|
U prengìpie jère u Male...
...e ve u dimòstre. |
 In prengìpie jère u Male, a u condràrie de cudde ca dìsce la Bìbbie. Il Male ha state nu settimanàle satìreche pubblicàte ind'a le anne settànde du sècule passàte. Ha state l'ùneche periòdeche satìreche italiàne ca jère capàce addavère de dissacrà e sfòttere costùme e scostumàte de l'èpeche sò. Quìste jè nu dàte stòriche oggettìve. La pròve? Pe pute esìste, Il Male tenève u direttòre responsàbbele sù ca stève sèmbe de càse in galère. E a ogne assùte du settimanàle la pène sò s'allunghève. Sole accussì Il Male jère capàce de esercità la libbertà sò de opiniòne e de stambe. Na còse jè secùre: cèrte de quìste segnùre tenèvene le pàlle. |
Dièce anne dòppe...
...u nudde. |
Pò Il Male fernì le pubblicaziòne. Anne dòppe, me retrovàibe a lèggere nu tabloid verdolìne ca cèrte s'arrecòrdene: Cuore. A l'inìzie supplemènde de l'Unità, devendò bbèlle prieste na testàte indipendènde. Almène a vedè. Pe nu picche me devertì, pure ca s'acchiàve ca tenève picche picche du spìrete dissacrànde de Il Male. Pò succedì na còse ca me facì turnà a la càpe pe sèmbe. |
Nàscete e mòrte de Crepacuore
Periòdeche effìmere de sàtere istandànee |
| GALEOTTA FU LA GITA |
Corrève l'anne 1991 e stèveme a Lùglie. Avève lètte sop'o settimanàle Cuore ca na sedicènde "Fèste de la Sàtere" s'avève fà de dà a picche ind'a na cettadìne de l'Emilia, organizzàte pròbbie da Cuore. A cudde tìembe nan avève angòre perdùte tutta la fède mè ind'a la sàtere, accussì penzàibe nu picche a la sanfasòne - e assà misticamènde - ca la còse petève èssere de interèsse mì.
Accussì, nu cèrte pomerìgge de lùglie '91 facìbbe nu zùmbe a la càse de l'amìche mì Gigi Picetti e le proponìbbe de fà nu zùmbe a la fèste de la sàtere. Ammaliàte pure jìdde da quèste idèe astràtte, se mettì cu mè, partìmme sùbbete da Genova e pòche ore dòppe arrevàmme de sère a Montecchio, la cettadìne de l'Emilia addò se facève la fèste.
Cu nu orròre sùbbete scuprìmme sùbbete ca la tande decandàte fèste de la sàtere, a fàlla corte, nan ère àlde ca nu banalìssime Festival dell'Unità. Ind'a cudde stèsse dì stève nu festival de l'unità pure a Genova, e ce sendèveme percìò abbastànze scème pe avè fatte tre ore de màchene pe scì a na fiere tale e quale a chèdde ca tenèveme sotte a la càse.
Angosciàte, cercàmme a destre e a manghe nu picche de sàtere o quacche còse de cudde gènere, ma tutte ce acchiàmme fu sule na spèce de anfiteàtre chìne chìne addò migliàre de crestiàne, cume le pècure, sendèvene na spèce de talkshow ca se consumàve sop'o palche. Nzomme, ère accome a vedè u Maurizio Costanzo Show sule ca le òspete èrene le vàrie Michele Serra, Paolo Hendel, Fabio Fazio e compagnìe bbèlle ca chiacchiarijàvene ndrà de lòre senza sapè bbuène cè dìsce, accome de sòlete succède ind'a qualsiàse talk show.
Pure senza capì bbuène picchè èreme scernùte ddà, Gigi Picetti e jì de na còse èreme tuttavìe secùre: nan ce ne fottève nudde de sendì crestiàne ca parlàvene ndrà de lòre pe disce cose mène interessànde de chèdde ca nù petèveme disce ndrà de nù. E la màsse de pècure in mute adoraziòne sop'a le gradenàte de l'anfiteàtre ère, cu la mute passività lòre, angòre cchiù schefòse de le crestiàne presundùse sop'o palche. Ce capìte picchè, bbuène, sennò amen.
Tròppe tàrde pe turnà a Genova, avìmme affucà ind'a la bìrre la delusiòne de stà ddà e dòppe ca trasìmme a sparlà nu picche ind'a nu videobox a la fine ce ne scèmme a dorme ind'a la tènde ca ce avèveme purtàte. |
| SENZACUORE |
La matìne dòppe, na perlustraziòne ràpede de la "fèste" ce mettì nnànze a n'alternatìve drammàteche: annuiàrce a mmòrte tutte u dì o turnàrce a Genova cu le pive ind'o sacche. Na spèce de alternatìve du diàvele. La "fèste" ère nu mortòrie ca nan ze pòte descrìve (nfàtte nan ge stà pròbbie nudde da descrìve), ma turnà sùbbete a Genova nan ce entusiasmàve. Decedìmme allòre de rimannà de quacche ore u retùrne, cu l'intenziòne de fà quacche còse ca ce devertève almène nu picche ind'a le pòche ore ca angòre avèveme passà a Montecchio.
