lu ai. La uniche robe che al saveve dî aes fantatutis e jere se a vevin bisugne di un passaç a cjase, e cualchidune la bisugne le veve pardabon, e alore lui lis compagnave a cjase e cence dîur nuie (aes fantatutis) a un ciert pont ur saltave intor e se la fantatute no jere perspicace e finive che e stave cence inacuarzisi e che si cjatave ciulade in mancul che no si disi. In cheste maniere Baccini si aprofitave des bisugnosis di passaçs in machine. Al veve une Due Cavalli rosse cul sentâl dal passizîr denant sfondât (pardabon al jere pròpit distacât des sôs rotais) e cussì cualsisei che si sentave dongje di lui al jere in mût automatic in posizion gjinecologjiche. Mi visi che dutun cun lui o ai fat un viaç fin a Florence in posizion gjinecologjiche. Ma cun me nol à provât.
O ai ancje di ridî su dut ce che il gno alter ego al à dit su la Panteca. Al è vêr che al è un puest di sbalo, ma mighe pes robis pseudo-culturâls che al dîs lui. Se jo no fos dutun cun lui il gjestôr o larès pal sbalo, che lui nol à nancje fevelât. In Panteca si sbale parcè che al è casin, cuant che cualchidun al sune il volum al è cun reson a stecje e ducj chei che a vegnin li par fâ i inteletuâi ae muse di nô plui semplicis ma sinciêrs le cjapin tal daûr parcè che cun dut chel casin no puedin nancje fevelâ e dî dutis chês robis che sbaliant ju fasin sintî superiôrs. Il casin ju fâs stâ cidins e a nô nus fâs sbalâ e al è just cussì, parcè che nô o sin la maiorance e lôr la minorance e nô o sin intun paîs democratic. Plui casin al è, mancul si pense, e mancul si pense e miôr si sta. Lu capirès ancje cualsisei, baste che nol fasi part di chei cuatri gjats che si sintin inteligjents che però no lu son parcè che i vêrs inteligjents o sin nô te nestre semplicitât democratiche. No puedin jessi lôr i vêrs inteligjents pròpit pe democrazie, come che nus insegne la television. La maiorance e à simpri reson, e la maiorance o sin nô, difat lis trasmissions che o cjalìn nô te television a àn i indiçs di scolt plui alts, e chest no lu pues scancelâ nissun.
Scusait se o voi un pôc fûr dal discors. Al è che i dirits umans a scomencin pròpit cuant che si va in discoteche, o in Panteca, o in ducj chei puescj par nô zovins. Cun ce dirit i cussì clamâts inteligjents nus vuelino fâ la predicje disint ce che no vin di fâ dome parcè che no ur plâs a lôr? A nô che nus sbale fâ casin i dubis no nus vegnin e o sin ducj dacuardi che il dirit di fâ casin al è un dirit uman, stant che dopo dut pròpit pe cuistion democratiche o sin plui umans nô dai cussì clamâts inteligjents stant che la maiorance lu ripet o sin nô. Sierâ lis discotechis e dutis chês altris limitazions e je alore une violazion dai dirits umans. O sin te epoche dal progrès, e al è just che dut al cressi, e cussì al è just che al cressi ancje il volum e ducj i sbalos che cumò no us dîs se no po mi arestin violant i miei dirits umans.
Tornant a Baccini, almancul lis frecis di dutis lis feminis che i lechin lis scarpis al podeve ancje puartânusis. Al è che dopo che al è deventât famôs si è montât il cjâf e cumò al è convint di jessi superiôr, come lis personis che a disin di jessi inteligjentis. Lui almancul nol dîs di jessi inteligjent, e al è za alc. Dutis lis personis che lu cognossevin prime a son dutis dacuardi: almancul lis frecis des feminis che i vanzavin al veve di puartânusis. Tant plui che a son dutis feminis semplicis come nô, ae nestre puartade, difat i vanzin.
O speri che tra di vualtris ducj a san cui che al è Baccini. Al è l'unic che o ai cognossût che po al è deventât famôs. Se no lu cognossês mi fasês un dispiet parcè che mi gjavais ancje chest. No je che mi impuarti par lui - no soi mighe inteligjent!
O speri che almancul vualtris o capîs dut ce che o dîs, stant che jo par furtune no rivi simpri, se no o varès pôre di jessi tornât di gnûf chel inteligjenton là dentri di me che al fâs simpri fente une vore ben di capî dut ma jo o sai che nol è cussì ancje se o ai di amet che tantis robis lis capìs pardabon cuintri de mê volontât.
Vignît alore in Panteca, us racomandi, ma dome cuant che al è casin, casin democratic, e alore sì che cul biel rumôr che al è e che al cuvierç ducj i nestris discors o sin pardabon in mût democratic ducj compagns.
Roberto Quaglia
La opare "Cjâr Maurizio Costanzo Show...", dute o in part, e pues jessi leiude, discjamade sul computer, stampade e copiade cence limits, dome par ûs personâl. Ducj i tescj e lis ilustrazions a son proprietât di Roberto Quaglia e no puedin jessi doprâts dal dut o in part cence autorizazion. Il progjet grafic e lis componentis grafichis di chestis pagjinis a son proprietât riservade di Roberto Quaglia. La opare "Cjâr Maurizio Costanzo Show...", dute o in part, no pues jessi metude in vendite a nissun titul cence autorizazion prime.
© 1994-2000 Roberto Quaglia.
|