Avèveme notàte ca la zòne, canesciùte pe èssere chiène de zanzàre, ère nvèce senza zanzàre pe mmeràcue. Quacchedùne ce spiegò ca cudde anne ère state fatte na bbona disinfestaziòne. Pegghiàmme u fatte a spunde e decedìmme de fà la còse cchiù improbàbbele ca quacchedùne petève mà fà: improvvisàmme na raccòlte de firme condre u brutte sterminie de le zanzàre. Picchè u facìmme? Beh, cè àlde petèveme mà fà? |
 |
Nascì accussì SENZACUORE.
Senzacuore ère nu cartèlle de cartòne (nu mètre e mmènze pe nu mètre), sop'a u quale Gigi Picetti e jì avèveme improvvisàte le prime fessarìe ca ce èrene venùte a la càpe. In nu mòde ca nan m'arrecòrde, riuscìmme pò a stambà e fotocopià nu bbèlle nùmere de mòdue fìnde pe la raccòlte de le firme. Armàte de tutte quìste, scèmme percìò ggerànne pe la presùnde "fèste de la sàtere" alluccànne accome ce averamènde ce ne fottève quacche còse de la sòrte de le zanzàre. Nan ze pòte crède, ce pegghiàrne tutte sop'o sèrie. Facènne vedè apertamènde l'òdie lòre pe le zanzàre, le crestiàne nan volèvene firmà. A la cosiddètte fèste de la sàtere, nisciùne ère bbuène a canòsce pe ccè jère na pensàte satìreche cretìne accome a la nòstre. |
Ndrattànde ère ggià mezzadì, e ce capitò de ngappà na tavolàte cu tutte le VIP de la fèste. Le vàrie Michele Serra, Fabio Fazio, ecc. Pe lu stupòre nèste, pure quìdde nan dèrene segne de capì cè stève succedènne pròbbie nnànze a lòre. M'arrecòrde Fabio Fazio ca dicève "È inùtele. Tande nan zèrve a nudde." Nan agghie mà capìte a cè còse se referève.
Dòppe nu picche ne tenèveme abbastànze. Stà ddà nan tenève nisciùne sènze. Smondàmme la tènde, saglìmme in màchene e ce ne turnàmme a Genova. |
| CREPACUORE |
Tuttavìe, èreme indignàte. Pure ca avèveme sèmbe sapùte ca Cuore nan tenève nudde a cè spartì cu Il Male, credèveme ca nu picche de inteliggènze ggerave pure ddà. Dòppe tutte, pòte forse esìste sàtere senza inteliggènze? No, nan pòte. Ma u punde nan è quìste. La sostànze du probbleme ère nfàtte n'ata cose, e la domànne ggiùste da fàrse avève a èssere:
"È Cuore nu giornàle averamènde satìreche?" |
 |
 |
Decedìmme percìò de spènne na coppie de pomerìgge pe dà vite a Crepacuore. Nisciùne avève mà fatte la sàtere de la sàtere, e a cudde tìembe e in cudde dì a nù ce parì la còse cchiù ggiùste da fà. O, ce nan àlde, la mène nnoiòse.
Ère u 1991, e da picche le stambànde laser èrene devendàte a la portàte de le sacche de tutte. Gigi Picetti e jì ce mettìmme de bbuène lène e dòppe ddù pomerìgge ne ascìmme cu nu fogghie A3 stambàte nnànze/drète cu chèdde ca ère la resposte nòstre a la delusiòne Cuore. U fotocopiàmme a cendenàre de còpie.
Quacche dì dòppe turnàibe a la cosiddètte "fèste de la sàtere" de Cuore e tappezzàibe da tutte le vànne cu Crepacuore. Nan ze pòte crède, ma jè vère, l'organizzatùre (sedicènde alfière de la sàtere) se ne pegghiàrne a mmàle assà. Une de lòre in particolàre se facì vedè offèse assà pu fatte ca avèveme paragonàte Cuore a la trasmissiòne de varietà televisìve ca allòre stève de mòde Creme
Caramel (na porcherìe cu Pippo Franco ce nan m'arrecòrde màle). Sbigottìte jì respunnìbbe ingenuamènde ca avèveme fatte sàtere. Jìdde nan parì capì de cè stève parlànne. Ère tròppe. |
|